Onhumwafo yotete kuTimoteus 6:1-21
6 Ovapiya nava kale va fimaneka neenghono oovene vavo,+ opo edina laKalunga nomahongo aye aha shekwe.+
2 Ovo ve na oovene ve li ovaitaveli inave va dina, molwaashi ve li ovamwaxe. Ndele ove na okulonga noudiinini, molwaashi ovaitaveli vakwao ovo ve li ovamwaxe ovaholike ovo tava mono ouwa moilonga yavo iwa.
Twikila oku va honga oinima ei noku va kumaida.
3 Ngeenge ope na ou ta tandavelifa omahongo oipupulu noita tu kumwe nomalombwelo a yuka,*+ oo a dja kOmwene wetu, Jesus Kristus, nosho yo nomahongo oo e li metwokumwe nokulongela Kalunga netilofimaneko,+
4 ote linenepeke noke na eudeko lasha.+ Oku hole unene* eenhamanana nosho yo eemhata kombinga yoitya.+ Oinima ya tya ngaho ohai eta ondubo, omashilafano, okulundila,* okufekela kwii,
5 okutwa eemhata moinima inini movanhu ovo ve na omadiladilo mai+ nova efa po oshili, tava diladila kutya okulongela Kalunga netilofimaneko osha hala kutya okulikola sha.+
6 Oshoshili kutya okulongela Kalunga netilofimaneko otaku etele omunhu ouwa muhapu,+ ngeenge okwa wanenwa.*
7 Osheshi mounyuni inatu eta mo sha noitatu di mo nasha.+
8 Onghee hano ngeenge otu na oikulya* noikutu,* natu kale twa wanenwa koinima oyo.+
9 Ndele ovo va hala okupunapala otava wile momwiyo notava hangwa komayeleko,+ komadiladilo nokomahalo mai oo tae va twala mehanauno nomenyonauko.+
10 Osheshi olwisho loimaliwa olo efina lowii aushe, naavo va hala okupunapala ova efa po eitavelo lavo nove lietela omaudjuu mahapu.+
11 U li omupiya waKalunga, inda onhapo oinima oyo. Ndele lalakanena ouyuki, okukala u na etilofimaneko lokulongela Kalunga, eitavelo, ohole, elididimiko nomwenyo muwa.+
12 Kondja ekondjo liwa leitavelo; diinina omwenyo waalushe oo wa ifanenwa nowa udifa kombinga yao moipafi yovanhu vahapu.
13 Ohandi ku lombwele koshipala shaKalunga, ou oinima aishe i na omwenyo omolwaye, noshaKristus Jesus, ou a yandja oundombwedi koshipala shaPontius Pilatus,+
14 u dulike koipango nou kale uhe na oshipo nowa koshoka fiyo opokuhololwa kwOmwene wetu, Jesus Kristus,+
15 oo e na alushe ehafo noye aeke Omupangeli e na eenghono, oo ta ka holola eenghono daye peufwafimbo. Oku li Ohamba yeehamba adishe nOmwene woovene aveshe.+
16 Oye aeke ita dulu okufya,*+ noha kala mouyelele omo itamu dulu okwiiwa,+ nokape na oo a mona mo, ile ta dulu okumona mo.+ Oye a wana okufimanekwa nokupewa eenghonopangelo daalushe. Amen.
17 Kunghilila* oipuna yomonghalelo ei yoinima* ihe linenepeke,* iha tule elineekelo layo moinima oyo tai xulu po,+ ndele nai lineekele Kalunga, oo he tu pe pauyadi oinima aishe oyo hatu hafele.+
18 I lombwela i ninge oipuna yoilonga iwa, i kale hai longo ouwa, hai yandje, hai tukulilafana navakwao+
19 noi lituvikilile emona li kale ekanghameno liwa lonakwiiwa,+ opo i diinine omwenyo washili.+
20 Timoteus, pashukila osho we lineekelelwa,+ henuka eendjovo dongaho odo itadi fimanekifa Kalunga notadi di kwaavo ve litala ko ve na eshiivo, ashike “eshiivo” lavo otali kondjifa oshili.+
21 Vamwe ovo have litangele eshiivo la tya ngaho, ova efa po eitavelo.
Efilonghenda laKalunga nali kale pamwe nanye.
Omashangelo opedu
^ Ile “taa tungu; taa eta ouwa.”
^ Ile “Okwa lenga neenghono.”
^ Ile “eendjovo dii.”
^ Ile “oku na sha wana.”
^ Ile “oipalwifa.”
^ Ile tashi dulika, “nonhele yokukala.” Eln., “sha shokuliuvika.”
^ Ile “e na oukwatya wokuhafya.”
^ Ile “lihalele pombada.”
^ Ile “yomeedula edi.” Tala Omafatululo oitya.
^ Ile “Lombwela.”
