Bayat ti bulan ti Agosto 2014, dagiti Saksi ni Jehova iti intero a lubong ket nagiwaras iti tract a mangiparegta iti panangbisita iti jw.org. Kas resultana, nasurok a 20 porsiento ti ngimmatuan ti bilang dagiti bimmisita iti website iti dayta a bulan. Dimmanon dayta iti agarup 65 a milion. Gistay 10,000 a tattao iti intero a lubong ti nagkiddaw iti libre a panagadal iti Biblia babaen iti site—67 a porsiento a nangatngato ngem iti napalabas a bulan! Natulongan dagiti tattao iti sadinoman a lugar gapu iti dayta a kampania.

Idiay Canada, maysa a Saksi ti nangkablaaw ken ni Madeline bayat nga addada iti elebeytor sana impakita ti maikamkampania a tract a Pakasarakantayo Kadagiti Sungbat iti Napapateg a Saludsod iti Biag? Imbaga ni Madeline nga iti rabii sakbay dayta, adda iti balkonahena a sipapasnek a mangikarkararag a tulongan koma ti Dios a mangbirok iti sungbat kadagiti kasta a saludsod. Sakbay dayta, napan kadagiti nagduduma a relihion tapno agpayadal iti Biblia ngem awan ti naurayna a sungbatda. Idi agangay, nakipagadal iti Biblia kadagiti Saksi ni Jehova.

Iti Pilipinas, kinasarita ni Rowena ti maysa a lalaki a Chinese nga agtaktakder iti sanguanan ti maysa a restawran. Inikkanna iti tract sana imbaga a kayat dagiti Saksi ni Jehova a tulongan dagiti tattao a mabenepisiaran iti awan bayadna a panagadal iti Biblia.

Imbaga ti lalaki a di pay pulos nakakitkita iti Biblia. Iti panagtultuloy ti saritaanda, natignay ti lalaki nga umatendar iti asamblea dagiti Saksi ni Jehova. Kalpasanna, imbagana a kayatna a maammuan ti ad-adu pay maipapan iti Biblia ken i-download-na dayta manipud iti website-tayo.

Ni Guillermo a taga-Spain ket Saksi a saan a makangngeg. Nagkitada ken Jorge, a dati a kaeskuelaanna, a maysa met a tuleng. Imbaga ni Jorge a nabiit pay a natay ni nanangna ken adu dagiti saludsodna. Inikkan ni Guillermo iti tract a maikamkampania ken imbagana no kasano a biroken dagiti impormasion a mangsungbat iti adu a saludsodna babaen ti jw.org iti sign language. Inawis met ni Guillermo ni Jorge a makigimong iti Kingdom Hall. Napan nakigimong ni Jorge ket sipud idin, saanen a nanglangan nupay 60 a kilometro (37 mi) ti kaadayo ti pagnanaedanna manipud iti Kingdom Hall.

Idiay Greenland, dua a pagassawaan a Saksi ti nagbangka iti innem nga oras tapno madanonda ti maysa a lugar a pagnanaedan ti 280 a tattao uray dakkel ti magastoda. Nangasabada sadiay, nagiwarasda iti tract sada impabuya ti maysa a video iti jw.org iti lengguahe a Greenlandic. Nakairugida met iti panangyadal iti Biblia iti nakasaritada nga agassawa. Mamindua iti makalawas nga agad-adalda itan babaen ti telepono.

Saan laeng nga iti adayo nga amianan ti pakaar-aramidan ti kasta a panagregget. Inyurnos dagiti Saksi iti Nicaragua ti pannakaiwaras daytoy a tract kadagiti tattao nga agsasao iti Mayangna iti kabakiran ti Caribbean. Kalpasan ti deretso a 20 nga oras a panagbiahe babaen ti karagkarag a bus a limmasat iti lasonglasong a kalsada, nagnagnada pay iti 11 nga oras, a no dadduma kadagiti nalutlot a dalan, tapno madanonda dagiti kabalbalayan. Sadiay a nagiwarasda kadagiti tract ken nagipabuyada kadagiti video iti lengguahe a Mayangna, a nagsidsiddaawan ken nakaragsakan dagiti lumugar.

Intukon ni Estela ti tract iti maysa a lalaki a lumablabas iti bassit nga ili iti kabakiran ti Amazon idiay Brazil. Inawat ti lalaki ti tract, ngem imbulsana a kasla saan nga interesado iti dayta. Iti panagawidna, naperdi ti makina ti bangkana ket saanen a makapagtultuloy iti biahena. Bayat nga agur-uray ti lalaki iti tulong, binasana ti tract. Linuktanna ti jw.org babaen ti selponna ket adu nga artikulo ti nabasana ken sumagmamano a video ti nai-download-na. Kalpasan ti sumagmamano nga aldaw, nakasarita ti lalaki ti asawa ni Estela ket impaibagana ti panagyamanna ken Estela iti intedna a tract. “Dagiti artikulo a nabasak ti nangpakalma kaniak bayat ti kaaddak iti karayan agingga a simmangpet ti bangka a timmulong kaniak,” kinunana. “Magustuan dagiti annakko dagiti video ni Caleb. Kanayonto a bisitaek ti jw.org.”