Kada aldaw, nasurok a 20 a dati a miembro ti puersa militar ti United States ti agpakpakamatay. Kada bulan, agarup 950 a beterano nga ay-aywanan ti U.S. Department of Veterans Affairs ti aggandat nga agpakamatay.

“Dandani 50% kadagiti babbai a dimmayo nga agtrabaho nga awan pay 30 anyosna ti masikogan. Nagdakkel ti immaduan dagiti di naikasar [a Tsino] nga inna no idilig iti napalabas a henerasion,” impadamag ti China Daily. Iti kagimongan dagiti Tsino, makuna met a “mas maakseptaren . . . dagiti agkabbalay a di pay nagkasar.”

Adda manen ti malaria iti Greece a dandani napaksiaten ditoy idi 1974. Ti mapabasol ket ti rigat ti ekonomia ken ti naksayan a badyet para iti pannakaaywan ti salun-at ti publiko.

Ipakita ti maysa a surbey nga iti laksid ti napartak a panagbalbaliw ti kagimongan, imbaga ti 74% kadagiti napagsaludsodan a kaykayatda latta ti naitulag a panagasawa ngem ti isuda a mismo ti agpili iti pakiasawaanda. Nakaskasdaaw ta kaykayat met ti 89% ti makipagnaed iti asideg a kakabagianda imbes nga iti laeng nagannak ken kakabsatda.

“Kimmapuyen ti impluensia ti Iglesia [Katolika], iti man nabaknang a Europa ken America. Daanen ti kulturatayo, dadakkel dagiti simbaantayo, awan nagyan dagiti kombentotayo ken saanen a naurnos ti sistema ti panangiwanwan ti Simbaan, gimmarbo dagiti ritual ken kawestayo. . . . Ti Iglesia ket 200 a tawen a naudin iti panawentayo.”—Interbiu iti Katoliko a kardinal a ni Carlo Maria Martini, nga impablaak ti Corriere della Sera idi natayen.