[Heb., ʼagh·mohnʹ].

 Aniaman a kita ti kasla ruot a mulmula a gagangay nga agtubtubo kadagiti aluguog. Dagiti pudpudno a tanutubo ket addaan kadagiti nagtimbukel ken masansan a kasla tubong nga ungkay nga addaan iti tallo nga intar ti kasla ruot a bulbulong, kasta met nga addaan iti babassit a kimmayumanggi wenno bumerde a sabsabong. Ti awag nga ʼagh·mohnʹ mabalin a ramanenna ti nadumaduma a kita dagiti pudpudno a tanutubo kasta met dagiti sinantanutubo a mula iti pamilia ti barsanga.

 Idi un-unana, maar-aramat dagiti tanutubo a pagpasged iti apuy iti maysa nga urno. (Job 41:20) Iti Job 41:2, ti “tanutubo” mabalin a tumukoy iti tiniritir a tanutubo a naaramid a tali wenno iti banag a natibbi manipud kadagiti linabagda.

 Ti dadduma pay a panangtukoy ti Kasuratan iti ʼagh·mohnʹ ket naaramat kas pangiladawan. Saan a naragsakan ni Jehova iti panagayunar dagiti managalsa nga Israelita, a nabuyogan iti seremonial a panangidumog iti ul-uloda kas iti tanutubo. (Isa 58:5) Iti Isaias 9:14, ti “tanutubo” agparang a tumukoy kadagiti ulbod a mammadto (ti “ipus”), a ti isawsawangda ket dagidiay laeng kayat a denggen dagiti panguluen ti nasion ti Israel (ti “ulo,” wenno “saringit”).​—Isa 9:15; kitaenyo met ti Isa 19:15, a sadiay ti “tanutubo” agparang a tumukoy kadagiti Egipcio iti pangkaaduan.