Inda koshikalimo

Oipango omulongo oyo ya li ya yandjwa kuKalunga oshike?

Oipango omulongo oyo ya li ya yandjwa kuKalunga oshike?

Enyamukulo lopaMbiibeli

Oipango omulongo eemhango odo Kalunga a li a yandja koshiwana shOvaisrael. Eemhango odo ohadi ifanwa oipango omulongo, da dja koshitya shOshiheberi osho tashi ti aserethhaddevari. Outumbulilo oo owa holoka mo lwoikando itatu momambo otete atano Ombiibeli. (Exodus 34:28; Deuteronomion 4:13; 10:4) Outumbulilo wa faafana otau hangwa yo mOshigreka, deka (omulongo) logous (oitya), wa yukifwa koshitya “Decalogue.”

Kalunga okwa li a shanga Oipango Omulongo koipelende ivali yomamanya, ndele te i pe omuprofeti waye Moses kOmhunda yaSinai. (Exodus 24:12-18) Omusholondodo wOipango Omulongo otau hangwa muExodus 20:1-17 nosho yo muDeuteronomion 5:6-21.

 Omusholondodo wOipango Omulongo

  1. Longela Jehova Kalunga aeke. — Exodus 20:3.

  2. Ino longela oikalunga. — Exodus 20:4-6.

  3. Edina laKalunga ino li tumbulila oinima yongaho. — Exodus 20:7.

  4. Dimbulukwa efiku lEshabata. — Exodus 20:8-11.

  5. Fimaneka ovadali voye. — Exodus 20:12.

  6. Ino dipaa. — Exodus 20:13.

  7. Ino nyona ohombo. — Exodus 20:14.

  8. Ino vaka. — Exodus 20:15.

  9. Ino popya oipupulu. — Exodus 20:16.

  10. Ino haluka oshinima shamukweni. — Exodus 20:17.

 Omolwashike elandulafano lOipango Omulongo la yoolokafana?

Ombiibeli inai popya onomola yoshipango keshe. Nomolwaashi ovanhu va pingakanifa oipango imwe. Vahapu ova ninga omusholondodo wa faafana naao u li pombada. Ashike ovanhu vamwe ova pingakanifa oipango oyo. Eyooloko olo ola ningwa ashike moshipango shotete, oshitivali noshaxuuninwa. *

 Elalakano lOipango Omulongo ola li lashike?

Oipango omulongo oya li oshitukulwa shOmhango oyo ya li ya pewa Moses. Omhango oya li ya kwatela mo oipango i dulife 600 lwaapo noya li eudafanotwokumwe ile tu tye ehangano olo Kalunga a ninga noshiwana shaIsrael shonale. (Exodus 34:27) Kalunga okwa li a udanekela oshiwana shOvaisrael kutya ote ke shi nangeka noupuna ngeenge osha kala hashi dulika kOmhango oyo ya li ya pewa Moses. (Deuteronomion 28:1-14) Ashike nande ongaho, elalakano lOmhango okwa li okukwafela Ovaisreal ve li longekidile Messias ile Kristus oo a li te ke uya. — Ovagalati 3:24.

 Mbela Ovakriste ove na okudulika kOipango Omulongo?

Ahowe. Kalunga okwa li a yandja Omhango, mwa kwatelwa Oipango Omulongo, noya li ya nuninwa oshiwana shaIsrael shonale. (Deuteronomion 5:2, 3; Epsalme 147:19, 20) Ovakriste kave li koshi yOmhango oyo ya li ya pewa Moses, nokuli nOvakriste Ovajuda ka “vali koshi yOmhango.” (Ovaroma 7:6) * Omhango oyo ya li ya pewa Moses oya li ya pingenwa po ‘komhango yaKristus,’ oyo ya kwatela mo omalombwelo aeshe oo Jesus a lombwela ovashikuli vaye. — Ovagalati 6:2; Mateus 28:19, 20.

 Mbela Oipango Omulongo otai dulu ngoo oku tu kwafela kunena?

Heeno. Molwaashi Oipango Omulongo otai holola nghee Jehova ha diladila, nohatu ka mo ouwa ngeenge otwe i konakona. (2 Timoteus 3:16, 17) Oipango Omulongo oya kanghamena komafinamhango ihaa kwishi. (Epsalme 111:7, 8) Oushili oyo kutya omafinamhango mahapu otaa hangwa mEtestamenti Lipe. — Tala oshitukulwa “ Omafinamhango Oipango omulongo oo taa hangwa yo mEtestamenti Lipe.

Jesus okwa honga kutya Omhango aishe oyo ya li ya pewa Moses, mwa kwatelwa Oipango Omulongo, oi li ekanghameno loipango ivali ya fimanenena. Jesus okwa ti: “‘Hola Omwene Kalunga koye nomutima woye aushe nomwenyo woye aushe neendunge doye adishe.’ Oshipango shinene noshotete osho tuu eshi. Noshitivali shi fike pusho, osheshi, ‘Hola mukweni ngaashi ove u lihole mwene.’ Moipango ei ivali omhango aishe.” (Mateus 22:34-40) Nonande Ovakriste inava teelelika va dulike kOmhango oyo ya li ya pewa Moses, ova lombwelwa va kale ve hole Kalunga nosho yo ovanhu vakwao. — Johannes 13:34; 1 Johannes 4:20, 21.

  Omafinamhango Oipango omulongo oo taa hangwa yo mEtestamenti Lipe

Efinamhango

Oipango oyo tai hangwa mEtestamenti Lipe

Longela Jehova Kalunga aeke

Ehololo 22:8, 9

Ino longela oikalunga

1 Ovakorinto 10:14

Fimaneka edina laKalunga

Mateus 6:9

Kala ho longele Kalunga

Ovaheberi 10:24, 25

Fimaneka ovadali voye

Ovaefeso 6:1, 2

Ino dipaa

1 Johannes 3:15

Ino nyona ohombo

Ovaheberi 13:4

Ino vaka

Ovaefeso 4:28

Ino popya oipupulu

Ovaefeso 4:25

Ino haluka oshinima shamukweni

Lukas 12:15

^ okat. 13 Omufyuululwakalo wOshijuda owa “ninga oshipango 2 osho tashi hangwa muExodus shotete, ofimbo ovelishe 3-6 ve i ninga oshipango shimwe, nosha ningwa oshitivali.” (The Jewish Encyclopedia) Ofimbo Ovakatolika va ninga Exodus 20:1-6 e li oshipango shimwe. Oshipango shi na sha nokufimaneka edina laKalunga ove shi ninga oshitivali. Opo omuvalu woipango u lixwepo, oshipango shaxuuninwa ova li ve shi tukula moipango ivali, ino haluka omukulukadi wamukweni nosho yo omaliko aye.

^ okat. 15 Ovaroma 7:7 ova longifa oshipango oshitimulongo shi li “Omhango,” tava ulike kOmhango oyo ya li ya pewa Moses, oyo ya kwatela mo Oipango Omulongo.