Apay nga Interesadotayo Kadagiti Milagro?

“Dagiti milagro, sigun iti depinasionna, ket maisalungasing kadagiti pagalagadan ti siensia.”​—RICHARD DAWKINS, DATI A PROPESOR ITI PUBLIC UNDERSTANDING OF SCIENCE.

“Nainkalintegan ti mamati iti milagro. Saan a maikontra dayta iti narelihiosuan a pammati no di ket pagilasinan iti ayat ken pannakaseknan ti Dios kadagiti parsuana.”​—ROBERT A. LARMER, PROPESOR TI PILOSOPIA.

“MAMATIKA kadi iti milagro?” Nagduduma ti opinion dagiti tattao kas ipakita dagiti nadakamat iti ngato. Sika ngay, ania ti sungbatmo?

Mabalin nga ibagam a saan, ta no wen ti sungbatmo, nalabit ipapanmo nga inaanito dayta wenno kasla awan adalmo. Kasta met ti kapanunotan ti adu.

Ngem mabalin a patiem a mapaspasamak dagiti milagro. Mamatika met siguro kadagiti milagro a nairekord iti Biblia, kas iti panangbisngay ni Moises iti Nalabaga a Baybay. Nalabit mamatika met a mapaspasamak dagiti milagro iti kaaldawantayo. Kinapudnona, ipakita ti nabiit pay a report nga “adu a tattao​—kas pagarigan agarup 75 a porsiento kadagiti agnanaed iti Estados Unidos ken 38 a porsiento iti Britania​—ti mamati pay laeng iti milagro.” (The Cambridge Companion to Miracles, inedit ni Graham H. Twelftree) Kasta met, saan laeng a dagiti Kristiano ti mamati iti milagro. Sigun iti Britannica Encyclopedia of World Religions, “dandani amin a relihion patienda” dagiti milagro.

Wenno mabalin a maysaka kadagiti agkuna: “Diak ammo ken diak interesado iti dayta ta awan pay nakitak a milagro!” Ngem apay a rumbeng nga interesadoka kadagiti milagro?

 Usigem daytoy: Ipapanmo nga adda di maagasan a sakitmo. Ngem adda nabasam a report iti mapagtalkan a pagiwarnak iti medisina maipapan iti baro nga agas a makapaimbag iti sakitmo, saan kadi a nasayaat nga iwayaam iti sumagmamano a tiempo a mangsukimat iti dayta? Kasta met, inkari ti Biblia a dandanin mapasamak dagiti nakaskasdaaw a milagro. Inton dumteng dagita, pagimbaganto dayta ti amin a tao ditoy daga. Saan kadi a napateg nga ammuen no mapagtalkan dayta a kari?

Ngem sakbay nga usigentayo no ania dagita a naikari a milagro, ammuentayo pay ti sungbat ti tallo a gagangay a rason a di patien dayta ti dadduma.

[Kahon iti panid 3]

ANIA TI MILAGRO?

Maysa a pasamak a saan a kabaelan nga aramiden ti tao ken ti nakaparsuaan isu a maibilang a gapuanan ti nabilbileg a pannakabalin.