[Pananggudas].

 Maysa a siudad iti amianan ti Palestina a nangalaan ni David iti nakaad-adu unay a gambang kalpasan ti panangpapatayna ken Hadadezer (ari ti Zoba) idiay Hamat, agarup 230 km (140 mi) iti amianan nga amianan-a-daya ti Dan. (1Cr 18:3, 8) Iti pumadpada a pannakailadawan ti namilitariaan a kampania ni David iti 2 Samuel 8:8, nalawag a ti Tibat ket naawagan iti Beta. (Kitaenyo ti BETA.) Kunaen ti dadduma a ti nagan ti Tibat ket mabalin a naala iti nagan ti anak ni Nahor a ni Teba. (Ge 22:24) Yantangay ti Tibat ket paset ti Aramaeano a pagarian ti Zoba, nalabit adda dayta iti ginget iti nagbaetan ti bambantay ti Libano ken Anti-Libano. Nasarakan idiay Libano (Lebanon) dagiti tedda ti panagaramid iti gambang idi un-unana, maitunos iti salaysay ti Biblia.