Esra 5:1-17
5 Omuprofeti Haggai+ naSakaria,+ omutekulu waIddo,+ ova li va xunganeka medina laKalunga kaIsrael, oo a li pamwe navo, shi na sha nOvajuda, ovo va li muJuda nomuJerusalem.
2 Opo nee Serubbabel,+ omonamati waSalatiel, naJesua,+ omonamati waJehosadak, ova li va hovela okutungulula eumbo laKalunga,+ olo la li muJerusalem, novaprofeti vaKalunga ova li pamwe navo nova li tave va yambidida.+
3 Pefimbo opo, Tattenai, ngoloneya woshitukulwa osho shi li Kombada yOmulonga,* Setar-bosenai navakwao ove uya kuvo noku va pula tava ti: “Olyelye e mu lombwela mu tunge eumbo eli nokumanifa etungo eli?”
4 Natango, ove va pula tava ti: “Ovalumenhu ava tava tungu etungo eli ovo oolyelye?”
5 Ndele Kalunga okwa li ta pashukile* ovakulunhu vOvajuda,+ onghee kava li ve va kelela, fiyo osheshi ehokololo la tuminwa Darius, nonhumwafo i na sha naasho ya shunifwa.
6 Ei onhumwafo oyo Tattenai, ngoloneya woshitukulwa osho shi li Kombada yOmulonga, Setar-bosenai navakwao, oongoloneya, ovo ve na eendodo dopedu voshitukulwa osho shi li Kombada yOmulonga, va tumina ohamba Darius.
7 Ove mu tumina ehokololo, olo va shanga, tava ti:
“Kohamba Darius:
“Ombili nai kale naave!
8 Ohamba nai shiive kutya otwa li twa ya koshitukulwalongo* shaJuda, keumbo laKalunga munene, notali tungwa nomamanya manene, a tulwa peenhele, nomakuma okwa tulwa oipilangi. Ovanhu ova longa oilonga nehalo liwa notai xumu komesho omolweenghendabala davo.
9 Opo nee otwa pula ovakulunhu vavo hatu ti: ‘Olyelye e mu lombwela mu tunge eumbo eli nokumanifa etungo eli?’+
10 Otwe va pula yo omadina avo tu ku shiivifile, opo tu dule okushanga omadina ovalumenhu ovo tava kwatele komesho.
11 “Ove tu nyamukula va ti: ‘Fye ovapiya vaKalunga, oo ta pangele eulu nedu, nohatu tungulula eumbo, olo la li la tungwa omido dihapu da pita, olo la li la tungwa nokumanifwa kohamba inene yaIsrael.+
12 Ndele molwaashi ootatekulululwa ova handukifa Kalunga komeulu,+ okwe va yandja momake ohamba Nebukadnesar+ yaBabilon, Omukaldea, oyo ya hanauna po eumbo eli+ noya twala ovanhu moukwatwa kuBabilon.+
13 Kakele kaasho, momudo wotete wepangelo lohamba Kores yaBabilon, ohamba Kores oya yandja elombwelo, opo eumbo laKalunga li tungululwe.+
14 Shikwao vali, ohamba Kores oya li ya kufa oikwatelwa yoshingoli noyoshisilveri motembeli yaBabilon, ya dja meumbo laKalunga, oyo Nebukadnesar a li a kufa motembeli muJerusalem noku i twala kotembeli kuBabilon.+ Oya li ya pewa omulumenhu wedina Sesbassar,*+ oo a li a nangekwa po kuKores e li ngoloneya.+
15 Kores okwa tya kuye: “Kufa oikwatelwa ei. Inda, ndele to i twala kotembeli oyo i li muJerusalem, neumbo laKalunga nali tungululwe ponhele apa la li nale.”+
16 Opo nee Sesbassar okwe uya nokwa dika po ekanghameno leumbo laKalunga,+ olo li li muJerusalem, nola kala tali tungwa okudja kefiku olo fiyo opaife, ndele inali pwa natango.’+
17 “Ngeenge otashi wapalele ohamba, naku ningwe omakonakono meemhungulilo domouhamba waBabilon, ku talike ngeenge ohamba Kores oya yandja tuu shili elombwelo li na sha nokutungulula eumbo laKalunga muJerusalem,+ opo nee hatu tuminwa etokolo lohamba li na sha naasho.”
