Dwoko ma Muma chiwo

 Mondo wang’e ni piny biro rumo karang’o, dwarore ni wang’e kaka Muma tiyo gi wach mar “piny.” Wach motigo e dho Grik ni koʹsmos, ma kinde mang’eny ilokoga ni “piny”, kinde mang’eny itiyogago kiwuoyo kuom dhano to ahinya ahinya joma ok tim dwach Nyasaye. (Johana 15:18, 19; 2 Petro 2:5) Kinde moko, koʹsmos itiyogo kiwuoyo kuom dhano ma ok tim dwach Nyasaye kaachiel giriwruoge mag ohala, siasa, kod dinde ma tayogi.​—1 Jo-Korintho 7:31; 1 Johana 2:15, 16. a

“Giko piny” en ang’o?

 Weche mitiyogago ni “giko piny” ma yudore e loko mang’eny mag Muma, bende inyalo lok ni “giko mar ndalo.” (Mathayo 24:3) Wechego ok wuo e wi kethruok mar piny kata mar dhano duto, kar mano owuoyo e wi giko mar dhano ma ok tim dwach Nyasaye kaachiel giriwruoge mag ohala, siasa, kod dinde ma tayogi.​—1 Johana 2:17.

 Muma puonjo ni “ibiro tiek jo maricho” mondo joma beyo odag gi mor e piny. (Zaburi 37:9-11) Kethruogni biro timore e “masira maduong’,” kendo masirano ema biro kelo lweny mar Har–Magedon.​—Mathayo 24:21, 22; Fweny 16:14, 16.

Piny biro rumo karang’o?

 Yesu nowacho niya: “Chieng’no kod sano, onge ng’at mong’eyo, kata malaike manie polo kata Wuod Nyasaye, to mana Wuora.” (Mathayo 24:36, 42) Nomedo wacho ni giko ne dhi biro apoya, ‘e sa ma ok wapar ni e en.’​—Mathayo 24:44.

 Kata obedo ni ok wanyal ng’eyo odiechieng’ sie kod sa, Yesu nochiwo “ranyisi” kata gik mopogore opogore ma ne dhi timore kendo ma ne dhi konyowa fwenyo ni wadak e kinde ma giko piny chiegni. (Mathayo 24:3, 7-14) Muma luongo kindeno ni “kinde giko” kod “ndalo mag giko.”​—Daniel 12:4; 2 Timotheo 3:1-5.

Be nitie gima biro dong’ bang giko piny?

 Ee. Pinywani biro dong’ nikech Muma wacho ni “piny ok bi yiengni nyaka chieng’.” (Zaburi 104:5) Kendo piny biro pong’ gi ji mana kaka Muma ne osesingo niya: “Jo makare nobed weg piny, kendo ginidagie nyaka chieng’.” (Zaburi 37:29) Nyasaye biro kelo gik mabeyo ma ne osingo chon ma gin:

•   Paradiso.​—Isaya 35:1; Luka 23:43.

•   Arita kod ngima maber.​—Mika 4:4.

•   Tije mabeyo kendo ma moro ji duto.​—Isaya 65:21-23.

•   Ngima ma onge tuoche kod bedo moti.​—Ayub 33:25; Isaya 33:24.