Inda koshikalimo

Mbela Jesus okwa nyumunwa nolutu lopambelela, ile olopamhepo?

Mbela Jesus okwa nyumunwa nolutu lopambelela, ile olopamhepo?

Enyamukulo lopaMbiibeli

Ombiibeli oya popya kutya Jesus “okwa dipawa e li omunhu wopambelela, ndele okwa nyumunwa e li omunhu wopamhepo.” — 1 Petrus 3:18; Oilonga 13:34; 1 Ovakorinto 15:45; 2 Ovakorinto 5:16.

Eendjovo daJesus mwene oda ulika kutya ka li ta ka nyumunwa nolutu laye lombelela nohonde. Okwa popya kutya ota yandje ‘olutu laye omolweemwenyo dovanhu,’ li li ekulilo. (Johannes 6:51; Mateus 20:28) Ngeno okwa nyumuninwe nolutu laye lopambelela, ngeno osha ningifa ekuliloyambo olo li kale itali ti sha. Osho kasha li tashi ka ningwa, nokuli nOmbiibeli oya popya kutya okwa yandja olutu nohonde yaye “lumwe aluke.” — Ovaheberi 9:11, 12.

Ngeenge Jesus okwa nyumunwa nolutu lopamhepo, ovahongwa vaye ova dula ngahelipi oku mu mona?

  • Oishitwa yopamhepo ohai dulu okulilundululila momalutu opanhu. Pashihopaenenwa, ovaengeli ovo va li va ninga ngaho monakudiwa, ova li nokuli va dula okulya nokunwa pamwe novanhu. (Genesis 18:1-8; 19:1-3) Ndele nonande ova li natango oishitwa yopamhepo, ova li have lilundululile momalutu opanhu. — Ovatokolipangeli 13:15-21.

  • Konima eshi Jesus a nyumunwa, okwa li e lilundululila molutu lopanhu pakafimbo, ngaashi ashike ovaengeli va li hava ningi. E li oshishitwa shopamhepo, okwa li ha dulu okuholoka nokukana po meendelelo. (Lukas 24:31; Johannes 20:19, 26) Ka li ha holoka nomalutu opambelela a faafana. Nomolwaasho ookaume vaJesus vopofingo va li ashike have mu dimbuluka ngeenge ta popi sha, ile ta ningi sha. — Lukas 24:30, 31, 35; Johannes 20:14-16; 21:6, 7.

  • Eshi Jesus a li e lihololela omuyapostoli Tomas, okwa li e na olutu li na oivadi. Okwa li a ninga ngaho, opo a pameke eitavelo laTomas, molwaashi ka li a itavela ngeenge Jesus okwa nyumuka. — Johannes 20:24-29.