Ester 3:1-15
3 Konima yaasho, ohamba Ahasveros oya yelaayela Haman,+ omonamati waHammedata, Omuagag,+ eshi ye mu pa ondodo i dule yomalenga aeshe akwao, oo a li pamwe nao.+
2 Ovapiya aveshe vohamba, ovo va li poshivelo shohamba, ova li ve na okutwila Haman eengolo noku mu linyongamena, molwaashi ohamba oya yandja oshipango a ningilwe ngaho. Ashike Mordekai okwa li a anya oku mu twila eengolo, ile oku mu linyongamena.
3 Onghee ovapiya vohamba, ovo va li poshivelo shohamba, ova pula Mordekai tava ti: “Omolwashike to lipwililikile oshipango shohamba?”
4 Ova kala have mu pula efiku nefiku, ndele ka li a pwilikina kuvo, nokwa li e va lombwela kutya ye Omujuda.+ Opo nee ova li va lombwela Haman a tale ngeenge elihumbato laMordekai oli shii ngoo okulididimikilwa.+
5 Eshi Haman a mona kutya Mordekai ina hala oku mu twila eengolo noku mu linyongamena, Haman okwa li a fula onya neenghono.+
6 Molwaashi okwa li a lombwelwa kombinga yoshiwana shooMordekai, ka li ashike ta diladila okudipaa* Mordekai oye aeke. Ndele okwa li ta kongo ondunge yokuhanauna po Ovajuda aveshe, ovo va li mouhamba aushe waAhasveros, oshiwana ashishe shooMordekai.
7 Momwedi wotete, sha hala okutya, momwedi Nisan,* momudo omuti-12+ wepangelo lohamba Ahasveros, ova umba Pur+ (sha hala okutya, Oshihoololifo) moipafi yaHaman, opo a tokole efiku nomwedi, nosha li sha wila momwedi omuti-12, sha hala okutya, Adar.*+
8 Opo nee Haman okwa tya kohamba Ahasveros: “Ope na ovanhu vamwe va halakanifwa nove lihanifilwa mokati kovanhu+ moitukulwalongo* aishe yomouhamba woye,+ ovo eemhango davo da yooloka ko kwaado dovanhu vakwao aveshe. Ihava dulika koipango yohamba, noinashi yuka ohamba i va efe va kale ngaho.
9 Ngeenge otashi wapalele ohamba, naku shangwe omhango kutya Ovajuda otava ka hanaunwa po. Ohandi ka yandja oitalenti* yoshisilveri 10 000 komalenga e i tule meemhungulilo domouhamba.”*
10 Opo nee ohamba oya dula ko olinga yayo yoshihako+ komunwe noku i pa Haman,+ omonamati waHammedata, Omuagag,+ oo a li omutondi wOvajuda.
11 Ohamba oya tya kuHaman: “Oshisilveri novanhu ove li meke loye, u va ningile keshe osho u wete tashi wapalele.”
12 Opo nee oohamushanga vohamba+ ova li va ifanwa mefiku eti-13 lomwedi wotete. Oinima aishe, oyo Haman a popya, ove i shangela+ omalenga ohamba, oongoloneya, ovo va li ve lihanena moitukulwalongo,* nosho yo ovapangeli vovanhu ve lili noku lili, moshitukulwalongo* keshe, opashangelo* lasho, nomunhu keshe, omelaka laye. Oya li ya shangifwa medina lohamba Ahasveros noya hakwa nolinga yoshihako+ shohamba.
13 Ovatumwa ova li va twala eenhumwafo koitukulwalongo* aishe yohamba, omo mu na elombwelo lokudipaa, okuhanauna po nokukomba po Ovajuda aveshe, ovanyasha novakulunhu, ounona nosho yo ovakainhu, mefiku limwe alike, mefiku eti-13 lomwedi omuti-12, sha hala okutya, momwedi Adar,+ nokukufa ko omamona avo.+
14 Osho sha li sha shangwa meenhumwafo odo osha li tashi ka kala omhango moshitukulwalongo* keshe, nosha li shi na okushiivifilwa ovanhu aveshe, opo va dule okulilongekidila efiku olo.
15 Ovatumwa ova li va ya diva+ ngaashi va lombwelwa kohamba. Omhango oya li ya tulwa po muSusan,*+ oshilando sha dingililwa komakuma.* Opo nee ohamba naHaman ova li va kala omutumba va nwe, ofimbo ovanhu vomoshilando shaSusan* va li va lyalyakana.
Omashangelo opedu
^ Eln., “okutenheka eke.”
^ Tala Oshiw. B15.
^ Tala Oshiw. B15.
^ Ile “momalelo oitukulwa.”
^ Oshitalenti shimwe oshi fike peekilograma 34,2. Tala Oshiw. B14.
^ Ile tashi dulika, “Ohandi ka futa oitalenti 10 000 meemhungulilo domouhamba, yaavo tava ka wanifa po oshilonga osho.”
^ Ile “momalelo oitukulwa.”
^ Ile “melelo loshitukulwa.”
^ Ile “omonghedi omo hashi shange.”
^ Ile “komalelo oitukulwa.”
^ Ile “melelo loshitukulwa.”
^ Ile “muSusa.”
^ Ile “kombala; kohotekuma.”
^ Ile “shaSusa.”
