1 Samweli 11:1-15
11 Lyene Nahashi Umwina Amoni+ wizile nu kupanga inkambi ku kulwa na Ina Yabeshi+ amu Gilyadi. Aonsi yonsi amu Yabeshi yanenyile Nahashi iyati: “Pangana naswe upangano, naswe tulakuombela.”
2 Nahashi Umwina Amoni wayaswike ati: “Nimapangana sile namwe ndi cakuti mwazumila ukumutonkola manso akwi lunji. Namacita vii pakuti nzewanye Aina Izlaeli yonsi.”
3 Akalamba ya mu Yabeshi yamwaswike iyati: “Tupeele manda 7 pakuti tutume aakuyanena antu mu mpanga yonsi iya Izlaeli. Ndi cakuti kusi uwa kutupususha, tulacimba.”
4 Lino papisile insita, yano yatumile yafisile umu Gibeya+ muno mwikalanga Saulo nu kulanda amazwi yaa ala na antu yonsi yakuvwako nupya antu yonsi yatandike ukulila ala yakupunda.
5 Nomba Saulo wafumanga umu mpanga umu kucema ing’ombe, nupya Saulo uzizye ati: “I cani icikucitika uku yantu? U mulandu ci uno yakulilila?” Fwandi yamunenyile amazwi yano Aina Yabeshi yatumile.
6 Umupasi wakwe Leza wizile pali Saulo+ lino uvwile amazwi yayo nupya wasosile sana.
7 Fwandi watozile ing’ombe ziili nu kuziputula umu vimpilinsha nupya watumile antu akutwala umu mpanga yonsi iya Izlaeli nu kulanda iyati: “Wensi aasikulondela Saulo na Samweli alinzile ukwenekela vii ukucitika uku ng’ombe zyakwe!” Nupya Yeova walenzile antu ukuya ni ntete nu mucinzi, na cico calenzile yaombele pamwi.
8 Lyene wayapenzile umu Bezeki nupya Aina Izlaeli yaali 300,000 na aonsi aa Yuda yaali 30,000.
9 Nupya yanenyile aatumilwe iyati: “Vii avino muye mukanene aonsi Aina Yabeshi amu Gilyadi, muti, ‘Mutondo nga kwakaya, mulapusuka.’ ” Lyene yano yatumile yaile nu kuyanena aonsi Aina Yabeshi nupya Aina Yabeshi yasansamwike sana.
10 Lyene aonsi Aina Yabeshi yatiile: “Mutondo tuliza kuli mwemwe, nupya muce mutucite ivili vyonsi vino mwatemwa.”+
11 Uwanda uwalondelilepo Saulo wankinye antu mu maumba yatatu, nupya ingile umu nkambi ya Ina Amoni+ ku macaca nu kuyayakomoola ukufikila lino kwakaya. Aapuswike yasalangine icakuti kutaali autukile pamwi yaili.
12 Lyene antu yanenyile Samweli iyati: “Aaweni aalandanga ukuti, ‘Saulo atanga aye umwene witu?’+ Yaletini kuno tuyakome.”
13 Nomba Saulo walanzile ati: “Kusi umuntu alinzile ukukomwa ilelo,+ pano Yeova watapususha Aina Izlaeli.”
14 Pa cisila Samweli wanenyile antu ukuti: “Twapiteni uku Giligali+ pakuti nupya kwene tukalande ukuti Saulo u mwene.”+
15 Fwandi antu yonsi yaile uku Giligali nupya yaile iika Saulo pa wene pa nkoleelo yakwe Yeova. Lyene yapeezile malambo ya mutende pa nkoleelo yakwe Yeova,+ nupya Saulo na Ina Izlaeli yonsi yazevizye ni nsansa.+
