Jona 4:1-11
4 Ashike osho Jona ka li e shi hafela nandenande, nokwa li a handuka neenghono.
2 Onghee okwa ilikana kuJehova ta ti: “Akutu, Jehova, onda li ndi shi shii kutya osho to ka ninga ngaho, ofimbo nda li koshilongo shetu. Nomolwaashi nda li nda kendabala okuya onhapo kuTarsis,+ osheshi onda li ndi shii kutya ove oKalunga omunalukeno* nomunanghenda, iho handuka diva, nou na filufilu ohole i na oudiinini,+ noiho hafele okuhandukila ovakolokoshi.
3 Alikana, Jehova, efe nge ndi fye, osheshi oshixwepo kwaame okufya, ponhele ndi kale nomwenyo.”+
4 Jehova okwe mu pula a ti: “Mbela osha yuka ngoo kwoove okukala wa handuka neenghono?”
5 Jona okwa dja mo moshilando, ndele ta kala omutumba kombinga yokoushilo woshilando. Okwe liningila okatala, ndele ta kala omutumba momudile wako, opo a tale kutya oshilando otashi ka ningilwa shike.+
6 Jehova Kalunga okwa menifa onhanga* i ningile Jona omudile, opo a pepelelwe. Na Jona okwa li a hafela neenghono onhanga oyo.
7 Mefiku la shikula ko, eshi eluwa la tenda, Kalunga kashili okwa tuma eshila nola lya onhanga oyo, ndele tai fi.
8 Eshi omutenya wa twa, Kalunga okwa pepifa omhepo ipyu yokoushilo, netango ola li tali xwike omutwe waJona, ndele ta ngabuka. Okwa kala ta pula a fye ta ti: “Oshixwepo kwaame okufya, ponhele yokukala nomwenyo.”+
9 Kalunga okwa pula Jona a ti: “Osha yuka ngoo okukala wa handuka neenghono omolwonhanga oyo?”+
Opo nee Jona okwa tya: “Osha yuka kwaame okukala nda handuka, nda handukilila nonda hala okufya.”
10 Ashike Jehova okwa ti: “Owa etela onghenda onhanga oyo ino longela noino i kulika; oya mena moufiku umwe, ndele tai fi moufiku umwe.
11 Mbela kandi na yo okweetela onghenda Ninive, oshilando shinene,+ omo mu na ovanhu ve dulife 120 000, ovo vehe shii osho shi li mondjila naasho sha puka* nosho yo oimuna yavo ihapu?”+
