၁၊ ၂။ ဘယ်​ဆောက်​လုပ်​ရေး​လုပ်ငန်း​မှာ သင် ပါ​ဝင်​နေ​သလဲ။ သင့်​အလုပ်​ရဲ့ အရည်​အသွေး​ဟာ ဘာ​ကြောင့် အရေး​ကြီး​သလဲ။

သင်​ဟာ ဆောက်​လုပ်​ရေး​လုပ်ငန်း​တစ်​ခု​ကို အင်​တိုက်​အား​တိုက် လုပ်​ကိုင်​နေ​တယ်။ အဲဒီ​လုပ်ငန်း​ကို အချိန်​အတန်​ကြာ ဆောက်​လုပ်​ခဲ့​ပြီး အနာ​ဂတ်​မှာ​လည်း ဆက်​ပြီး ဆောက်​လုပ်​သွား​ရ​ဦး​မယ်။ ခက်​ခက်​ခဲ​ခဲ လုပ်​ကိုင်​ခဲ့​ရ​ပေမယ့် စိတ်​ကျေ​နပ်​မှု ရ​ရှိ​တယ်။ သင့်​အလုပ်​ရဲ့ အရည်​အသွေး​ဟာ သင့်​ရဲ့​အသက်​ရှင်​ရေး၊ အနာ​ဂတ်​ရေး​ကို အကျိုး​သက်​ရောက်​မှာ ဖြစ်​လို့ ဘာ​ပဲ​ကြုံ​ရ​ပါ​စေ အၡုံး​ပေး​ဖို့၊ ပေါ့​ပေါ့​တန်​တန် လုပ်​ကိုင်​ဖို့ လုံး​ဝ​မစဉ်း​စား​ဘူး။ ဘာ​ကြောင့်​လဲ။ သင် ဆောက်​လုပ်​နေ​တဲ့ အဆောက်​အအုံ​ဟာ သင်​ကိုယ်​တိုင် ဖြစ်​လို့​ပဲ။

^၂ မိမိ​ကိုယ်​ကို တည်​ဆောက်​ပေး​ဖို့ လို​တဲ့​အကြောင်း တ​ပည့်​ဖြစ်​သူ ယုဒ​က အလေး​အနက် ဖော်ပြတယ်။ “ဘု​ရား​သခင့်​မေတ္တာ ခံစား​ရ​စေ​မယ့်​အရာ​တွေ​ကို အမြဲလုပ်​ဆောင်” ပါ​လို့ ခ​ရစ်​ယာန်​တွေ​ကို သူ တိုက်​တွန်း​တဲ့​အခါ လုပ်​ဆောင်​နိုင်​တဲ့​နည်း​ကို အဲဒီ​ကျမ်း​ပိုဒ်​မှာ​ပဲ ဖော်ပြတယ်။ အဲဒီ​နည်း​က​တော့ “အသန့်​ရှင်း​ဆုံး ယုံ​ကြည်​ခြင်း​ကို ခိုင်​ခံ့​အောင် တည်​ဆောက်” ခြင်း ဖြစ်​တယ်။ (ယုဒ ၂၀၊ ၂၁) ဘု​ရား​ရဲ့ မေတ္တာ​ အမြဲခံစား​ရ​ဖို့ မိမိ​ကိုယ်​ကို တည်​ဆောက်​ပြီး ယုံ​ကြည်​ခြင်း​ကို ခိုင်​ခံ့​စေ​နိုင်​တဲ့ နည်း​တ​ချို့​ဟာ ဘာ​တွေ​လဲ။ ယုံ​ကြည်​ခြင်း ခိုင်​ခံ့​အောင် တည်​ဆောက်​တဲ့​လုပ်ငန်း​မှာ ပါ​ဝင်​တဲ့ ကဏ္ဍ​သုံး​ခု​ကို သုံးသပ်​ကြည့်​ကြ​စို့။

၃-၅။ (က) ယေဟောဝါ​ရဲ့ ပြဋ္ဌာန်း​ချက်​တွေ​ကို သင် ဘယ်​လို ယူ​မှတ်​သွား​အောင် စာ​တန် လှည့်​စား​ချင်​သလဲ။ (ခ) ဘု​ရား​ရဲ့ ပြဋ္ဌာန်း​ချက်​တွေ​ကို ဘယ်​လို ရှု​မြင်​သင့်​သလဲ။ အဲဒီ​လို​ရှု​မြင်​တဲ့​အတွက် ကျွန်​တော်​တို့ ဘယ်​လို​ခံစား​ရ​သလဲ။ ဥပမာ​ပေး​ပါ။

^၃ ဦး​ဆုံး၊ ဘု​ရား​ရဲ့​ပညတ်​အပေါ် ခိုင်​ခံ့​တဲ့​ယုံ​ကြည်​ခြင်း ရှိ​ဖို့​လို​တယ်။ ဒီ​စာ​အုပ်​ကို သင်  လေ့​လာ​တဲ့​အခါ အမူ​အကျင့်​နဲ့​ပတ်​သက်​တဲ့ ယေဟောဝါ​ရဲ့ ဖြောင့်​မတ်​တဲ့ ပြဋ္ဌာန်း​ချက်​တွေ​ကို သုံးသပ်​ခဲ့​ပြီ။ အဲ​ဒါ​တွေ​ကို သင် ဘယ်​လို ရှု​မြင်​သလဲ။ ယေဟောဝါ​ရဲ့​ပညတ်​တွေ၊ မူ​တွေ၊ စံနှုန်း​တွေ​ဟာ ဖိ​နှိပ်​ချုပ်​ချယ်​လွန်း​တယ်​လို့ သင် ယူ​မှတ်​သွား​အောင် စာ​တန် လှည့်​စား​ချင်​တယ်။ ဧ​ဒင်​ဥ​ယျာဉ်​မှာ ထိ​ရောက်​အောင်​မြင်​ခဲ့​လို့ အခု​ထိ အဲဒီ​နည်း​ကို သူ အသုံး​ပြု​နေ​တယ်။ (ကမ္ဘာဦး ၃:၁-၆) အဲဒီ​နည်း​နဲ့ သင့်​ကို လှည့်​စား​နိုင်​မလား။ သင့်​ရဲ့ ရှု​မြင်​ပုံ​အပေါ် အများ​ကြီး မူ​တည်​လိမ့်​မယ်။

^၄ ဥပမာ၊ သင်​ဟာ သာ​ယာ​တဲ့​ပန်း​ခြံ​တစ်​ခု​မှာ လမ်း​လျှောက်​နေ​တုန်း မြေတစ်​ကွက်​ကို ခိုင်​ခံ့​မြင့်​မား​တဲ့​ အကာ​အရံ​နဲ့ ခြံ​စည်း​ရိုး​ခတ်​ထား​တာ မြင်​လိုက်​တယ်။ အဲဒီ​ခြံ​စည်း​ရိုး​အတွင်း​မှာ ရှု​ခင်း သိပ်​လှ​တယ်။ အစ​ပိုင်း​မှာ အဲဒီ​ခြံ​စည်း​ရိုး​ဟာ သင့်​ရဲ့ လွတ်​လပ်​ခွင့်​ကို ချုပ်​ချယ်​တယ်​လို့ ယူ​မှတ်​မိ​နိုင်​တယ်။ ဒါ​ပေမဲ့ ခြံ​စည်း​ရိုး​အတွင်း​ကို အသေအချာ​ကြည့်​လိုက်​တော့ ကြမ်း​ကြုတ်​တဲ့ ခြ​င်္သေ့​တစ်​ကောင် ချောင်း​နေ​တာ သတိ​ပြု​မိ​တယ်။ အဲဒီ​တော့​မှ အကာ​အကွယ်​ပေး​ဖို့ ခြံ​စည်း​ရိုး​ခတ်​ထား​မှန်း သဘော​ပေါက်​သွား​တယ်။ အခု​ချိန်​မှာ​ကော အန္တရာယ်​ရှိ​တဲ့ သား​ရဲ​ကြီး​တစ်​ကောင် သင့်​ကို ချောင်း​မြောင်း​နေ​သလား။ “သတိ​ရှိ​ပြီး နိုး​နိုး​ကြား​ကြား နေ​ကြ​ပါ။ ရန်​သူ​မာ​ရ်​နတ်​က ဟိန်း​ဟောက်​နေ​တဲ့ ​ခြ​င်္သေ့​လို တစ်​ယောက်​ယောက်​ကို ဝါး​မျို​ဖို့ လှည့်​လည်​ရှာ​ဖွေ​နေ​တယ်” လို့ ကျမ်း​စာ သတိ​ပေး​တယ်။​—၁ ပေတရု ၅:၈။

^၅ စာ​တန်​ဟာ ရက်​စက်​ကြမ်း​ကြုတ်​တဲ့ သား​ရဲ​ဖြစ်​တယ်။ ယေဟောဝါ​ဟာ ကျွန်​တော်​တို့​ကို စာ​တန်​ရဲ့​သား​ကောင် မဖြစ်​စေ​ချင်​တဲ့​အတွက် စာ​တန်​ရဲ့ “ဉာဏ်​နီ​ဉာဏ်​နက်​များ​တဲ့ လုပ်​ရပ်​တွေ” က​နေ ကာ​ကွယ်​ပေး​ဖို့ ပညတ်​တွေ ချ​မှတ်​ပေး​ထား​တယ်။ (ဧဖက် ၆:၁၁) ဒါ​ကြောင့် ဘု​ရား​ရဲ့​ပညတ်​တွေ​ကို ဆင်​ခြင်​သုံးသပ်​တိုင်း ကောင်း​ကင်​ဖခင်​က ကျွန်​တော်​တို့​ကို ချစ်​လို့ ပညတ်​တွေ​ ပေး​ထား​တာ​ဆို​ပြီး ရှု​မြင်​သင့်​တယ်။ အဲဒီ​လို​ရှု​မြင်​တဲ့​အခါ ဘု​ရား​ရဲ့​ပညတ်​တွေ​က​နေ လုံ​ခြုံ​မှု၊ ရွှင်​လန်း​မှု ခံစား​ရ​တယ်။ တ​ပည့်​ဖြစ်​သူ ယာကုပ်​က “လွတ်​လပ်​ခြင်း​နဲ့​ဆိုင်​တဲ့ ပြည့်​ဝ​စုံလင်​တဲ့​ပညတ်​ကို အသေအချာ ကြည့်​ရှု​တဲ့​သူ၊ အဲဒီ​လို ဆက်​ကြည့်​ရှု​နေ​တဲ့​သူ​ဟာ . . . ပျော်​ရွှင်​ချမ်း​မြေ့ရ​လိမ့်​မယ်” လို့​ရေး​ခဲ့​တယ်။​—ယာကုပ် ၁:၂၅။

၆။ ဘု​ရား​ရဲ့ ဖြောင့်​မတ်​တဲ့ ပညတ်​တွေ​နဲ့ မူ​တွေ​ကို ယုံ​ကြည်​စိတ်​ချ​လာ​စေ​ဖို့ အကောင်း​ဆုံး​နည်း​ဟာ ဘာ​လဲ။ ဥပမာ​ပေး​ပါ။

^၆ ပညတ်​ပြဋ္ဌာန်း​ရှင်​ကို​သာ​မက အဲဒီ​ပညတ်​တွေ​မှာ​ တွေ့​ရ​တဲ့ ဘု​ရား​ရဲ့​ဉာဏ်​ပညာ​ကို ယုံ​ကြည်​စိတ်​ချ​လာ​စေ​ဖို့ အကောင်း​ဆုံး​နည်း​ဟာ ဘု​ရား​ရဲ့ ​မိန့်မှာ​ချက်​တွေ​နဲ့​အညီ  အသက်​ရှင်​ခြင်း ဖြစ်​တယ်။ ဥပမာ၊ “ခ​ရစ်​တော်​ရဲ့​တ​ရား” မှာ ယေရှု “မိန့်မှာ​ထား​သမျှ​ကို” သွန်သင်​ပေး​ရ​မယ်​ဆို​တဲ့ အမိန့် ပါ​ဝင်​တယ်။ (ဂလာ​တိ ၆:၂။ မဿဲ ၂၈:၁၉၊ ၂၀) အတူ​တ​ကွ​ဝတ်​ပြု​ပြီး အချင်း​ချင်း​အား​ပေး​ဖို့ မှန်​မှန်​စည်း​ဝေး​ရ​မယ်​ဆို​တဲ့ ညွှန်​ကြား​ချက်​ကို​လည်း ခ​ရစ်​ယာန်​တွေ အလေး​အနက် သဘော​ထား​ကြ​တယ်။ (ဟီ​ဘ​ရူး ၁၀:၂၄၊ ၂၅) ဘု​ရား​ရဲ့ မိန့်မှာ​ချက်​တွေ​ထဲ​မှာ ယေဟောဝါ​ဆီ စိတ်​ရင်း​မှန်​နဲ့ မှန်​မှန်​ဆုတောင်း​ရ​မယ် ဆို​တဲ့ နှိုး​ဆော်​ချက်​လည်း ပါ​ဝင်​တယ်။ (မဿဲ ၆:၅-၈။ ၁ သက်သာ​လောနိတ် ၅:၁၇) ဒီ​မိန့်မှာ​ချက်​တွေ​အတိုင်း နေ​ထိုင်​တဲ့​အခါ မေတ္တာ​ပါ​တဲ့ လမ်း​ညွှန်​ချက်​တွေ​ပဲ​ဆို​တာ ပို​သဘော​ပေါက်​လာ​တယ်။ အဲ​ဒါ​တွေ​ကို နာ​ခံ​တဲ့​အတွက် ဒုက္ခ​များ​လှ​တဲ့ ဒီ​လော​က​မှာ ဘယ်​မှာ​မှ မရ​နိုင်​တဲ့ ပျော်​ရွှင်​ကျေ​နပ်​မှု​ကို ခံစား​ရ​တယ်။ ဘု​ရား​ရဲ့​ပညတ်​အတိုင်း အသက်​ရှင်​တဲ့​အတွက် ကိုယ်​တိုင် အကျိုး​ခံစား​နေ​ရ​မှန်း စဉ်း​စား​လိုက်​တဲ့​အခါ ယုံ​ကြည်​ခြင်း ပို​ခိုင်​ခံ့​လာ​တယ် မဟုတ်​လား။

၇၊ ၈။ နှစ်​တွေ​ကြာလာ​တာ​နဲ့​အမျှ ဖြောင့်​မတ်​တဲ့​လမ်း​စဉ်​မှာ ဆက်​နေ​နိုင်​ပါ့​မလား​လို့ စိုး​ရိမ်​နေ​သူ​တွေ​ကို ကျမ်း​စာ​က ဘယ်​လို အား​ရှိ​စေ​သလဲ။

^၇ နှစ်​တွေ​ကြာလာ​တာ​နဲ့​အမျှ ယေဟောဝါ​ရဲ့ ပညတ်​တွေ​အတိုင်း နေ​ဖို့ ခက်​လာ​မှာ​ကို တ​ချို့ စိုး​ရိမ်​ကြ​တယ်။ တစ်​နည်း​နည်း​နဲ့ ၡုံး​နိမ့်​သွား​မှာ​ကို စိုး​ရိမ်​ကြ​တယ်။ သင်​လည်း အဲဒီ​လို​ခံစား​မိ​ရင် ဒီ​စကား​ကို မှတ်​ထား​ပါ– “ငါ​ယေဟောဝါ​ဟာ မင်း​တို့​ရဲ့ ဘု​ရား​သခင်​ပဲ။ မင်း​တို့​ကောင်း​ကျိုး​အတွက် သွန်သင်​ပေး​တဲ့​အရှင်၊ မင်း​တို့​လျှောက်​သင့်​တဲ့ လမ်း​အတိုင်း လမ်း​ညွှန်​ပေး​တဲ့ အရှင်​ပဲ။ ငါ့​ပညတ်​တွေ​ကို အာ​ရုံ​စိုက်​မယ်​ဆို​ရင် မင်း​တို့​ ရဲ့ ငြိမ်သက်​ခြင်း​ဟာ မြစ်​လို၊ မင်း​တို့​ရဲ့ ဖြောင့်​မတ်​ခြင်း​ဟာ ပင်လယ်​လှိုင်း​တွေ​လို ဖြစ်​လာ​မယ်။” (ဟေ​ရှာ​ယ ၄၈:၁၇၊ ၁၈) ဒီ​စကား​တွေ ဘယ်​လောက် အား​ရှိ​စ​ရာ​ကောင်း​တယ်​ဆို​တာ သင် စဉ်း​စား​ဖူး​သလား။

^၈ နာ​ခံ​မယ်​ဆို​ရင် အကျိုး​ခံစား​ရ​မယ်​ဆို​တာ ဒီ​ကျမ်း​ချက်​က သတိ​ရ​စေ​တယ်။ နာ​ခံ​မယ်​ဆို​ရင် ကောင်း​ချီး​နှစ်​ခု ရ​မယ်​လို့ ယေဟောဝါ ကတိ​ပေး​တယ်။ ပထ​မ၊ ကျွန်​တော်​တို့​ရဲ့ ငြိမ်သက်​ခြင်း​ဟာ မြစ်​လို​ပဲ တည်​ငြိမ်​နေ​မယ်၊ အဆက်​မပြတ် အလျှံ​ပယ် ရှိ​နေ​မယ်။ ဒုတိ​ယ၊ ကျွန်​တော်​တို့​ရဲ့ ဖြောင့်​မတ်​ခြင်း​ဟာ ပင်လယ်​လှိုင်း​တွေ​လို ဖြစ်​လိမ့်​မယ်။ သင်​ဟာ ကမ်း​စပ်​မှာ​ရပ်​ပြီး လှိုင်း​လုံး​တွေ ရိုက်​ခတ်​လာ​တာ​ကို ကြည့်​တဲ့​အခါ တည်​မြဲခြင်း​သဘော​ကို ခံစား​မိ​နိုင်​တယ်။ လှိုင်း​လုံး​တွေ​ဟာ လာ​မြဲလာ​နေ​ပြီး ကမ်း​ခြေ​ကို အစဉ်​ထာ​ဝ​ရ ရိုက်​ခတ်​နေ​မှာ သင် သိ​တယ်။ သင့်​ရဲ့ ဖြောင့်​မတ်​တဲ့​လမ်း​စဉ်​ဟာ အဲဒီ​လို​ပဲ တည်​မြဲနိုင်​တယ်​လို့ ယေဟောဝါ ပြော​တယ်။ ကိုယ်​တော့်​အပေါ် သစ္စာ​ရှိ​ဖို့ ကြိုး​စား​နေ​သရွေ့ သင် ၡုံး​နိမ့်​သွား​မှာ​ကို ကိုယ်​တော် ဘယ်​တော့​မှ ခွင့်​ပြု​မှာ မဟုတ်​ဘူး။ (ဆာလံ ၅၅:၂၂ ကို​ဖတ်​ပါ။) အား​ရှိ​စ​ရာ ဒီ​ကတိ​တွေ​ဟာ ယေဟောဝါ​နဲ့ ဖြောင့်​မတ်​တဲ့ ပြဋ္ဌာန်း​ချက်​တွေ​အပေါ် ပို​ပြီး ယုံ​ကြည်​စိတ်​ချ​မှု ရှိ​လာ​စေ​တယ် မဟုတ်​လား။

၉၊ ၁၀။ (က) ရင့်​ကျက်​ခြင်း​ဟာ ခ​ရစ်​ယာန်​တွေ​အတွက် ဘာ​ကြောင့် သိပ်​ကောင်း​တဲ့​ပန်း​တိုင် ဖြစ်​သလဲ။ (ခ) ဘု​ရား​ရဲ့ ရှု​ထောင့်​က​နေ ကြည့်​တဲ့​သူ​ဟာ ဘယ်​နည်း​နဲ့ ပျော်​ရွှင်​မှု ခံစား​ရ​သလဲ။

^၉ “ရင့်​ကျက်​တဲ့​အဖြစ်​ကို တက်​လှမ်း​ကြ​စို့” ဆို​တဲ့ စကား​မှာ သင် လုပ်​ဆောင်​နေ​တဲ့ ဆောက်​လုပ်​ရေး​လုပ်ငန်း​ရဲ့ ဒုတိ​ယ​ကဏ္ဍ​ကို တွေ့​ရ​တယ်။ (ဟီ​ဘ​ရူး ၆:၁) ရင့်​ကျက်​ခြင်း​ဟာ ခ​ရစ်​ယာန်​တစ်ဦး​အတွက် သိပ်​ကောင်း​တဲ့ ပန်း​တိုင်​ပဲ။ လူ​သား​တွေ​ဟာ ပြည့်​ဝ​စုံလင်​မှု​ကို အခု မရ​နိုင်​ပေမဲ့ ရင့်​ကျက်​တဲ့​အဖြစ်​ကို​တော့ တက်​လှမ်း​နိုင်​တယ်။ ခ​ရစ်​ယာန်​တွေ​ဟာ ရင့်​ကျက်​လာ​လေ ယေဟောဝါ​ရဲ့ အမှု​တော်​ဆောင်​ခြင်း​မှာ ပို​ပျော်​လာ​လေ ဖြစ်​တယ်။ ဘာ​ကြောင့်​လဲ။

^၁၀ ရင့်​ကျက်​တဲ့​ ခ​ရစ်​ယာန်​တစ်ဦး​ဟာ ဘု​ရား​နဲ့​ဆက်ဆံ​ရေး ကောင်း​တဲ့​သူ ဖြစ်​တယ်။ အရာ​ရာ​ကို ယေဟောဝါ ရှု​မြင်​သလို ရှု​မြင်​တယ်။ (ယောဟန် ၄:၂၃) “အပြစ်​ရှိ​တဲ့ အလို​ဆန္ဒ​နောက် လိုက်​တဲ့​သူ​ဟာ အပြစ်​ရှိ​တဲ့​အရာ​တွေ​ကို​ပဲ စိတ်​ရောက်​နေ​တတ်​တယ်။ စွမ်းအား​တော်​နဲ့​အညီ အသက်​ရှင်​တဲ့​သူ​က​တော့ စွမ်းအား​တော်​နဲ့​ဆိုင်​တဲ့ အရာ​တွေ​ကို​ပဲ စိတ်​ရောက်​နေ​တတ်​တယ်” လို့ ပေါလု ရေး​ခဲ့​တယ်။ (ရော​မ ၈:၅) လူ့​ရှု​ထောင့်​ က​ပဲ ကြည့်​တဲ့​သူ​ဟာ အတ္တ​ဆန်​တယ်၊ အမြော်​အမြင် မရှိ​ဘူး၊ ရုပ်​ပိုင်း​ဆိုင်​ရာ​တွေ​ကို​ပဲ အာ​ရုံ​စိုက်​တဲ့​အတွက် ပျော်​ရွှင်​မှု မခံစား​ရ​ဘူး။ ဘု​ရား​ရဲ့ ရှု​ထောင့်​က​နေ ကြည့်​တဲ့​သူ​က​တော့ “ပျော်​ရွှင်​တဲ့​ဘု​ရား” ယေဟောဝါ​ကို အာ​ရုံ​စိုက်​တဲ့​အတွက် ပျော်​ရွှင်​မှု ခံစား​ရ​တယ်။ (၁ တိမောသေ ၁:၁၁) ရင့်​ကျက်​တဲ့​သူ​ဟာ ယေဟောဝါ နှစ်​သက်​တာ​ကို​ပဲ လုပ်​ဆောင်​တယ်။ စမ်း​သပ်​ခံ​ရ​ချိန်​မှာ​တောင် ဝမ်း​မြောက်​နိုင်​တယ်။ ဘာ​ကြောင့်​လဲ။ စမ်း​သပ်​မှု​တွေ ကြုံ​ရ​တဲ့​အခါ စာ​တန်​ဟာ မု​သာ​ကောင်​ပဲ​ဆို​တာ သက်​သေထူ​ဖို့၊ သမာ​ဓိ​စောင့်​သိ​ဖို့ အခွင့်​အရေး ​ရ​စေ​တယ်။ ဒီ​နည်း​နဲ့ ကောင်း​ကင်​ဖခင်​ကို​လည်း စိတ်​ရွှင်​လန်း​စေ​နိုင်​တယ်။​—ပညာ​အလိမ္မာ ၂၇:၁၁။ ယာကုပ် ၁:၂၊ ၃ ကို​ဖတ်​ပါ။

၁၁၊ ၁၂။ (က) ခ​ရစ်​ယာန်​တစ်ဦး​ရဲ့ “ပိုင်း​ခြား​သိ​မြင်​နိုင်​စွမ်း” အကြောင်း ပေါလု ဘာ​ပြော​သလဲ။ “လေ့ကျင့်” လို့​ပြန်​ဆို​တဲ့ စကား​လုံး​ရဲ့ အဓိပ္ပာယ်​ဟာ ဘာ​လဲ။ (ခ) ခန္ဓာ​ကိုယ် ကြံ့​ခိုင်​ရင့်​ကျက်​ပြီး စွမ်း​ဆောင်​နိုင်​ဖို့ ဘာ​လေ့ကျင့်​မှု လို​အပ်​သလဲ။

^၁၁ ဘု​ရား​နဲ့ ဆက်ဆံ​ရေး​ကောင်း​သူ၊ ရင့်​ကျက်​သူ ဖြစ်​ဖို့ လေ့ကျင့်​ပေး​နိုင်​တယ်။ “မာ​တဲ့​အစာ​ကို​တော့ ရင့်​ကျက်​သူ​တွေ​ပဲ စား​တယ်။ သူတို့​ဟာ ပိုင်း​ခြား​သိ​မြင်​နိုင်​စွမ်း​ကို အမြဲအသုံး​ပြု​ပြီး အမှား​အမှန် ခွဲ​ခြား​သိ​နိုင်​အောင် လေ့ကျင့်​ထား​တယ်” ဆို​တဲ့ ကျမ်း​စကား​ကို သုံးသပ်​ကြည့်​ပါ။ (ဟီ​ဘ​ရူး ၅:၁၄) ပေါလု​က ပိုင်း​ခြား​သိ​မြင်​နိုင်​စွမ်း​ကို “လေ့ကျင့်” ပေး​ခြင်း​အကြောင်း ပြော​တဲ့​အခါ ပထ​မရာ​စု ဂရိ​နိုင်​ငံ​ရဲ့ အား​က​စား​ရုံ​တွေ​မှာ သုံး​လေ့​ရှိ​တဲ့ ဂရိ​စကား​လုံး​ကို အသုံး​ပြု​တယ်။ အဲဒီ​စကား​လုံး​ကို ‘ကျွမ်း​ဘား​သမား​လို လေ့ကျင့်’ တယ်​လို့ ပြန်​ဆို​နိုင်​တယ်။ အဲဒီ​လို လေ့ကျင့်​ရာ​မှာ ဘာ​တွေ​ပါ​ဝင်​တယ်​ဆို​တာ စဉ်း​စား​ကြည့်​ပါ။

^၁၂ မွေး​လာ​ချိန်​မှာ ကျွန်​တော်​တို့​ရဲ့ ခန္ဓာ​ကိုယ်​ဟာ လေ့ကျင့် မခံ​ရ​သေး​ဘူး။ ဥပမာ၊ မွေး​စ​က​လေး​ဟာ ခြေ​လက်​လှုပ်​ရှား​မှု အနေ​အထား​ကို နား​မလည်​နိုင်​သေး​ဘူး။ သူ့​ရဲ့ လက်​က​လေး​တွေ​ကို ဟို​ဟို​ဒီ​ဒီ ရမ်း​ပြီး မျက်​နှာ​ကို ပြန်​ရိုက်​မိ​တဲ့​အခါ လန့်​သွား​နိုင်​တယ်။ ကိုယ်​လက်​အင်္ဂါ​တွေ​ကို တ​ဖြည်း​ဖြည်း အသုံး​ပြု​ရင်း​နဲ့ ခန္ဓာ​ကိုယ်​ဟာ လေ့ကျင့်​မှု ရ​လာ​တယ်။ နို့​စို့​က​လေး​ဟာ လေး​ဖက်​သွား​မယ်၊ လမ်း​လျှောက်​တတ်​ခါ​စ​အရွယ်​မှာ ယိုင်​တီး​ယိုင်​တိုင် လျှောက်​မယ်၊ အဲဒီ​နောက် ပြေး​လွှား​တတ်​လာ​မယ်။ * ကျွမ်း​ဘား​ သမား​တစ်ဦး​ကော။ လေ​ထဲ လွှား​ခ​နဲ​ခုန်​ပြီး အကွက်​ကျ​ကျ ကျွမ်း​ဘား​အလှ က​စား​ပြတာ​ကို မြင်​တဲ့​အခါ လူ့​ခန္ဓာ​ကိုယ်​ဟာ ညက်​ညော​အောင် ညှိ​ထား​တဲ့ စက်​နဲ့​တူ​တယ်​လို့ သင် တွေး​မိ​မယ်။ ကျွမ်း​ဘား​သမား​ရဲ့ ကျွမ်း​ကျင်​မှု​ဟာ အလို​လို​ဖြစ်​ပေါ်​လာ​တာ မဟုတ်​ဘူး။ နာ​ရီ​ပေါင်း​များ​စွာ သူ လေ့ကျင့်​ခဲ့​ရ​တယ်။ အဲဒီ​လို ကာ​ယ​လေ့ကျင့်​ခန်း​လုပ်​တာ​ဟာ “အနည်း​ငယ်​ပဲ အကျိုး​ရှိ​တယ်” လို့ ကျမ်း​စာ​မှာ ပြော​ထား​တယ်။ ပိုင်း​ခြား​သိ​မြင်​နိုင်​စွမ်း​ကို လေ့ကျင့်​တာ​ဟာ ပို​လို့​တောင် အကျိုး​ရှိ​တယ်။​—၁ တိမောသေ ၄:၈။

၁၃။ ပိုင်း​ခြား​သိ​မြင်​နိုင်​စွမ်း​ကို ဘယ်​လို လေ့ကျင့်​ပေး​နိုင်​သလဲ။

^၁၃ ရင့်​ကျက်​သူ​တစ်ဦး​အဖြစ် ယေဟောဝါ​အပေါ် သစ္စာ​တည်​ကြည်​နိုင်​ဖို့ သင့်​ရဲ့ ပိုင်း​ခြား​သိ​မြင်​နိုင်​စွမ်း​ကို လေ့ကျင့်​ပေး​ရာ​မှာ အကူ​အညီ​ဖြစ်​စေ​မယ့် အကြောင်း​တွေ​ကို ဒီ​စာ​အုပ်​မှာ ဆွေး​နွေး​ခဲ့​တယ်။ နေ့​စဉ် ဆုံး​ဖြတ်​ချက်​တွေ​ချ​တဲ့​အခါ ဆုတောင်း​ပြီး ဘု​ရား​ရဲ့ မူ​တွေ၊ ပညတ်​တွေ​ကို ထည့်​စဉ်း​စား​ပါ။ ဆုံး​ဖြတ်​ချက်​ချ​တဲ့​အခါ​တိုင်း ‘ဒီ​ကိစ္စ​ဟာ ဘယ်​ကျမ်း​စာ​မူ​တွေ၊ ဘယ်​ပညတ်​တွေ​နဲ့ သက်​ဆိုင်​သလဲ။ အဲ​ဒါ​တွေ​ကို ငါ ဘယ်​လို ကျင့်​သုံး​နိုင်​သလဲ။ ဘယ်​လမ်း​စဉ်​လိုက်​ရင် ကောင်း​ကင်​ဖခင် နှစ်​သက်​မလဲ’ ဆို​ပြီး ကိုယ့်​ကိုယ်​ကိုယ် မေး​ပါ။ (ပညာ​အလိမ္မာ ၃:၅၊ ၆ နဲ့ ယာကုပ် ၁:၅ ကို​ဖတ်​ပါ။) အဲဒီ​နည်း​နဲ့ ဆုံး​ဖြတ်​ချက်​ချ​တာ​ဟာ သင့်​ရဲ့ ပိုင်း​ခြား​သိ​မြင်​နိုင်​စွမ်း​ကို ထပ်​ဆင့် လေ့ကျင့်​ပေး​နေ​တာ ဖြစ်​တယ်။ အဲဒီ​လို လေ့ကျင့်​ပေး​မယ်​ဆို​ရင်​ ရင့်​ကျက်​သူ​တစ်ဦး​အဖြစ် ဆက်​ရပ်​တည်​နိုင်​ပါ​လိမ့်​မယ်။

၁၄။ ဘု​ရား​နဲ့​ဆက်ဆံ​ရေး တိုး​တက်​ကောင်း​မွန်​နေ​ဖို့ ဘာ​ကို ဆာ​ငတ်​တဲ့​စိတ် ရှိ​ရ​မလဲ။ ဘာ​ကို​တော့ သတိ​ထား​သင့်​သလဲ။

^၁၄ ရင့်​ကျက်​တဲ့​အဖြစ်​ကို ရောက်​နိုင်​တာ​မှန်​ပေမဲ့ ဘု​ရား​နဲ့​ဆက်ဆံ​ရေး တိုး​တက်​ကောင်း​မွန်​နေ​ဖို့ အမြဲ လုပ်​ဆောင်​နေ​ရ​မယ်။ ကြီး​ထွား​ခြင်း​ဟာ အစာပေါ် မူ​တည်​တယ်။ ဒါ​ကြောင့် “မာ​တဲ့​အစာ​ကို​တော့ ရင့်​ကျက်​သူ​တွေ​ပဲ စား​တယ်” လို့ ပေါလု  ဖော်ပြတယ်။ ယုံ​ကြည်​ခြင်း ခိုင်​ခံ့​အောင် တည်​ဆောက်​ရာ​မှာ အဓိ​က​လို​အပ်​တာ​က​တော့ မာ​တဲ့​အစာ​ကို အမြဲစား​နေ​ဖို့​ပဲ။ သိ​ရှိ​လာ​တဲ့​အတိုင်း ကျင့်​သုံး​ခြင်း​ဟာ ဉာဏ်​ပညာ​ဖြစ်​တယ်။ “ဉာဏ်​ပညာ​ဟာ အရေး​ကြီး​ဆုံး​ပဲ” လို့ ကျမ်း​စာ ပြော​တယ်။ ဒါ​ကြောင့် ဘု​ရား​သခင် ကျွေး​မွေး​တဲ့ အဖိုး​တန်​အမှန်​တ​ရား​တွေ​ကို တ​ကယ်​ဆာ​ငတ်​တဲ့​စိတ် မွေး​မြူ​ဖို့ လို​တယ်။ (ပညာ​အလိမ္မာ ၄:၅-၇။ ၁ ပေတရု ၂:၂) အသိ​ပညာ၊ ဘု​ရား​ပေး​တဲ့ ဉာဏ်​ပညာ​ရှိ​လာ​တဲ့​အခါ ကိုယ့်​ကိုယ်​ကိုယ် အထင်​မကြီး​သင့်​ဘူး။ မာ​န​စိတ် ဒါ​မှ​မဟုတ် တ​ခြား​အား​နည်း​ချက်​တစ်​ခု​ခု အမြစ်​စွဲ​ပြီး မကြီး​ထွား​လာ​အောင် ကိုယ့်​ကိုယ်​ကိုယ် ပုံ​မှန်​စစ်​ဆေး​ဖို့ လို​တယ်။ “ခင်​ဗျား​တို့​ရဲ့ ယုံ​ကြည်​ခြင်း ခိုင်​မြဲနေ​မနေ အမြဲဆန်း​စစ်​ပါ။ ဘယ်​လို​လူ​စား​မျိုး ဖြစ်​နေ​တယ်​ဆို​တာ​ကို အမြဲစစ်​ဆေး​ပါ” လို့ ပေါလု ရေး​ခဲ့​တယ်။​—၂ ကော​ရိန္သု ၁၃:၅။

၁၅။ ဘု​ရား​နဲ့​ဆက်ဆံ​ရေး တိုး​တက်​ကောင်း​မွန်​ဖို့ ဘာ​ကြောင့် မေတ္တာ မရှိ​မဖြစ်​လို​အပ်​သလဲ။

^၁၅ အိမ်​တစ်​လုံး ဆောက်​ပြီး​သွား​ရင်​လည်း ဆက်​ပြု​ပြင်​မွမ်း​မံ​နေ​ရ​မယ်။ အခြေ​အနေ ပြောင်း​လဲ​သွား​လို့ တိုး​ချဲ့​ဆောက်​လုပ်​ရ​တာ​လည်း ​ရှိ​မယ်။ ကျွန်​တော်​တို့​လည်း ရင့်​ကျက်​လာ​ဖို့၊ ဘု​ရား​နဲ့​ဆက်ဆံ​ရေး ကောင်း​နေ​ဖို့ ဘာ​လုပ်​ရ​မလဲ။ အရေး​ကြီး​ဆုံး​က ချစ်​ခြင်း​မေတ္တာ ရှိ​ဖို့​ပဲ။ ယေဟောဝါ​နဲ့ ယုံ​ကြည်​သူ​ချင်း​တွေ​ကို ချစ်​တဲ့​မေတ္တာ တိုး​ပွား​နေ​ရ​မယ်။ မေတ္တာ​မရှိ​ရင် ကျွန်​တော်​တို့​ရဲ့ အသိ​ပညာ​နဲ့ လုပ်​ဆောင်​မှု​မှန်​သမျှ​ဟာ ဘာ​အကျိုး​မှ မရှိ​ဘူး၊ အချည်း​နှီး​ပဲ။ (၁ ကော​ရိန္သု ၁၃:၁-၃) မေတ္တာ​ရှိ​ရင်​ ရင့်​ကျက်​မှု ရှိ​လာ​မယ်။ ဘု​ရား​နဲ့​ဆက်ဆံ​ရေး တိုး​တက်​ကောင်း​မွန်​လာ​မယ်။

၁၆။ ဘယ်​သဘော​ထား​မျိုး​ရှိ​အောင် စာ​တန် လုပ်​ဆောင်​နေ​သလဲ။ ယေဟောဝါ​က ဘယ်​အကာ​အကွယ်​ကို ပေး​ထား​သလဲ။

^၁၆ ဆောက်​လုပ်​ရေး​လုပ်ငန်း​ရဲ့ ကဏ္ဍ​နောက်​တစ်​ခု​ကို သုံးသပ်​ကြည့်​ကြ​စို့။ ခ​ရစ်​တော်​ရဲ့ နောက်​လိုက်​စစ်​တစ်ဦး​အဖြစ် မိမိ​ကိုယ်​ကို တည်​ဆောက်​ပေး​ဖို့ သင့်​ရဲ့ စဉ်း​စား​တွေး​ခေါ်​ပုံ​ကို ဂရု​စိုက်​ရ​မယ်။ ဒီ​လော​က​ကို အစိုး​ရ​တဲ့​မင်း စာ​တန်​ဟာ လူ​တွေ​ကို အပျက်​သဘော​ရှိ​အောင်၊ အဆိုး​မြင်​အောင်၊ သံ​သယ​ဝင်​အောင်၊ စိတ်​ဓာတ်​ကျ​အောင် လုပ်​ဆောင်​ရာ​မှာ တစ်​ဖက်​ကမ်း​ခတ် ကျွမ်း​ကျင်​တယ်။ (ဧဖက် ၂:၂) မှို​ဟာ သစ်​သား​အိမ်​တစ်​လုံး​ကို ဆွေး​မြည့်​စေ​သလို အဲဒီ​သဘော​ထား​က​လည်း ခ​ရစ်​ယာန်​တစ်ဦး​ကို အန္တရာယ်​ရှိ​စေ​တယ်။ ဝမ်း​သာ​စ​ရာ​က ကျွန်​တော်​တို့​ကို ကာ​ကွယ်​ပေး​နိုင်​တဲ့၊ အရေး​ပါ​တဲ့​ မျှော်​လင့်​ချက်​ကို ယေဟောဝါ ပေး​ထား​တယ်။

၁၇။ ကျမ်း​စာ​မှာ မျှော်​လင့်​ချက်​ရဲ့ အရေး​ပါ​မှု​ကို ဘယ်​လို ဖော်ပြသလဲ။

 ^၁၇ စာ​တန်​နဲ့ ဒီ​လော​က​ကို တိုက်​လှန်​နိုင်​ဖို့ ကျွန်​တော်​တို့ ဝတ်​ဆင်​ရ​မယ့် ချပ်​ဝတ်​တန်​ဆာ အပြည့်​အစုံ​ကို ကျမ်း​စာ​မှာ ဖော်ပြတယ်။ အရေး​ပါ​တဲ့ ချပ်​ဝတ်​တန်​ဆာ​တစ်​ခု​က​တော့ “ကယ်​တင်​ခြင်း​ရ​မယ်​ဆို​တဲ့ မျှော်​လင့်​ချက်” သံ​ခ​မောက်​ဖြစ်​တယ်။ (၁ သက်သာ​လောနိတ် ၅:၈) တိုက်​ခိုက်​နေ​ချိန်​မှာ သံ​ခ​မောက် မဆောင်း​ထား​ရင် အသက်​ရှင်​နိုင်​မှာ မဟုတ်​မှန်း ကျမ်း​စာ​ခေတ်​က စစ်​သား​တစ်ဦး သိ​တယ်။ သံ​ခ​မောက်​ကို အများ​အား​ဖြင့် သံ​ထည်​နဲ့​လုပ်​ပြီး သိုး​မွေး ဒါ​မှ​မဟုတ် သား​ရေ​ဦး​ထုပ်​အပေါ် ထပ်​စွပ်​လေ့​ရှိ​တယ်။ သံ​ခ​မောက် ဆောင်း​ထား​ရင် ဦး​ခေါင်း​ကို ပစ်​ခတ်​သမျှ ပြန်​ချော်​ထွက်​သွား​တယ်။ သံ​ခ​မောက်​ဟာ ဦး​ခေါင်း​ကို ကာ​ကွယ်​ပေး​သလို မျှော်​လင့်​ချက်​ဟာ သင့်​အတွေး​အခေါ်၊ စဉ်း​စား​ပုံ​ကို ကာ​ကွယ်​ပေး​နိုင်​တယ်။

၁၈၊ ၁၉။ မျှော်​လင့်​ချက် ရှင်​သန်​နေ​အောင် ထိန်း​သိမ်း​ရာ​မှာ ယေရှု ဘယ်​လို စံ​န​မူ​နာ​ပြခဲ့​သလဲ။ ယေရှု​ကို ဘယ်​လို အတု​ယူ​နိုင်​သလဲ။

^၁၈ မျှော်​လင့်​ချက် ရှင်​သန်​နေ​အောင် ထိန်း​သိမ်း​ရာ​မှာ ယေရှု​ဟာ စံ​န​မူ​နာ​ရှင်​ပဲ။ မြေကြီး​အသက်​တာ​ရဲ့ နောက်​ဆုံး​ည​မှာ ယေရှု ဘာ​တွေ ခံ​ခဲ့ရ​တယ်​ဆို​တာ သတိ​ရ​ပါ။ ရင်း​နှီး​တဲ့​မိတ်ဆွေ​တစ်ဦး​က ငွေ​ရ​ဖို့ ယေရှု​ကို သစ္စာ​ဖောက်​ခဲ့​တယ်။ နောက်​တစ်ဦး​က ယေရှု​ကို မသိ​ပါ​ဘူး​ဆို​ပြီး ငြင်း​ပယ်​ခဲ့​တယ်။ တ​ချို့​က​တော့ ယေရှု​ကို စွန့်​ပြီး ထွက်​ပြေး​သွား​တယ်။ တစ်​နိုင်​ငံ​တည်း​သား​တွေ​က ယေရှု​ကို ငြင်း​ပယ်​ပြီး ရော​မစစ်​သား​တွေ​ရဲ့ လက်​ချက်​နဲ့ ညှဉ်း​ဆဲ၊ သတ်​ပစ်​ဖို့ တောင်း​ဆို​ခဲ့​တယ်။ ယေရှု ကြုံခဲ့​ရ​တဲ့ စမ်း​သပ်​မှု​တွေ​ဟာ ကျွန်​တော်​တို့​ ကြုံ​ဖူး​သမျှ​ထက် ပို​ပြင်း​ထန်​တယ်​လို့​ဆို​ရင် မမှား​နိုင်​ဘူး။ ခံ​ရပ်​နိုင်​အောင် ယေရှု​ကို ဘာ​က ကူညီ​ပေး​ခဲ့​သလဲ။ “ရှေ့​မှာ​ရှိ​တဲ့ ဝမ်း​မြောက်​စ​ရာ​အကြောင်း​ကြောင့် အရှက်​ခွဲ​ခံ​ရ​တာ​ကို အရေး​မစိုက်​ဘဲ ဒုက္ခ​သစ်​တိုင်​ပေါ်​မှာ အသေခံ​ခဲ့​တယ်။ အခု ဘု​ရား​သခင့် ရာ​ဇ​ပလ္လင်​ရဲ့ ညာ​ဘက်​မှာ ထိုင်​နေ​တယ်” လို့ ဟီ​ဘ​ရူး ၁၂:၂ က အဖြေပေး​တယ်။ ယေရှု​ဟာ “ရှေ့​မှာ​ရှိ​တဲ့ ဝမ်း​မြောက်​စ​ရာ​အကြောင်း” ကို ဘယ်​တော့​မှ မျက်​ခြည်​မပြတ်​ခဲ့​ဘူး။

^၁၉ ယေရှု​ရှေ့​မှာ ဘာ​ဝမ်း​မြောက်​စ​ရာ​အကြောင်း ရှိ​ခဲ့​သလဲ။ ခံ​နိုင်​ရည်​ရှိ​မယ်​ဆို​ရင် ယေဟောဝါ​ရဲ့ နာ​မည်​ကို သန့်​ရှင်း​မြင့်​မြတ်​စေ​မယ်၊ စာ​တန်​ဟာ မု​သာ​ကောင်​ဖြစ်​ကြောင်း အခိုင်လုံဆုံး​ သက်​သေပြနိုင်​မယ်​ဆို​တာ ယေရှု သိ​တယ်။ အဲဒီ​မျှော်​လင့်​ချက်​ထက် ယေရှု​ကို ပို​ဝမ်း​မြောက်​စေ​တဲ့​အရာ မရှိ​ဘူး။ မိမိ​ရဲ့​ သစ္စာ​ရှိ​လမ်း​စဉ်​ ကို ယေဟောဝါ ကြွယ်​ဝ​စွာ ကောင်း​ချီး​ပေး​မယ်၊ မကြာ​ခင် ဖခင်​နဲ့ ပြန်​ဆုံ​စည်း​ရ​တော့​မယ် ဆို​တာ​ကို​လည်း သူ သိ​ထား​တယ်။ အခက်​ခဲ​ဆုံး​အချိန် တစ်​လျှောက်​လုံး​မှာ​တောင် ဒီ​ဝမ်း​မြောက်​စ​ရာ မျှော်​လင့်​ချက်​ကို သူ အာ​ရုံ​စိုက်​ခဲ့​တယ်။ ကျွန်​တော်​တို့​လည်း အဲဒီ​လို လုပ်​ရ​မယ်။ ကျွန်​တော်​တို့​ရှေ့​မှာ​လည်း ဝမ်း​မြောက်​စ​ရာ​အကြောင်း ရှိ​တယ်။ ယေဟောဝါ​ဟာ မိမိ​ရဲ့ နာ​မည် သန့်​ရှင်း​မြင့်​မြတ်​စေ​ဖို့ လုပ်​ဆောင်​ရာ​မှာ ကျွန်​တော်​တို့​ တစ်ဦး​ချင်း​စီ​ကို ပါ​ဝင်​ခွင့်​ပေး​ထား​ပြီး ဂုဏ်​တင်​တယ်။ ဘယ်​လို​အခက်​အခဲ၊ သွေး​ဆောင်​မှု​တွေ ကြုံ​ရ​ပါ​စေ ယေဟောဝါ​ကို အချုပ်​အခြာ​အာ​ဏာ​ပိုင်​ရှင်​အဖြစ် ရွေး​ချယ်​မယ်၊ ဘု​ရား​ရဲ့​မေတ္တာ ခံစား​ရ​စေ​မယ့်​အရာ​တွေ​ကို အမြဲလုပ်​ဆောင်​မယ်​ဆို​ရင် စာ​တန်​ကို မု​သာ​ကောင်​အဖြစ် သက်​သေပြနိုင်​တယ်။

၂၀။ အပြု​သဘော​ပါ​တဲ့ အတွေး​အခေါ်​နဲ့ မျှော်​လင့်​ချက်​ရှိ​စေ​ဖို့ ဘာ​က ကူညီ​ပေး​နိုင်​သလဲ။

^၂၀ ယေဟောဝါ​ဟာ မိမိ​ရဲ့​သစ္စာ​ရှိ​ကျေး​ကျွန်​တွေ​ကို ဆု​ပေး​ချင်​ရုံ​သာ​မက ဆု​ပေး​ချင်​စိတ် အလွန်​ပြင်း​ပြတယ်။ (ဟေ​ရှာ​ယ ၃၀:၁၈။ မာလခိ ၃:၁၀ ကို​ဖတ်​ပါ။) မိမိ​ကျေး​ကျွန်​တွေ​ရဲ့ မှန်​ကန်​တဲ့ အလို​ဆန္ဒ​တွေ​ကို ဖြည့်​ဆည်း​ပေး​ချင်​တယ်။ (ဆာလံ ၃၇:၄) ဒါ​ကြောင့် ရှေ့​မှာ​ရှိ​တဲ့ မျှော်​လင့်​ချက်​ကို စွဲ​စွဲ​မြဲမြဲ အာ​ရုံ​စူး​စိုက်​ပါ။ စာ​တန့်​စ​နစ်​ဟောင်း​ရဲ့ အပျက်​သဘော​ဆန်​တဲ့၊ ယုတ်​ညံ့​တဲ့၊ ဖောက်​ပြန်​တဲ့​အတွေး​အခေါ်​မျိုး ဘယ်​တော့​မှ ဝင်​ခွင့်​မပြု​ပါ​နဲ့။ လော​က​စိတ်​ဓာတ် စိမ့်​ဝင်​လာ​တာ​ကို ရိပ်​မိ​ရင် “လူ့​ဉာဏ်​နဲ့​မမီ​နိုင်​တဲ့ ဘု​ရား​သခင့်​ငြိမ်သက်​ခြင်း” ရ​ဖို့ ယေဟောဝါ​ဆီ လှိုက်​လှိုက်​လှဲ​လှဲ ဆုတောင်း​ပါ။ ဘု​ရား​ပေး​ငြိမ်သက်​ခြင်း​ဟာ သင့်​စိတ်​နှလုံး​နဲ့ ဉာဏ်​စွမ်း​ကို စောင့်​ရှောက်​ပါ​လိမ့်​မယ်။​—ဖိ​လိပ္ပိ ၄:၆၊ ၇။

၂၁၊ ၂၂။ (က) “လူ​အုပ်​ကြီး” မှာ အလွန်​ကောင်း​တဲ့ ဘယ်​မျှော်​လင့်​ချက် ရှိ​သလဲ။ (ခ) ခ​ရစ်​ယာန်​မျှော်​လင့်​ချက်​ထဲ​က ဘယ်​တစ်​ခု​ကို သင် အနှစ်​သက်​ဆုံး​လဲ။ ဘာ​လုပ်​ဖို့ သင် ဆုံး​ဖြတ်​ထား​သလဲ။

 ^၂၁ သင့်​မှာ အလွန်​ကောင်း​တဲ့ မျှော်​လင့်​ချက် ရှိ​ထား​တယ်။ သင်​ဟာ “ကြီး​စွာ​သော​ဒုက္ခ​က​နေ လွတ်​မြောက်​လာ” မယ့် “လူ​အုပ်​ကြီး” အဝင် ဖြစ်​မယ်​ဆို​ရင် မကြာ​ခင် ရ​တော့​မယ့် အသက်​တာ​အကြောင်း စဉ်း​စား​ကြည့်​ပါ။ (ဗျာဒိတ် ၇:၉၊ ၁၄) စာ​တန်​နဲ့ နတ်​ဆိုး​တွေ မရှိ​တော့​တဲ့​အခါ သင့်​ဉာဏ်​နဲ့​မမီ​နိုင်​တဲ့ စိတ်​သက်​သာ​မှု​မျိုး​ကို ခံစား​ရ​မယ်။ တကယ်​ဆို​ရင် စာ​တန်​ရဲ့ ဖောက်​ပြန်​တဲ့ သြဇာ​လွှမ်း​မိုး​မှု​နဲ့ လွတ်​ကင်း​တဲ့ ဘဝ​မျိုး ကျွန်​တော်​တို့​တစ်​ယောက်​မှ​ မကြုံ​ဖူး​ဘူး။ အဲဒီ​သြဇာ​လွှမ်း​မိုး​မှု မရှိ​တော့​တဲ့​အခါ ကောင်း​ကင်​မှာ ယေရှု​နဲ့ ၁၄၄,၀၀၀ တို့​ရဲ့ ညွှန်​ကြား​မှု​အောက် ကမ္ဘာ​မြေကြီး​ကို ပရ​ဒိ​သု​အဖြစ် ပြောင်း​လဲ​ခွင့်​ရ​တာ ဘယ်​လောက် ဝမ်း​သာ​စ​ရာ​ကောင်း​လိုက်​မလဲ။ ဖျား​နာ​မှု၊ မသန်​စွမ်း​မှု​မှန်​သမျှ မရှိ​တော့​မယ့်​အချိန်၊ ချစ်​ရ​သူ​တွေ​ကို သင်္ချိုင်း​မှာ ကြို​ဆို​ရ​မယ့်​အချိန်၊ ဘု​ရား​အသက်​ရှင်​စေ​ချင်​တဲ့​အတိုင်း အသက်​ရှင်​ရ​မယ့်​အချိန်​ကို စောင့်​မျှော်​ရ​တာ ပီ​တိ​ဖြစ်​စ​ရာ​ပဲ။ ကျွန်​တော်​တို့ စုံလင်​လာ​တာ​နဲ့​အမျှ ပို​ကြီး​မား​တဲ့ ဆု​ကျေး​ဇူး​ရ​ဖို့ နီး​သည်​ထက် နီး​လာ​မယ်။ အဲဒီ​ဆု​ကျေး​ဇူး​က​တော့ ရော​မ ၈:၂၁ မှာ ကတိ​ပြု​ထား​တဲ့ “ဘု​ရား​သခင့် သား​သမီး​တွေ​ရဲ့ ဘုန်း​အသရေ​နဲ့​ပြည့်​စုံ​တဲ့ လွတ်​လပ်​မှု” ဖြစ်​တယ်။

^၂၂ ယေဟောဝါ​ဟာ သင် စိတ်​ကူး​လို့ ရ​နိုင်​တာ​ထက် သာ​လွန်​တဲ့ လွတ်​လပ်​မှု​မျိုး ရ​စေ​ချင်​တယ်။ အဲဒီ​လွတ်​လပ်​မှု​မျိုး ရ​နိုင်​ဖို့ နာ​ခံ​မှု ရှိ​ရ​မယ်။ အခု​က​စ​ပြီး နေ့​တိုင်း ယေဟောဝါ​ကို နာ​ခံ​မှု​ပြဖို့ အစွမ်း​ကုန် ကြိုး​စား​သင့်​တယ် မဟုတ်​လား။ ဒါ​ကြောင့် သင်​ဟာ ဘု​ရား​ရဲ့​မေတ္တာ​ကို အစဉ်​ထာ​ဝ​ရ ခံစား​ရ​ဖို့ အသန့်​ရှင်း​ဆုံး ယုံ​ကြည်​ခြင်း​ကို ခိုင်​ခံ့​အောင် ဆက်​တည်​ဆောက်​သွား​ပါ။