Nagan a tumukoy iti maysa a let-ang ken maysa a siudad.

  1. Maysa a let-ang a rehion nga immakaran dagiti Israelita, agarup makabulan kalpasan ti Ipapanawda manipud Egipto, kalpasan a pinanawanda ti Elim ken ti maysa a pagpakarsuan iti igid ti Nalabaga a Baybay. Kalpasan daytoy a let-ang, adda pay sumagmamano a nagpakarsuanda sakbay a nakadanonda idiay Sinai, ket karaman kadagita a disso isu ti Dofca, Alus, ken Refidim. (Ex 16:1; 17:1; Nu 33:9-15) Idiay Let-ang ti Sin a nagtantanabutob ken nagrekreklamo ti pakarso gapu iti kaawan ti karne. Ditoy nga impagteng ni Jehova a ‘maabbongan ti pakarso’ babaen iti pangen dagiti pugo, ket ditoy met ti damo a nanganan dagiti Israelita iti manna. Ditoy met a nangrugi a maipatungpal ti linteg ti Sabbath.​—Ex 16:2-30.

 Di masigurado ti eksakto nga ayan ti Let-ang ti Sin, nupay nalawag nga adda iti makin-abagatan a laud nga igid ti Peninsula ti Sinai. Kaaduan a geograpo anamonganda ti nadarat a disso a pagaammo kas Debbet er-Ramleh, a masarakan iti sakaanan ti Tanap ti Sinai. Daytoy a desierto ket asideg met iti naisingasing nga ayan ti Dofca.

  2. Karaman ti Sin kadagiti siudad ti Egipto a naikeddeng nga agsagaba gapu iti “kampilan” a  naiyeg iti dayta a daga babaen iti ima ni Ari Nabucodonosor ti Babilonia. (Eze 30:6, 10, 15, 16) Naawagan dayta kas “sarikedked ti Egipto.” Ti sumagmamano nga autoridad ita bigbigenda a daytoy ti Pelusium a naaramat iti Latin a Vulgate. Ti Pelusium ket maysa a kadaanan a sarikedked a siudad a nagpuesto iti kangrunaan a disso a pagdepensaan maibusor iti iraraut manipud kontinente ti Asia. Awaten ti kaaduan a ti ayanna ket katupag ti moderno a Tell el Farame, agarup 32 km (20 mi) iti abagatan a daya ti Port Said iti igid ti Baybay Mediteraneo. No kasta, dagiti sangkakuyogan a managbiahe wenno dagiti buyot a sumalog iti kosta ti Filistia nakitada daytoy a sarikedked a mangbambantay iti iseserrek iti Egipto. Tinukoy daytoy ni Ari Asurbanipal ti Asiria iti rekord ti pakasaritaanna. Ita, ti nagkauna a disso ket nalikmut iti darat ken al-aluguog.