Santiago 4:1-17

4  Antoy sengegan na panlalaban tan pankokolkol yo? Agta makasengeg iratan ed mabiskeg iran pilalek na laman yo a mikokontraan ed saray kabiangan yo?  Pipilaleken yo, ingen ta agkayo nawalaan. Mamapatey tan mangiimon kayo, ingen ta agyo nin siansia naala. Mankokolkol tan manlalaban kayo. Agkayo nawalaan lapud agkayo onkekerew.  Onkekerew kayo, ingen ta anggapoy naawat yo ta mauges so gagala yo, a labay yon usaren itan ed mabiskeg iran pilalek na laman yo.  Sikayoran agmatoor,* agyo ta amta a say pikakaaro ed mundo et pibubusolan ed Dios? Siopaman sirin a labay toy mikaaro ed mundo et pagmamaliwen toy inkasikato a kabusol na Dios.  Odino kasin iisipen yo ya anggapoy gagala na inkuan na kasulatan: “Lapud tendensia ya onibeg, walay ugali* tayon manpirawat na nanduruman bengatla”?  Balet, natalonaan itan na say iiter ton agnaparaan a kaabigan. Kanian inkuan na kasulatan: “Kabusol na Dios iray mapaatagey, balet iiter toy agnaparaan a kaabigan ed saray mapaabeba.”  Pauleyan kayo sirin ed Dios; balet sumpa yo so Diablo, tan arawian to kayo.  Onapit kayo ed Dios, tan sikatoy onapit ed sikayo. Linisan yo iray kalimaan yo, sikayoran managkasalanan, tan saray kapusoan yo, sikayoran nankadua so kanonotan.  Sikayo komon so nagonigon tan manermen tan mannangis. Say panelek yo et magmaliw komon a panermen, tan say gayaga yo et inkabeleng. 10  Manpaabeba kayo ed arap nen Jehova, tan iyatagey to kayo. 11  Agagi, agkayo la mansasalitay mauges ed sakey tan sakey. Say mansalita na mauges ed sakey ya agi odino mangukom ed agi to et mansasalita sumpad ganggan tan uukomen toy ganggan. Natan no uukomen moy ganggan, aliwa kan mananumpal na ganggan noagta manag-ukom. 12  Saksakey so mangiiter na ganggan tan manguukom, samay makayarin mangilaban tan maneral. Balet sika, siopa ka pian ukomen moy kaparam a too? 13  Dengel kayo natan, sikayoran mangibabagan: “Natan odino nabuas et onla kami ed ontan a syudad tan sakey taon kami diman, tan mannegosyo tan manubo kami,” 14  bangta agyo amta no antoy nagawa ed bilay yo nabuas. Ta singa kayo kelpa a wala natan balet nagugunoyan et naandipat la. 15  Imbes, onia so nepeg yon ibaga: “No linawa nen Jehova, manbilay kami tan gawaen mi iya odino satan.” 16  Balet natan et ipapasirayew yo iray malastog a kanonotan yo. Amin itan a panagpasirayew et mauges. 17  Sirin, no say sakey et amta ton gawaen so duga ingen ta agto gagawaen, sikatoy mankakasalanan.

Paimanod leksab

San 4:4 * Literal, “mikakalugoran.”
San 4:5 * Literal, “espiritu.”