Inda koshikalimo

Eendombwedi daJehova

Hoolola elaka Oshikwanyama

Ombiibeli otai ti ngahelipi kombinga yokupopya omalaka?

Ombiibeli otai ti ngahelipi kombinga yokupopya omalaka?

Enyamukulo lopaMbiibeli

‘Okupopya omalaka’ otaku ulike koshikumwifilonga osho sha ningilwa Ovakriste vamwe vomefelemudo lotete eshi va li va dula okupopya omalaka nonande inave e lihonga. (Oilonga 10:46) Ovakriste ovo ova li ve uditiwe ko nawa kovanhu ovo va li hava popi omalaka oo. (Oilonga 2:4-8) Okupopya omalaka oku li imwe yomeeshali domhepo iyapuki oyo Kalunga a li a yandja kOvakriste vomefelemudo lotete. — Ovaheberi 2:4; 1 Ovakorinto 12:4, 30.

 Okupopya omalaka okwa hovela naini?

Oshikumwifilonga shokupopya omalaka osha ningilwe tete muJerusalem pOshivilo shOpentekoste yomo 33 O.P., osho sha li hashi danwa kOvajuda. Ovashikuli vaJesus 120 lwaapo ova li va ongala eshi ‘aveshe va yadifwa Omhepo Iyapuki, ndele tava hovele okupopya omalaka amwe e lili.’ (Oilonga 1:15; 2:1-4) Ongudu inene yovanhu “vomoiwana aishe yokoshi yeulu” oya li ya ongala, ‘nakeshe umwe okwe va uda tava popi elaka lambulavo.’ — Oilonga 2:5, 6.

 Elalakano lokupopya omalaka ola li lashike?

  1. Okuulika kutya Kalunga okwa li ta yambidida Ovakriste. Pefimbo lonale, Kalunga okwa li ha longo oikumwifilonga opo a ulike kutya ota yambidida ovanhu ovo have mu longele noudiinini ngaashi Moses. (Exodus 4:1-9, 29-31; Numeri 17:10) Okupopya omalaka okwa li yo taku ulike kutya Kalunga ota yambidida eongalo lOvakriste olo opo la totwa po. Omuyapostoli Paulus okwa shanga a ti: “Okupopya omalaka kaku fi edidiliko kovaitaveli, ndelenee okwaava vehe neitavelo.” — 1 Ovakorinto 14:22.

  2. Okukwafela Ovakriste va yandje oundombwedi nawanawa. Aveshe ovo va li va pwilikina kovashikuli vaJesus mefiku lOpentekoste ova ti: “Ofye keshe ou, ohatu mu udu ta popi oilonga inene yaKalunga melaka letu vene.” (Oilonga 2:11) Elalakano vali limwe la femba li na sha noshikumwifilonga osho ola li okukwafela Ovakriste ‘va udife’ ‘nokuninga ovanhu aveshe ovahongwangaashi va li va lombwelwa kuJesus. (Oilonga 10:42; Mateus 28:19) Ovanhu 3000 lwaapo ovo va li va mona oshikumwifilonga osho nokupwilikina ova li va ninga ovahongwa mefiku olo tuu olo. — Oilonga 2:41

 Mbela okupopya omalaka okwa li taku kalelele?

Ahowe. Eeshali domhepo iyapuki, mwa kwatelwa okupopya omalaka, oda li ashike dopokafimbo. Ombiibeli oya ti: “Okuxunganeka otaku xulu po nokupopya omalaka otaku xulu po.” — 1 Ovakorinto 13:8.

 Okupopya omalaka okwa xula naini?

Eeshali domhepo iyapuki oda li da pewa yo Ovakriste vamwe pefimbo lovayapostoli, eshi ovayapostoli va li va tenheka omake avo kombada yomitwe dovaitaveli vakwao. (Oilonga 8:18; 10:44-46) Osha fa shi li ngaha kutya ovo va li va pewa eeshali domhepo iyapuki kovayapostoli ka va li ve di yandja kuvamwe. (Oilonga 8:5-7, 14-17) Oku shi faneka, epangelo otali dulu okuyandja omukanda wokushinga komunhu wonhumba, ashike omunhu oo ina ufwa a yandje omukanda wa tya ngaho kuumwe. Osha fa shi li ngaha kutya okupopya omalaka okwa xula eshi ovayapostoli nosho yo ovo va li va pewa oshali kovayapostoli va fya.

 Mbela ovanhu kunena otava dulu ngoo okupopya omalaka?

Oshali yokupopya omalaka oya li ya xula po lwopexulilo lefelemudo lotete O.P. Kunena kape na oo ta dulu okutya oha popi omalaka keenghono domhepo yaKalunga. *

 Ongahelipi Ovakriste vashili tava dulu okudidilikwa mo?

Jesus okwa ti kutya ohole yashili otai ka didilikifa mo ovashikuli vaye. (Johannes 13:34, 35) Sha faafana, omuyapostoli Paulus okwa popya kutya ohole yashili oyo tai ka didilikifa mo Ovakriste. (1 Ovakorinto 13:1, 8) Okwa ulika kutya omhepo iyapuki yaKalunga otai ka kwafela Ovakriste va kulike omaukwatya oo e li “oiimati yOmhepo,” nohole oyo ya tumbulwa tete. — Ovagalati 5:22.

^ par. 20 Tala oshitukulwa “Mbela okupopya momalaka oshali ya dja kuKalunga?