Mangmangan dagiti pagi kadagiti plankton a nailaok iti danum ti baybay a sumsumrek iti ngiwatna bayat nga aglanglangoy. Ti danum ti baybay nga addaan kadagiti plankton ket dumalan iti pangsagatna, isu a maisina dagiti plankton ket agturongen dagita iti karabukobna tapno tilmonenna. Agayus dagiti danum kadagiti pangsagatna sa rummuar met laeng dagita kadagiti asangna. Ti nakaskasdaaw ket kaya ti pagi a sagaten uray dagiti plankton a babbabassit pay ngem iti kalawa ti abut dagiti pangsagatna. “Kasla imposible koma dayta,” kuna ti science journalist a ni Ed Yong.

 Panunotem: Ti pangsagat ti pagi ket addaan iti lima a kasla pakurba a paragpag. Tunggal maysa kadagita ket addaan kadagiti kasla ngipen a nakairig a pasango ken adda met dagiti nakairig a palikud. Gapu kadagita a kasla ngipen, dua a direksion ti pagturongan ti danum. Dadduma ti agayus iti rabaw dagiti kasla ngipen ken dadduma met ti dumalan iti nagbabaetanda isu a mapataud dagiti babassit nga alikuno.

 No maitama dagiti plankton wenno dadduma pay a makan iti murdong dagiti kasla ngipen, naparpartak ti pannakayayusda a mapan iti karabukob ti pagi. Uray adda dagiti babassit a plankton a mabalin koma a lumsot iti nagbabaetan dagiti kasla ngipen, papartaken ti alikuno ti pannakayayus dagita tapno makadanon latta iti karabukob ti pagi. Gapu iti daytoy a pangsagat ti pagi, masagatna uray ti babassit a banag nga agserbi a kanenna a mabalin koma a rummuar kadagiti asangna nga agsubli iti baybay.

 Malaksid iti dayta, saan nga agbara ti pangsagat ti pagi ken kabaelanna a dalusan ti bukbukodna, kasano man kapartak ti panaglangoyna wenno kasano man kaadu ti plankton nga adda iti danum.

 Kayat a tuladen dagiti researcher ti pamay-an ti pagi a mangsagat tapno makaaramidda kadagiti pangsagat a mangdalus kadagiti narugit a danum ken mangikkat kadagiti nakababbabassit a plastik a makadadael iti salun-at ken iti aglawlaw.

 Panagkunam: Ti kadi pangsagat ti pagi ket resulta ti ebolusion? Wenno adda nangdisenio iti dayta?