Manipud Kadagiti Agbasbasa

Panangasing Itay rabii, imbaga ti pito ti tawenna nga anakko a babai a dinan kayat ti ageskuela agsipud ta adda dua nga ubbing a babbai a kanayon a mangsursuron kenkuana. Rinugiak a binasa ti serye a “Panangasing​—Ania ti Maaramidam iti Dayta?” (Agosto 22, 2003) Nakatulong kaniak dagitoy nga artikulo​—saan laeng nga iti panangsaranay iti anakko no di ket naawatak met dagiti makagapu iti naiduma a panagtigtignay ti tattao.

L. H., Estados Unidos

Iti pagtartrabahuak idi, pagsasawandak iti naalas, ibabaindak iti imatang dagiti katrabahuak, ken dinak ikaskaso ti maysa kadagiti amok agingga nga immikkatak. Nasaem pay laeng ti riknak gapu iti dayta a kapadasan. Ngem idi nabasak dagiti artikulo, simmayaaten ti riknak ta ammok nga adda makatarus kaniak.

H. N., Japan

Malagipko ti napalabasko idi binasak dagitoy nga artikulo. Idi estudianteak pay laeng, inaldaw a mairurumenak. Pampanunotek idi no apay. Gapu iti daytoy a serye, naawatakon, isu a naliwliwaak iti dayta.

M. M., Japan

Maipupueraak idi idiay eskuelaan, isu a bimmassit ti panagraemko iti bagik. Naisuro idi kaniak a katawaak dagiti mangirurumen kaniak, ngem husto ti imbagayo a nasaysayaat no perrengek ida ken sitatanang nga ilawlawagko a saan a nakakatkatawa dayta.

M. G., Francia

Masapul nga admitirek a talaga a narigatanak a nangbasa kadagiti artikulo maipapan iti panangasing agsipud ta maysaak idi a biktima ti pisikal, berbal, ken saan a direkta a panangasing idi agtutubo ken nataenganakon. Idi nabasak dagitoy nga artikulo, naawatak no apay a negatibo dagiti kapanunotak ken bassit ti panagraemko iti bagik. Isu a kayatko nga iyebkas ti panagyamanko gapu kadagitoy nga artikulo a nangipaay iti praktikal ken makaliwliwa a balakad.

A. M., Italia

Inaldaw nga ib-ibturak ti panangasing idi nangrugiak a naghaiskul. Nakatulong dagitoy nga artikulo tapno maamirisko a saan a pudno nga awan serserbik gapu ta miembroak ti minoria a relihion. Bayat ti panaglabas ti panawen, ad-addan nga ipagpannakkelko a maysaak kadagiti Saksi ni Jehova, ket naragsakak no masapul nga agsagabaak gapu iti dayta. Makapungtotak idi. Ita ammokon ti aramidek, ket siguradok a sumayaatton dagiti bambanag.

M. S., Italia

Sangapulo ket innemen ti tawenmi iti kasinginko, ken agkaklasekami. Ammo dagiti kaklasemi a dakami ket Saksi ni Jehova, isu a masansan nga umsiendakami. Nagsayaat ti pannakailawlawag ti panangasing, isu a napabilegkami unay.

E. P., Italia

Nakasangitak idi nabasak dagitoy nga artikulo, ta nalagipko dagiti inaldaw nga ar-aramiden idi dagiti kaeskuelaak iti innem a tawen. Kas maysa nga agtutubo, sangkapanunotko idi a sisiak ti agsagsagaba kadagita a banag. Diak pay ket ammo a panangasing gayam daytoy a pamutbuteng. Ita ta balasangakon, ad-addan nga agyamanak ta nakagun-odak iti impormasion maipapan iti daytoy a parikut. Adda met laengen makatarus kaniak!

A. P., Alemania

Nagadu ti rigatko idiay eskuelaan ta no dadduma, diak kayaten ti ageskuela. Ngem nakatulong kaniak dagitoy nga artikulo a mangamiris manen iti kasasaadko, isu a nakagun-odak iti nasayaat a pammagbaga. Iyap-aplikarko ti dadduma kadagiti nadakamat a singasing ket epektibo dagitoy. Pagyamanan kadagita a makaparegta ken makatulong nga artikulo.

M. T., Russia