Onhumwafo yotete kuTimoteus 4:1-16
4 Onghee hano eendjovo* da nwefwa mo oda popya sha yela kutya ovanhu vamwe monakwiiwa otava ka efa po eitavelo notava ka pwilikina keendjovo doipupulu*+ odo tadi monika da fa da dja kuKalunga notava ka pwilikina komahongo eendemoni.
2 Otava ka pwilikina yo komapopyo oipupulu ovalumenhu ovanaihelele,+ ovo va dipaa eliudo lavo la fa la xwikwa noshixwikifo.
3 Ovalumenhu ovo ohava kelele ovanhu vaha hombole+ nohave va lombwele ve lidilike oikulya,+ nonande Kalunga okwe i shita, opo i liwe+ nolupandu kwaavo ve na eitavelo+ nove shii nawanawa oshili.
4 Keshe osho Kalunga a shita oshiwa,+ nokape na osho tashi dulu okweekelwashi,+ ngeenge osha tambulwa ko nolupandu,
5 osheshi osha yapulwa okupitila meendjovo daKalunga nokeilikano.
6 Ngeenge owa kala ho yandje omayele oo kovamwatate, oto ka kala omuyakuli muwa waKristus Jesus, wa palulwa keendjovo deitavelo nokomahongo a yuka oo ho shikula filufilu.+
7 Ashike henuka omahokololo oipupulu neendjovo domasheko,+ ngaashi odo hadi popiwa kovakainhu vamwe ovanamido. Mepingafano naasho, shi ninga elalakano loye u lideule okukala ho longele Kalunga netilofimaneko.
8 Osheshi edeulo lopalutu oli na ekwafo linini, ndele etilofimaneko otali kwafele moinima aishe, molwaashi oli na eudaneko lomwenyo paife nomonghalamenyo tai uya.+
9 Eendjovo odo odoshili nohatu dulu oku di lineekela filufilu.
10 Nomolwaasho hatu longo noudiinini nohatu kendabala twa mana mo,+ shaashi otwe lineekela muKalunga omunamwenyo, Omuxupifi+ wovanhu vomaludi aeshe,+ unene tuu ovo ve li ovadiinini.
11 Kala ho va pe omalombwelo oo noku va honga.
12 Ino efa nande oumwe a kale e ku dina, eshi u li omunyasha. Ponhele yaasho, tulila po ovadiinini oshihopaenenwa shiwa ngeenge tashi uya pokupopya, melihumbato, mohole, meitavelo nosho yo moukoshoki.*
13 Twikila okukala ho lesha moipafi nelitulemo,+ okukumaida* nokuhonga fiyo osheshi handi uya.
14 Ino hepifa oshali oyo wa pewa, eshi ovakulunhuongalo ve ku tenheka omake avo, oyo wa xunganekelwa kovaprofeti.+
15 Dilonga* kombinga yoinima oyo noku i diinina, opo exumokomesho loye li monike filufilu kovanhu aveshe.
16 Lipashukila alushe ove mwene nosho yo ehongo loye.+ Kendabala okuwanifa po oinima oyo, molwaashi ngeenge owa ningi ngaho, oto lixupifa ove mwene nosho yo ovo tave ku pwilikine.+
