Aniaman a banag a maibilang nga adda ipaspasimudaagna a mapasamak iti masanguanan; maysa a kasasaad wenno pagteng a naipagarup a mangiparpartaan iti naimbag wenno dakes. (Ge 30:27; Nu 24:1) Ti panagsapul kadagiti partaan, kas maysa a kita ti panagpadles, ket espesipiko nga imparit ti linteg ti Dios iti Israel. (Le 19:26; De 18:10) Ngem nagsapul iti partaan dagiti apostata a kas ken Ari Manases ti Juda. (2Ar 17:17; 21:6) Yantangay kondenaren ti Kasuratan daytoy nga aramid, nabatad a ti kinuna ni matalek a Jose maipapan iti pannakaaramat ti pirak a kopana iti panagbasa kadagiti partaan ket paset laeng ti maysa a panangallilaw. (Ge 44:5, 15) Iti kasta nga imbaga ni Jose, impabigbigna ti bagina kas maysa nga administrador iti daga a sadiay agraraira ti ulbod a panagdaydayaw imbes a maysa nga addaan pammati ken Jehova. Iti kasta, saanna nga impasimudaag nga adda aniaman a pakainaiganna kadagiti kakabsatna ket nailimedna kadakuada ti pudno a kinasiasinona.​—Kitaenyo ti PANAGPADLES.