1 Samweli 1:1-28
1 Kwali umonsi umwi uwa ku Lamataimu-zofimu+ uwikalanga umu ncende ya myamba yakwe Efulemu,+ izina lyakwe wali a Elikana+ mwana Yeloamu, mwana Eliu, mwana Tohu, mwana Zufi Umwina Efulemu.
2 Wakweti ya mama yaili; wenga wali a Hana muze nawe wali a Penina. Penina wakweti ana, lelo Hana wene ataakweti.
3 Cila mwaka Elikana wafumanga umu musumba uno wikalangamo nu kuya umu kupepa nu kupeela malambo kuli Yeova Leza wa maumba mu Shilo.+ Kuuku kwene akuno ya mwana Eli yaili, kuli kuti Hofini na Finiasi+ yaombelanga Yeova+ umulimo wa usimapepo.
4 Wanda umwi lino Elikana wapeezile ilambo, wapeezile iviputulwa vimwi vya nyama kuli Penina mamakwe nu ku yana yakwe yonsi alumendo na akazyana,+
5 lelo wapeezile Hana iciputulwa ca nyama icisuma sana pano awino watemilwe; nomba Yeova ataamupeezile ana.
6 Lelo Penina watumfyanga sana Hana pakuti amusoshe pa mulandu wakuti Yeova ataamupeezile ana.
7 Vikwene avino Penina wacitanga cila mwaka; lyonsi lino Hana waya uku ng’anda yakwe Yeova,+ wamutumfyanga sana icakuti Hana atandika ukulila afilwa nu kulya.
8 Lelo Elikana iya, wamuzizye ati: “Hana u mulandu ci uno ukulilila, nupya u mulandu ci uno usikuliila ivyakulya? I cani caticilenga uye sana nu ulanda? Uzye ntacindama kuli wewe ukucila ana aonsi 10?”
9 Pa cisila cakuti yamala ukulya nu kumwa umu Shilo, Hana wakatwike nu kufumapo. Pa nsita iiyo, ala Eli wataikala pa cilimba icayelile apiipi nu mulyango wi tempele*+ lyakwe Yeova.
10 Hana wali sana nu ulanda nupya watandike ukupepa kuli Yeova+ nu kulila sana.
11 Nupya walafile umulapo ati: “We Yeova wa maumba ndi cakuti walolekesha pa ucuzi wane ne muomvi wako nu kunjiusha nupya utanjilile wampeela nu mwana umonsi,+ ndamupeela kuli wewe we Yeova amanda ya umi wakwe yonsi, nupya atalatala apelwe inyele.”+
12 Lino Hana wapepanga kuli Yeova pa nsita itali, Eli wamulolekeshanga pa kanwa.
13 Hana walandilanga umu mwenzo, imilomo sile iyatenkananga, lelo izwi lituvwikanga. Fwandi Eli welenginye ukuti watakoleka.
14 Eli wamunenyile ati: “Uzye umatwalilila ukuya umukoleke ukufika lilaci? Pitanga tale ukakololoke.”
15 Hana waswike ati: “Awe ntamwile waini nanti ivili vyonsi ivikolineko, lelo indi sana nu ulanda nupya nkupepa kuli Yeova+ pakuti imunene vyonsi ivyativilenga ukuti inje nu ulanda.
16 Mutelenganya ukuti muomvi winu umwanaci u muwelewele, pano kufuma pano ntandikile ukupepa, nkulanda sile pali vino ivindenga ukuya nu ulanda na pali vino vikuncuzya.”
17 Lyene Eli wamunenyile ati: “Pitanga umutende, nupya si Leza wa Ina Izlaeli akupeele vino watumulenga.”+
18 Hana watiile: “Si lyonsi mwaelenganya ivisuma pali nene.” Lyene wapisile ayalya nupya atatwalilile ukuya nu ulanda.
19 Yakatwike katondotondo nu kupepa kuli Yeova, lyene yaswilile ukumwao uku Lama.+ Elikana wapanzile icupo na mamakwe Hana nupya Yeova wamwiwishe.+
20 Lino umwaka utatala wasila Hana wakweti inda nupya wizile akwata umwana umonsi wino watemiile+ ukuti Samweli,* pa mulandu na vino walanzile ukuti, “namulenzile kuli Yeova.”
21 Lino papisile insita Elikana na amu ng’anda yakwe yaile umu kupeela ilambo lya pa mwaka kuli Yeova+ nu kupeela ilambo lya pa mulapo.
22 Lelo Hana wene washazile,+ wanenyile iya ati: “Ndi cakuti umwana waleka sile ukonka, ndamutwala uku Shilo; lyene alalolekela kuli Yeova nupya alatwalilila ukwikala kuuku kwene.”+
23 Elikana iya, wamunenyile ati: “Cita vino ukulola ukuti vili ningo. Ikala pa ng’anda kufikila lino ulamulesha ukonka. Si Yeova afikilizye vino walanda.” Fwandi Hana wikazile pa ng’anda nu kutwalilila ukusakamala umwanakwe kufika lino wamulesizye ukonka.
24 Lino wamulesizye sile ukonka, wamutwazile uku Shilo, pamwi na cipambasi wa myaka itatu, efa* wenga wakwe fulaulo, ni nsembo ikulu yakwe waini,+ wafisile uku ng’anda yakwe Yeova uku Shilo+ ala ali nu mwana.
25 Lyene yakomile cipambasi nu kutwala umulumendo kuli Eli.
26 Lyene Hana watiile: “Nkulapa! Nene mwanaci uwimilile namwe pa ncende yii uwapepanga kuli Yeova.+
27 Umwana wii awino napepelangapo, nupya Yeova wampeela vino namulenzile.+
28 Nupya nani, imupeela* kuli Yeova. Imupeela kuli Yeova umi wakwe onsi.”
Nupya wapefile* kuli Yeova.
