Panangmatmat iti Lubong

“Dagiti Kendi” Para Kadagiti Tumatayab

‘Tapno nabibiit ti aramidenna a polinasion, us-usaren ti maysa a mula idiay Brazil ti estratehia a di pay naammuan agingga ita,’ kuna ti Aleman a magasin a GEO. “Dagiti kendi” ti itukon ti Combretum lanceolatum kadagiti sangailina imbes a painumenna ida iti likido a nektar. Iti agpatnag, agpataud dagiti sabong daytoy a mula kadagiti nagtutukel a nasam-it a gulaman a tumangken nga agbalin a tipkel nga agarup a kakapat ti maysa a pulgada ti diametroda. Sigun kadagiti managsukisok, ti kita ti asukar a glucose ken fructose ti mangpasam-it iti gulaman, a ti ramanna ket “kas [iti mailaklako a kendi] a gulaman a nasukog a kasla maladaga wenno bassit nga oso.” Ilawlawag ti report nga “inton agukrad dagiti sabong no sumingising ti init, madlawen dagiti sumilapsilap, aragaag a kendi a kunam la no naidasaren dagitoy iti bandehado.” Di kumurang a “28 a kita ti tumatayab manipud iti walo a pamilia” ti maatrakar iti daytoy nasam-it a gulaman a patauden dagiti sabong. Bayat nga agsapsapul dagiti tumatayab iti taraonda iti nadumaduma a mula, mapulbuanda iti pollen, isu a makatulongda iti nabibiit nga iyaadu dayta a mula.

 Nararagsak nga Ubbing nga Italiano

“Ti ubing nga Italiano ti kararagsakan iti Europa,” kuna ti periodiko ti Roma a La Repubblica idi impadamagna ti panagadal ti Italian National Center for Documentation and Analysis of Childhood and Adolescence. Naammuan dagiti managsukisok a 96 a porsiento kadagiti ubbing nga Italiano ti dumakkel kadagiti pagtaengan nga agpadpada nga addaan iti ama ken ina. Dakdakkel dayta a porsiento ngem iti dadduma pay a pagilian iti Europa, a sadiay mas gagangay ti panagsina ken panagdiborsio. Kasta met a nasurok a kagudua kadakuada ti addaan kadagiti apong a kabbalay wenno agnanaed iti asidegda. Isu a “8 iti kada 10” nga apong ti makakita kadagiti appokoda “nasurok a maminsan iti kada lawas.” Kuna ti report a makatulong daytoy tapno “marikna [ti ubing] nga adda pakaibilanganna” ken maksayan ti kinalidayna. Kuna ti sikologo a ni Alessandra Graziottin: “Ti kinaragsak ti ubing ket kaasping iti kinaragsak ti adulto. Agpannuray dayta saan nga iti kinabaknang wenno kadagiti mabigbigbig ti etiketada a kawes, no di ket iti pannakarikna a maay-ayatda.”

Makapasalun-at a Panageroplano

Tapno naragragsak ti panageroplanom, adtoy dagiti singasing ti periodiko nga El Universal iti Mexico City: (1) Gapu ta mabalin a saan unay a naagneb ti angin iti uneg ti eroplano, uminumka iti adu a likido a di naingel. (2) Gapu ta saan a naagneb ti angin, aggagatel wenno agpanaas dagiti mata, isu nga aganteohoska imbes nga ag-contact lens-ka. (3) Iti tugawmo, agehersisioka iti simple tapno marelaks dagiti maselmo ken sumayaat ti sirkulasion ti dara kadagiti gurongmo. (4) Sansanem ti magna iti benneg a pagnaan. (5) Agsapatoska iti nalaka a pasoten, ket ibataymo dagiti sakam​—nalabit iti bagmo. (6) Agkaweska iti komportable, di makunes ken naaramid kadagiti natural a materiales tapno makaanges ti kudilmo. (7) Uminumka iti kalkalainganna wenno dika pulos uminum iti naingel, ta kumarkaro dagiti epekto ti naingel nga inumen no ngumatngato ti ayanmo. (8) Baliwam ti turongen ti angin nga aggapu iti air-condition tapno saan a direkta a maanginan ti tengnged wenno bukotmo. (9) Padasem ti maturog, ket nasaysayaat no abbongam dagiti matam. (10) Agngalngalka kabayatan ti panagtayab ken panaglanding tapno maep-ep ti napigsa nga uni a mangngeg dagiti lapayagmo. Mabalinmo nga ikkan dagiti maladaga iti ay-ayam a nutnotenda.

Dagiti Napanuynoyan nga Annak Idiay Alemania

Nadlaw kadagiti nagannak ti “baro a kababalin a mangpanuynoy” kadagiti annakda, kuna ni Udo Beckmann, tserman ti union dagiti mannursuro nga Aleman. Sigun iti periodiko a Südwest Presse, imbaga ni Beckmann nga umad-adu ti mapampanuynoyan unay nga annak isu a dida kayat ti agadal a siaanep idiay eskuelaan. “Imbagana a gagangay unay a pagarupen dagiti nagannak a ti leksion a mayawid iti balay ket ‘mangparigat unay’ kadagiti annakda isu a ‘di nainkalintegan’ a maikalikagum nga adalenda dayta tapno makapasada kadagiti eksamenasion iti klase.” Imbaga pay ti report a no kanayon a panuynoyan dagiti nagannak ti annakda tapno maliklikan ti panagbinnusor, papaidamanda ida iti “gundaway nga agbalindanto a responsable.” Sigun ken ni Beckmann, dagiti napanuynoyan nga annak ket agbalinto a “naagum nga adulto” a kayatda ti amin ngem dida kayat ti agbannog tapno magun-odanda dayta.

No Apay nga Agtayab Dagiti Tumatayab iti Urnos a Sukog-V

Addaan itan dagiti managsukisok iti ebidensia a naibasar iti panagpaliiw ken eksperimento a dagiti tumatayab a kas kadagiti ganso ken pelikano ket “agtayab iti urnos a sukog-V tapno maksayan ti puersada nga agtayab ken makasalimetmetda iti enerhia iti iyaakarda iti adayo a luglugar,” kuna ti The Daily Telegraph ti London, iti panangilawlawagna iti impadamag ti magasin a Nature. Inammo dagiti sientista manipud iti National Centre of Scientific Research idiay Villiers en Bois, Francia, ti kapartak ti panagpitik dagiti puso ti walo a pelikano a nagtayab iti urnos a sukog-V sada inyasping dagitoy a numero iti “panagpayakpak ken padron iti panagtayab dagitoy.” Natakuatan dagiti managsukisok a bimmuntog ti panagpitik ti puso dagiti tumatayab idi sukog-V ti urnos ti panagtayabda ken manmanoda nga agpayakpak ngem no agsolsoloda nga agtayab, uray no pareho ti kapartakda. “Kadagiti tumatayab nga agtaytayab iti urnos a sukog-V,” kuna ti Nature, “tunggal payak ket matulongan nga agbuelo gapu iti puersa ti angin a patauden ti panagpayakpak ti dadduma a tumatayab a kagiddanna nga agtaytayab.” Daytoy nga estratehia ti makagapu a makasalimetmet dagiti dadakkel ken puraw a pelikano iti inggat’ 20 a porsiento nga ad-adu nga enerhia ngem no agsolsoloda nga agtayab.

Panagbasa iti Biblia Idiay Francia

Nupay adda Biblia ti 42 a porsiento kadagiti Pranses a napagsaludsodan, agarup 2 laeng a porsiento ti nagkuna a dandani kada aldaw a basbasaenda dayta, sigun iti surbey a naipablaak iti periodiko dagiti Katoliko a La Croix. Pitopulo ket dua a porsiento ti nagkuna a “dida pulos basbasaen ti Biblia.” Kadagiti napagsaludsodan, 54 a porsiento ti nangibilang iti Biblia a “daanen a libro” a “di maitunos iti moderno a lubong.” Ilawlawag ti report nga “usigen nga umuna dagiti Pranses ti Biblia manipud iti intelektual a panangmatmat,” ta agsapsapulda iti mangilawlawag “kadagiti namunganayan ti Judaismo ken Kristianidad.” Kuna ti La Croix nga “iti kada tawen, agarup 250,000 a Biblia ken 30,000 a Baro a Tulag ti mailaklako idiay Francia.”

Opisial a Naaprobaran nga Eskuelaan iti Astrolohia

Adda eskuelaan idiay Estados Unidos a “pakasursuruan dagiti estudiante iti panagsurat kadagiti horoscope ken panangted iti pammagbaga maipapan iti masakbayan . . . nga inaprobaran ti maysa nga organisasion a bigbigbigen ti gobierno. Maipagarup a dayta ti kaunaan nga eskuelaan ti astrolohia,” kuna ti The New York Times. Sigun iti nangipasdek iti dayta nga eskuelaan, “makaay-ayo ti astrolohikal a pagilasinan” iti bulan a pannakaaprobarna. Napanaganan dayta iti Astrological Institute. Mairaman kadagiti kurso nga ituktukon ti eskuelaan ti “klase ti maysa a mabigbigbig nga eksperto maipapan kadagiti diosa ti asteroid, wenno kadagiti babassit a planeta iti nagbaetan ti Mars ken Jupiter,” ken ti maysa a klase maipapan iti “pamay-an iti panagsurat iti serye dagiti artikulo ti astrolohia kadagiti magasin wenno periodiko.” Kaaduan a nagturpos ket “mangipasdek iti pribado a negosioda, nupay ti dadduma ket alaen dagiti center a mangtamtaming iti pisikal, mental, ken sosial a kasasaad dagiti pasiente, spa, wenno komersial nga establisimiento nga addaan kadagiti pasilidad para iti panagehersisio ken panagdigus, agraman dagiti pangpasiar a barko.” Kinuna ti Times a “naaprobaran ti eskuelaan . . . kalpasan nga impakitana a kualipikado dagiti mannursurona ken maikari a mangged dagiti nagturpos iti dayta.” Nupay kasta, sigun iti panguluen ti Council for Higher Education Accreditation, “ti pannakaaprobarna dina pasingkedan nga agpayso ti astrolohia, no di ket binigbigna laeng a matungpal ti eskuelaan dagiti karina kadagiti estudiantena.”

Panagdalus Idiay Mount Everest

Nakapimpintas ken nakangayngayed ti gagangay a ladawan ti Mount Everest, ti kangatuan a bantay ditoy daga (29,035 a pie). Nupay kasta, impalgak ti maysa a report iti magasin a Down to Earth idiay New Delhi a nagbalinen a nagdakkel a pagbasuraan ti Mount Everest. Ti ginasut nga umuuli kadagiti bakras ti Everest iti napalabas nga adu a dekada ket nangibati iti tinontonelada a basura, agraman “dagiti awang a tangke ti oksihena, daan nga agdan wenno atiddog a kayo ken plastik a baston.” Ti karurugitan a kampo, kuna ti report, isut’ “kampo ti South Col. Dita ti sang-atan ti kaaduan nga umuuli iti maudi nga isasang-atda agingga iti pantokna.” Kastoy ti kinuna ni Bhumi Lal Lama, maysa nga opisial iti Nepal Mountaineering Association: “Plamplanuenmi a tangdanan [dagiti Sherpa] iti US$13.50 iti kada kilo [2.2 a libra] ti basura a maurnongda.” Sigun iti report, dagiti Sherpa ti “gagangay nga agserbi kas giya ken agawit kadagiti suplay dagiti tattao” nga umuli iti Everest.

Agkibaltang ti “Lualo ti Panagsalamangka”

“Adda lalaki a taga Ghana a natay kalpasan a pinaltogan ti kapurokanna a mangsubsubok iti lualo ti panagsalamangka a nairanta a mamagbalin kenkuana a di masalput ti bala,” kuna ti agipadpadamag a Reuters. Adu a pumurok iti makin-amianan a daya ti Ghana ti nagkiddaw iti maysa a mangkukulam a pagbalinenna ida a di masalput ti bala. “Kalpasan a pinulagidanna ti bagina iti naglalaok a makaagas a mula iti kada aldaw iti las-ud ti dua a lawas,” sigun iti report, ti biktima ket “nagboluntario a mapaltogan tapno makita no agkurri ti lualo.” Natay a dagus ti biktima idi naminsan a napuntaan iti bala. Kalpasanna, ginammatan dagiti nakaunget a pumurok ti mangkukulam sada kinabkabil iti kasta unay gapu ta nagkibaltang ti lualo ti panagsalamangkana. No kayat dagiti agnanaed iti makin-amianan a murdong ti Ghana ti masalakniban manipud kadagiti kalabanda a tribu, masansan nga agkonsultada kadagiti mangkukulam.