DON ma en Janeno mar Jehova modak Canada timoga kinda mondo olendne joma onge mier ma odak e nderni e taon. Don wacho kama e wi achiel kuom joma kamago ma ne oromogo: “Ng’atno ne iluongo ni Peter, to en e ma nochido moloyo ji duto ma ne nie ndernigo. Nodung’ matamre gi nono kendo ne en gi tim mar geng’o ji kik sud bute. Kinde mang’eny ne otamore goyiem gik ma ji ne konyego.” Kata kamano, kuom higni mokalo 14, Don notemo kar monyalo mondo okonye.

Chieng’ moro Peter nopenjo Don kama: “Ang’o momiyo ichandori koda kama? Ji te osewere koda. Ang’o momiyo idewa kama?” Don notiyo gi ndiko adek e yo ma riek mondo ojiwgo Peter. Mokwongo, ne openjo Peter ka be ong’eyo nying Nyasaye, kae to onyise ni osom nyingno achiel ka achiel e ndiko mar Zaburi 83:18. Bang’ mano, mondo Don onyis Peter gimomiyo nodewe kamano, nokwaye mondo osom Jo-Rumi 10:13, 14, ma wacho ni “ng’ato ka ng’ato ma luongo nying Jehova ibiro rese.” Gikone, Don nosomo Mathayo 9:36 kae to onyiso Peter bende mondo osome owuon. Ndikono wacho kama: “Ka [Yesu] noneno oganda, nokechogi nikech ne gihinyore kendo ne gidiwo mana ka rombe ma onge jakwath.” Peter nopenjo Don kama ka pi wang’e rengni: “Be an achiel kuom rombego?”

Peter nochako timo dongruok. Noluokore, nobuso tike maber, kae to orwako lewni maler ma Don nomiye. Peter nodhi nyime bedo maler kamano.

Peter ne nigi buk moro ma ondike wechene. Ka ne pok oromo gi Don, weche ma nondiko e bugno nyiso ni ngimane ne nigi kuyo kod lit. Kata kamano, weche ma nondiko mogik ogik e bugeno nyiso ni ngimane ne opogore. Achiel kuom weche ma nondiko wacho kama: “Kawuono apuonjora nying Nyasaye. Sani koro anyalo lemo ka awuoyo gi Jehova. En gima ber ng’eyo nying Nyasaye.  Don nonyisa ni Jehova nyalo bedo osiepna. Nowacho ni Jehova en osiep ma oikore winja sa asaya, bed ni an kanye kata bed ni ang’o ma timore.”

Weche mogik ma Peter nondiko, nondiko ne nyithindgi. Nowacho kama:

“Kawuono awinjo ka atuwo. Aparo ni asebedo moti. Kata kapo ni atho kawuono, ang’eyo ni abiro neno osiepna [Don] e Paradiso. Sama usomo wechegi, biro yudo ka asetho. Kata kamano, ka uneno ng’at moro ma ok watwa ka obiro e lienda, wuoru kode kendo usom buk ma rambuluni [buk mipunjogo ji Muma miluongo ni “Adiera Materi e Ngima Mochwere” ma Don nomiye higni moko mosekalo]. * Bugno wacho ni abiro nena osiepnano kendo e Paradiso. Ayie gi wachno gi chunya duto. An owadu ma ugeno, Peter.”

Nyamin Peter miluongo ni Ummi nowacho kama ka noseik Peter: “Ne wawuoyo gi Peter higni ma dirom ariyo mosekalo. Mano e kinde ma ne ahango winjoe komor matek bang’ higni mang’eny. Ne obuonjo abuonja.” Ummi nonyiso Don kama: “Abiro somo bugno nikech gimoro amora ma nyalo moro owadwa nyaka bed gima kende ahinya.” Ummi bende noyie puonjore Muma kotiyo gi buk ma sani Joneno mag Jehova puonjogo ji miluongo ni Ang’o ma Muma Puonjo Kuom Adier?

Wan bende ok onego wang’i mana kaka ji chalo gi oko, kar mano onego wanyis ni waherogi gadier kendo onego wahore gi ji duto. (1 Tim. 2:3, 4) Ka watimo kamano, wanyalo konyo ji mang’eny ma chunygi oikore rwako wach mana kaka Peter kata obedo ni gilil. Wan gadier ni Nyasaye ma ‘ng’iyo chuny’ ji biro miyo adiera odong e chuny joma orwako wach.—1 Sa. 16:7; Joh. 6:44.