GIK MA JI WACHO: “Nikech Nyasaye e ma locho e wi piny, en e ma okelo masiche kendo mano nyiso ni oonge hera.”

GIMA MUMA WACHO: “Piny duto obedo e teko mar Ng’a Marachno.” (1 Johana 5:19) “Ng’a marachno” en ng’a? Muma luonge ni Satan. (Mathayo 13:19; Mariko 4:15) Be iparo ni mano en wach ma tek yiego? Par ane wachni: Nikech Satan e ma nigi teko e wi pinyni, en e ma omiyo dhano bedo joma paro mana makorgi kende, joguondo, koda joma ok par rach ma timbegi nyalo kelo kinde mabiro. Donge mano nyiso gimomiyo dhano ketho piny ahinya? Josomo goyo milome ni nikech dhano ok rit pinyni, gimiyo masiche maok nyal geng’ kaka yiengni piny, oro molandore, gi masiche ma kamago obedie. Timbe dhano samoro kelo masiche ma kamago, kata miyo masichego oketh kama duong’ moloyo, kata gihiny ji mang’eny kayiem.

To kare ang’o momiyo Nyasaye oweyo mondo Satan obed gi teko mang’eny kamano? Dwoko mar penjono nyalo mana yudore ka wadok e kar chwech dhano, kinde ma ne jonyuolwa mokwongo ong’anjo ne loch mar Nyasaye. Thoth dhano oseluwogi e ng’anjono. Nikech ne giyiero kwedo loch mar Nyasaye, ne giketo oganda dhano e lwet jasik Nyasaye ma en Satan. Mano e momiyo Yesu ne oluongo Satan ni jaloch kata “jaduong’ mar pinyni.” (Johana 14:30) Be Satan biro locho nyaka chieng’? Ooyo!

Jehova * ok mor kata matin gi chandruok ma Satan kelo ne dhano. Kuom ranyisi, kane oganda Jo-Israel chandore, Muma wacho kama e wi Nyasaye: “Weche duto ma nothagogi en bende ne githage.” (Isaiah 63:9) Nikech Nyasaye en ng’at mang’won, en gi chenro mar tieko loch mar Satan machiegni! Oseketo Wuode Yesu Kristo, obed Ruoth makare nyaka chieng’.

KAKA WACHNI OMAKI: Kata obedo ni loch mar Satan ok osegeng’o ne ji masiche, loch mar Yesu to biro timo kamano. Kinde moro Yesu ne okawo okang’ mar reso jolupne kane nitie apaka mager. Muma wacho niya: ‘Nokwero yamo, kowacho ni nam niya, “Ling’! Pie!” Eka yamo nogik, mokue thi.’ Jopuonjrene nowacho ni: “To ng’atni en ng’a manadi, ma kata yamo gi nam winje?” (Mariko 4:37-41) Gima notimoreno miyo wabedo gadier ni Yesu biro rito oganda dhano moluoro Nyasaye e kinde mobiro lochoe kaka Ruoth.—Daniel 7:13, 14.