Osho Ombiibeli tai ti

 Osha yuka eshi hatu tila efyo olo li li omutondi nohatu ningi ngaashi hatu dulu, opo tu amene eemwenyo detu. (1 Ovakorinto 15:26) Ashike oumbada wa pitilila wokutila efyo omolwomahongo oipupulu, ile omitotolombo owa ningifa ovanhu vahapu va kale “moupika woumbada wokutila efyo.” (Ovaheberi 2:15) Oshili otai ku mangulula ko koumbada wa pitilila wokutila efyo, oumbada oo tau dulu oku ku imba u hafele onghalamwenyo. — Johannes 8:32.

Oshili kombinga yefyo

•   Ovafi kave na eshi ve shii. (Epsalme 146:4) Ngeenge omunhu okwa fi, iha udu vali oululume, molwaashi Ombiibeli oya yelekanifa efyo neemhofi, onghee ino pumbwa okukala wa tila. — Epsalme 13:3; Johannes 11:11-14.

•   Ovafi itava dulu oku tu etela oshiponga. Nokuli novatondi ovo va li ovakwanyanya otava “tulumukwa mokati kovafi.” (Omayeletumbulo 21:16) Ombiibeli oya ti kutya “outondwe wavo nondubo yavo oya xula po nale.” — Omuudifi 9:6.

•   Efyo halo exulilo longhalamwenyo yetu. Ovafi otava ka kala vali nomwenyo, eshi Kalunga te ke va nyumuna. — Johannes 5:28, 29; Oilonga 24:15.

•   Kalunga okwa udaneka kutya ope na efimbo opo ‘efyo itali ka kala po vaIi.’ (Ehololo 21:4) Ombiibeli oya popya shi na sha nefiku olo ya ti: “Ovayuki otava ka fyuulula edu, notava ka kala ko fiyo alushe,” vehe na oumbada washa wokufya. — Epsalme 37:29.