BAKRESTE babañata habaezangi mukiti wa ngilisimusi. Baikutwa cwañi ka za taba yeo? Kana baikutwa kuli kunani nto yeñwi yebaicawisa? Kana bana babona baikutwa kuli batimiwa lika zeñwi? Halunyakisiseñi mobaikutwela Lipaki za Jehova ka za taba yeo.

Kuhupula Jesu Kreste: “Pili nisikaba kale yomuñwi wa Lipaki za Jehova, nenisayangi hahulu kwa keleke. Mi neniyanga feela hakunani mukiti wa ngilisimusi kamba wa Isita. Nihakulicwalo, nenisa nahanangi ka za Jesu Kreste. Ka nako ya cwale, nituhezi kuezanga mukiti wa ngilisimusi, kono niyanga kwa mikopano ya Sikreste habeli ka sunda mi mane nitalusezanga batu babañwi zeibulela Bibele ka za Jesu!”—BO EVE, BABAPILA KWA AUSTRALIA.

Tabo ye mwa kufana: “Nibanga ni tabo yetuna hanifiwa mpo yenisika libelela. Nitabela hahulu limpo zecwalo! Hape nilata hahulu kupanga makadi ni kufa batu maswaniso eniswanisize kakuli kueza cwalo kutahisezanga batu bao tabo mi ni na nibanga ni tabo.”—BO REUBEN, BABAPILA KWA NORTHERN IRELAND.

Kutusa babatokwile: “Lulata hahulu kuapehelanga lico bakuli. Fokuñwi lubaisezanga mapalisa, keke, kamba mpo yeñwi ilikuli babe ni mwangalwa. Lubanga ni tabo kakuli lwaziba kuli lwakona kubapotela nako ifi kamba ifi mwa silimo.”—BO EMILY, BABAPILA KWA AUSTRALIA.

Kupotela bahabo luna: “Kupotelanga bahabo luna kutusanga bana baluna kulukuluha kuzibana ni bo malumaa bona, bo maa bona babanyinyani kamba babahulu ni bana babona, hamohocwalo ni bo kukwaa bona. Bakeñisa kuli lwalata bana bahabo luna, lubapotelanga nako ifi kamba ifi mwa silimo isiñi ka nako ya mikiti.”—BO WENDY, BABAPILA KWA CAYMAN ISLANDS.

Kozo: “Hakueziwanga mukiti wa ngilisimusi, batu bapatehanga hahulu kuli mane babañwi hababangi ni nako ya kunahana za kupila ka kozo. Niikutwa hahulu kulukuluha kakuli mwa Bibele niitutile lika zakaezeza batu Mulimu kwapili. Mi naziba kuli bana baka bakaikola limbuyoti zeñata kwapili.”—BO SANDRA, BABAPILA KWA SPAIN.