Sefania 3:1-20
3 Woo oshilando oshinashibofa, sha nyata noshikwanyanya!+
2 Inashi dulika nande okondaka imwe;+ inashi tambula ko outekuduliko.+
Inashi lineekela muJehova;+ inashi ehena popepi naKalunga kasho.+
3 Omalenga asho okwa fa eenghoshi tadi kumbu.+
Ovatokoli vasho ova fa eembwa domomufitu tadi nyange oufiku,Odo hadi kokota po nomakipa, noihadi fiye po shomongula.
4 Ovaprofeti vasho ove na ounhwa, novakengeleledi.+
Ovapristeri vasho ohava nyateke osho shiyapuki;+Nohava nyono omhango.+
5 Jehova omuyuki noku li mokati kovakalimo vasho;+ iha longo owii.
Ngaashi etango hali piti alushe,Alushe oha shiivifa eemhango daye ongula keshe.+
Ndele natango ovo vehe fi ovayuki ihava fi ohoni.+
6 “Onda hanauna po oiwana; eeshungongulu odo da li meehuke dekuma oda hanaunwa po.
Onda hanauna po omapandavanda avo, opo paha kale nande oumwe ta ende mo.
Oilando yavo oya ninga oikulukuma, muhe na ovakalimo.+
7 Onda ti: ‘Omu na okutila nge filufilu nokutambula ko outekuduliko,’*+
Opo shiha* ka hanaunwe po,+Ohandi ke shi tokola* omolwoinima aishe oyo.
Ashike osha kala sha halelela okulonga owii.+
8 Jehova okwa ti: ‘Onghee kaleni mwa teelela nge,’*+‘Fiyo efiku olo handi uya ndi kwate ko oinima yavo,*Osheshi onda tokola okwoongela oiwana, okwoongela omauhamba,Opo ndi va katukile onghatu omolwonya nehandu lange linene,+Osheshi omundilo wehandu lange otau ka xwika po edu alishe.+
9 Opo nee ohandi ka honga ovanhu va popye elaka la koshoka,Opo aveshe va ifane edina JehovaNove mu longele va hangana.’*+
10 Ovo hava longele nge, ovanhu vange ovo ve lihanifwa, otava ka etela nge oshali,Okudja koshitukulwa shomulonga waEtiopia.+
11 Mefiku olo, itamu ka fifwa ohoniOmolwoilonga aishe oyo mwa longa, eshi mwa tukululila nge oshibofa,+Ndele mokati keni ohandi ka kufa mo ovalinenepeki ovo have linomo,Noitamu ka kala vali tamu linenepekele komhunda yange iyapuki.+
12 Ohandi ka efa ovalininipiki novadinwa va kale mokati keni,+Notava ka konga eameno medina laJehova.
13 Ovaisrael ovo va xupa mo+ itava ka longa okuhenouyuki;+Itava ka popya oipupulu noitava ka longifa elaka lavo va fufye vamwe;Otava ka lya nokunangala, nopehe na oo te va tilifa.”+
14 Omonakadona waSion, ingida nehafo!
Israel, kuwilila pombada!+
Omonakadona waJerusalem, kala wa hafa nokunyakukwa nomutima woye aushe!+
15 Jehova okwa kufa po ehandukilo olo a li e mu tokolela.+
Okwa taataelashi ovatondi veni.+
Jehova, Ohamba yaIsrael, oku li mokati keni.+
Itamu ka tila vali owii.+
16 Mefiku olo, otava ka popya shi na sha naJerusalem tava ti:
“Akutu Sion, ino kala wa tila.+
Inamu efa omake eni a we poshi.
17 Jehova Kalunga keni oku li mokati keni.+
E li omunaenghono, ote mu xupifa.
Ota hafe neenghono omolweni.+
Molwaashi oku mu hole, oku udite a tulumukwa.*
Ota ka kala a hafa omolweni, ta ingida pombada nehafo.
18 Ohandi ka ongela ovo va nyika oluhodi, molwaashi vaha li koivilo yoye;+Kava li po, molwaashi ova li moukwatwa, novanhu ova li tave va yolo.+
19 Tala! Pefimbo opo, ohandi ka katukila onghatu aveshe ovo tave mu hepeke;+Ohandi ka amena oo ta shongola,+Nohandi ka ongela ovo va halakanifwa.+
Ohandi ke va tumbalekifa noku va fimanekifa*Moshilongo keshe omo va li va fifwa ohoni.
20 Ohandi ke mu alula pefimbo opo,Ohandi ke mu ongela pefimbo.
Ohandi ke mu fimanekifa* noku mu tumbalekifa+ mokati kovanhu aveshe ovo ve li kombada yedu,Ngeenge nda alula eenghwate moipafi yeni,” Jehova osho a ti.+
