SULA MAR 49

Ere Kaka Joot Nyalo Bedo Mamor?—Kare Mokwongo

TUGE

Joma eka oa kendore genoga ni mor ma gin-go chieng’ arusgi biro siko nyaka chieng’. To mano en gima nyalore. Jokristo ma osedak e kend kuom higni mang’eny kendo ma osetemo matek mondo giti gi puonj mag Muma, ong’eyo ni mano en gima nyalore.

1. Muma nyisowa ni chwo onego otim ang’o?

Jehova osemiyo dichwo ting’ mar tayo joode. (Som Jo-Efeso 5:23.) Odwaro ni dichwo otim yiero ma biro konyo joode. Muma nyiso chwo niya: “Dhiuru nyime hero mondeu.” (Jo-Efeso 5:25) Mano tiende ang’o? Dichwo mohero chiege timone gik mabeyo sama gin e ot kata sama gin gi jomamoko. Orite maber mondo kik gimoro ohinye, kendo otemo matek mondo omiye gik mochuno ma onyalo dwaro e ngima. (1 Timotheo 5:8) To maduong’ie moloyo, okonye mondo obed gi winjruok maber gi Jehova. (Mathayo 4:4) Kuom ranyisi, onyalo lemo kendo somo Muma kanyachiel gi jaode. Sama dichwo rito jaode e yo maber, en bende osiko ka en gi winjruok maber gi Jehova.—Som 1 Petro 3:7.

2. Muma nyisowa ni mon onego otim ang’o?

Muma wacho ni dhako “onego omi chwore luor matut.” (Jo-Efeso 5:33) Onyalo timo kamano nade? Onyalo paro matut kuom kido mabeyo ma jaode nigo kod kinda motimo mondo orite kaachiel gi nyithindgi. Bende, onyalo nyiso ni omiyo jaode luor koriwo lwedo paro mong’ado, kowuoyo kode e yo mang’won, kendo kowuoyo maber kuome kata ka ok olam Jehova.

3. Ere kaka joma okendore nyalo tego kend margi?

Muma wacho kama e wi joma okendore: “Ji ariyogo nobed ringruok achiel.” (Mathayo 19:5) Mano nyiso ni nyaka giked matek gi gimoro amora ma nyalo pogogi. Gitimo kamano ka gibudho kanyachiel nyading’eny kendo ka ng’ato ka ng’ato ni thuolo nyiso nyawadgi kaka owinjo kod kaka oparo. Ok giwe gimoro amora kata ng’ato ang’ata obed motelo e ngimagi mak mana Jehova. Gibedo motang’ ahinya mondo kik gimilre gi jomamoko e yor kisera.

TIM NONRO

Non ane puonj mag Muma ma nyalo tego kend maru.

4. Un chwo, heruru mondeu kendo uritgi maber

Muma wacho ni “chwo onego oher mondegi kaka gihero ringregi giwegi.” (Jo-Efeso 5:28, 29) Mano tiende ang’o? Tug VIDIO, kae to uwuo e wi penjo ma luwo.

VIDIO: Un Chwo, Heruru Mondeu Kaka Uheroru Uwegi (9:53)

Gin yore mage ma dichwo nyalo nyisogo ni ohero chiege kendo orite maber?

Som Jo-Kolosai 3:12, kae to uwuo e wi penjo ma luwoni:

Ere kaka dichwo nyalo nyiso kido monyis e ndikono e kend mare?

5. Un mon, heruru chwou kendo umigi luor

Muma jiwo joma mon mondo omi chwogi luor, bed ni chwogi lamo Jehova kata ooyo. Som 1 Petro 3:1, 2, kae to uwuo e wi penjo ma luwogi:

Ka chwori ok lam Jehova, onge kiawa ni igombo mondo ochak timo kamano. Iparo ni en yo mane maber ma nyalo konye? Lendone kinde duto koso bedo gi timbe mabeyo kendo miye luor? Ang’o momiyo iwacho kamano?

Joma okendore nyalo ng’ado paro mabeyo kanyachiel. To nitie seche moko ma dhako nyaloga bedo gi paro mopogore gi mar jaode. Kata kamano, onyalo wacho pache e yo ma nyiso luor, kong’eyo ni Jehova omiyo jaode ting’ mar yiero gik ma biro konyo joode. Onego otim kinda mondo oriw lwedo paro ma chwore ong’ado. Kotimo kamano, obiro konyo joode duto obed mamor. Som 1 Petro 3:3-5, kae to uwuo e wi penjo ma luwoni:

Jehova neno nade mon ma miyo chwogi luor?

6. Inyalo loyo chandruoge manie kend maru

Onge kend ma onge gi chandruok. Omiyo, joma okendore nyaka ti kanyachiel mondo gilo chandruoge ma giromogo e kend margi. Tug VIDIO, kae to uwuo e wi penjo ma luwo.

VIDIO: Kaka Joma Okendore Nyalo Tego Kend Margi (5:44)

E vidiono, gin gik mage ma nyiso ni joma okendorego ne onge gi winjruok maber e kindgi?
Ne gikawo okenge mage mondo giteg kend margi?

Som 1 Jo-Korintho 10:24 kod Jo-Kolosai 3:13. Bang’ somo ndiko ka ndiko, wuouru e wi penjo ma luwoni:

Ere kaka tiyo gi puonj manie ndikono nyalo miyo kend obed motegno?

Muma wacho ni onego wami jomamoko duong’. Miyo ng’ato duong’ oriwo bedo mang’won kode kendo miye luor. Som Jo-Rumi 12:10, kae to uwuo e wi penjo ma luwogi: