Omaimbilokemo 5:1-22
5 O! Jehova, dimbuluka osho she tu hanga.
Tala nokumona ohoni yetu.+
2 Efyuululo letu ola pewa ovaendanandjila, omaumbo etu ovanailongo.+
3 Otwa ninga eefiye tuhe na ootate; oomeme ove li ngaashi ovafiyekadi.+
4 Otu na okufuta tu nwe omeva etu vene,+ noikuni yetu vene ohai futilwa.
5 Ovo tave tu taataa ove li peefingo detu;*Otwa loloka, ndele ihatu fudifwa po.+
6 Ohatu yelulile eke letu kuEgipiti+ nokuAssiria,+ opo tu mone omungome wokulya wa wana.
7 Ootatekulululwa ovo va nyona kave po vali, ashike otu na okuhumbata omanyono avo.
8 Paife, ovapiya otave tu pangele; kape na ou te tu nyeke mo meke lavo.
9 Ohatu likongele omungome wetu, twa tula onghalamwenyo* yetu moshiponga+ omolweongamukonda lomombuwa.
10 Oshipa shetu osha pupyala sha fa ediko omolwouyehame wondjala.+
11 Ovakulukadi vomuSion ova fifwa ohoni,* oukadona elela vomoilando yaJuda.+
12 Ovawiliki ova li va endjelelekwa keke lavo,+ novakulunhu kava li hava fimanekwa.+
13 Ovalumenhu ovanyasha ova humbata oshini shokukweyela, novamati ova wila koshi yonduba yoiti.
14 Ovakulunhu ova dja po poshivelo shoshilando;+ ovalumenhu ovanyasha inava dana omusika yavo.+
15 Ehafo ola dja mo momitima detu; okudana kwetu okwa shituka oluhodi.+
16 Oshikoroni osha wa ko komitwe detu. Woo kufye, molwaashi otwa nyona!
17 Omolwoshinima osho, omitima detu otadi ehama,+Nomolwoinima oyo, omesho etu otaa ende taa twika,+
18 OmolwOmhunda yaSion, oyo ye likalela;+ paife ookavandje otava endaenda kuyo.
19 O! Jehova, ove ou li omutumba kolukalwapangelo fiyo alushe.
Olukalwapangelo loye otali kala po okudja kepupi fiyo okepupi.+
20 Omolwashike we tu dimbwa fiyo alushe, nowe tu ekelashi oule wefimbo lile?+
21 O! Jehova, tu alulila kwoove, nohatu ka alukila kwoove diva nehalo liwa.+
Tu pa vali omafiku mawa ngaashi omafiku onale.+
22 Ashike owe tu ekelashi filufilu.
Owe tu handukila neenghono.+
