[Heb., pohl].

 Ti Hebreo a termino tumupag iti Arabiko a ful ken mainanaig iti patani, Vicia faba, tinawen a mula a sisasaknap a maimulmula idiay Siria ken Palestina. Daytoy a kita ti patani ket nasarakan kadagiti lungon ti napreserba a bangkay dagiti Egipcio, a mangipasimudaag iti pannakausar dayta idiay Egipto nanipud kadagidi kadaanan a tiempo.

 Naandur ken natakder ti mula, a dumanon iti katayag nga agarup 1 m (3 pie), ken mangpataud iti makaay-ayo a bangbanglo no agsabong. Dagiti naluom a bunga ket dadakkel ken namsek, ket kayumanggi wenno nangisit ti maris dagiti patani. Maimula kalpasan dagiti nasapa a tudo iti otonio, gagangay a maburasda iti naladaw a paset ti primavera iti panagngudo ti panagapit iti sebada ken trigo. Maitaep dagiti mula kas iti bukbukel. Kas pagtaraon, ti berde a di natangkenan a bungbunga mabalin a mailambong a sibubukel kas nateng, idinto ta dagiti naluom a patani masansan a mailuto iti manteka ken karne.

 Idi pimmanaw ni David manipud Jerusalem ken bimmallasiw iti Jordan maigapu iti iyaalsa ni Absalom, nakablaawan ti bunggoyna idiay Mahanaim babaen kadagiti pannakabagi a siboboluntario a nangidiaya iti alikamen ken pagtaraon, a pakairamanan dagiti patani. (2Sm 17:24-29) Nabilin ni Ezequiel nga ilaokna dagiti patani kadagiti lentehas ken bukbukel tapno mangaramid iti nakersang a tinapay a makan a matimbang, mangipasimudaag kadagiti kasasaad bayat ti nakaro a bisin.​—Eze 4:9, 10.