Kopano ni Musebezi wa Bona wa mwa Lifasi Kamukana

KU NA ni likalulo li sikai ze itusiswa mwa ku zamaisa musebezi wa ku kutaza mwa linaha ze fitelela 230 mo u sweli ku eziwa. Ketelelo ya musebezi ote i zwelela kwa Sitopa se si Busa se si kwa sibaka se situna sa tamaiso ya mwa lifasi kwa Brooklyn, mwa New York. Sitopa se si Busa si lumelanga bayemeli ba sona ka silimo kwa likalulo ze fitana-fitana mwa lifasi kaufela ku y’o buhisana ni bayemeli ba mitai mwa likalulo zeo. Kwa liofisi za mitai ku na ni Tutengo twa Mitai to tu na ni lilama ze talu ku isa ku ze supile to tu okamela musebezi mwa linaha ze beilwe mwa lizoho la tona. Ye miñwi ya mitai i na ni miyaho ya ku hatiseza teñi, mi ye miñwi ya yona yeo i na ni mishini ye hatisa lihatiso ka lubilo lo lutuna hahulu. Naha kamba sibaka se si mwatas’a mutai ni mutai si abilwe ka likiliti, mi likiliti zona li abilwe ka mipotoloho. Mupotoloho ni mupotoloho u na ni liputeho ze bat’o ba ze 20. Muokameli wa sikiliti u potelanga mipotoloho ye mwa sikiliti sa hae ka ku latelelana. Ka silimo ni silimo mikopano ye mibeli ya eziwanga mwa mupotoloho ni mupotoloho. Hape ku na ni muokameli wa mupotoloho, mi u potelanga puteho ni puteho mwa mupotoloho wa hae, hañata u eza cwalo habeli ka silimo, ili ku tusa Lipaki ku lukisa ni ku eza musebezi wa ku kutaza mwa kalulo ye i filwe puteho yeo.

Puteho ya fa silalanda ni Ndu ya Mubuso ya yona ki fona fo ku simuluha ku bulelwa kwa taba ye nde mwa kalulo ya mina. Libaka ze mwatas’a puteho ni puteho li abilwe ka ku eziwa likalulo ze nyinyani. Likalulo zeo li abelwa Lipaki ka buñwi, mi bona ba lika ka t’ata ku potela ni ku ambota batu mwa ndu ni ndu ye mwateñi. Puteho ni puteho, ye na ni Lipaki ba sikai ku y’o fita ku ba ba eza 200, i na ni maeluda ba ba filwe ku eza misebezi ye fitana-fitana. Mutu ni mutu y’a li muzibahazi wa taba ye nde ki wa butokwa hahulu mwa kopano ya Lipaki za Jehova. Paki kaufela, ibe kuli u sebeleza kwa sibaka se situna sa tamaiso ya mwa lifasi, mwa mitai, kamba mwa liputeho, u eza ona musebezi w’o wa mwa simu ka ku bulelela ba bañwi za Mubuso wa Mulimu.

Lipiho za ona musebezi w’o kwa mafelelezo li y’o fita kwa sibaka se situna sa tamaiso ya mwa lifasi, mi buka ye bizwa Yearbook ya lukiswanga ni ku hatiswa ka silimo ni silimo. Hape,  ku hatiswanga ni mukoloko ka silimo ni silimo mwa musulo wa January 1 wa Tora ya ku Libelela. Zona lihatiso ze peli zeo li fanga lipiho ze kwanile za misebezi ye petilwe mwa silimo ni silimo mwa ku paka za Jehova ni Mubuso wa hae o mwatas’a Kreste Jesu. Mwa lilimo za cwanoñu fa, ba ba bat’o eza 14,000,000, ili Lipaki hamoho ni batu ba ba tabela, ba fumanehile ka silimo kwa Kupuzo ya lifu la Jesu. Lipaki za Jehova ba tandanga lihora ze fitelela 1,000,000,000 ka silimo mwa ku shaela taba ye nde, mi ba banca ba ba fitelela 300,000 ba kolobezwanga. Batu ba siyelwanga lihatiso ze eza bolule ba ba mianda-nda.