Ti nagan a Kittim ket nailanad kas maysa kadagiti uppat nga “annak” ni Javan, nupay daytoy a nagan ket agparang laeng iti pangadu a porma iti amin a pannakatukoyna iti Kasuratan. (Ge 10:4; 1Cr 1:7) Idi agangay, daytoy a nagan ket nausar a mangirepresentar iti maysa nga ili ken rehion.

 Tinukoy ni Josephus (Jewish Antiquities, I, 128 [vi, 1]) ti Kittim kas “Chethimos” ket innaigna dayta iti Chipre ken iti “nagan a Chethim nga impanagan dagiti Hebreo kadagiti amin nga isla ken iti kaaduan a pagilian nga adda iti igid ti baybay.” Dagiti nagkauna a Feniciano inawaganda iti Kitti dagiti umili ti Chipre. Umanamong ti kaaduan nga autoridad iti agdama a ti Kittim isu ita ti Chipre.

 Ti siudad ti Kition (Citium) iti makin-abagatan a daya nga igid ti baybay ti Chipre ket pagaammo unay kas maysa a kolonia ti Fenicia, isu a matmatan ti dadduma nga eskolar a di maitutop ti pannakailista ti nagan a Kittim kadagiti kaputotan ni Jafet. (Ge 10:2, 4; 1Cr 1:5, 7) Nupay kasta, ipakita ti pammaneknek a naud-udi a dimteng dagiti Feniciano iti Chipre ken maikuna a ti koloniada iti Kition ket nangrugi laeng idi agarup maikasiam a siglo K.K.P. Gapuna, kalpasan a tukoyen ti The New Encyclopædia Britannica (1987, Tomo 3, p. 332) ti Kition kas ti “kangrunaan a siudad ti Fenicia idiay Chipre,” innayonna: “Ti kaunaan a rebrebba idiay Citium ket dagiti rebrebba ti maysa nga Aegeano a kolonia idi Edad Mycenaeano (a. 1400-1100 BC).”​—Kitaenyo met ti Tomo 16, p. 948.

 Mabalin a saklawen ti Kittim ti dadduma pay a lugar malaksid iti isla ti Chipre, kas ipasimudaag ti sasao ni Josephus nga immun-unan a nadakamat maipapan iti Hebreo nga usar daytoy a termino a mangsaklaw iti dadduma pay nga isla ken pagpagilian ti Mediteraneo a baybay ti nagbednganda, a ti Chipre ti kaasitgan (iti Palestina) kadagiti daga ti Kittim. Daytoy ket kasla paneknekan dagiti pannakatukoy kadagiti “isla” wenno kadagiti “daga iti igid ti baybay” ti Kittim iti Ezequiel 27:6 ken Jeremias 2:10. Ibilang ti dadduma a komentarista a ti Kittim ket nausar met iti Numeros 24:24 nga addaan iti kastoy a nalawlawa a kaipapanan. Iti daytoy a teksto, impadto ti mammadto a ni Balaam, a nagbiag a kapanawen ni Moises, a ti Asiria ken Eber ket parigaten ti “barbarko manipud igid ti baybay ti Kittim” ngem inton agangay maparmekto met laeng ti manangraut. Ipakita daytoy a ti panangraut ket nalabit aggapu iti igid ti baybay a rehion ti Macedonia, ti pagilian a rimmautan ni Alejandro a Dakkel, a sadiay pinarmekna ti daga ti “Assur” (Asiria-Babilonia) agraman ti Imperio ti Medo-Persia; kunaen met ti dadduma a dagiti rimmaut ket Romano manipud iti Mediteraneo a dagdaga iti igid ti baybay ti Italia. Iti Numeros 24:24, inusar ti Latin a Vulgate ti “Italia” a kasukat ti “Kittim,” ket iti Targum ni Onkelos “Romano” ti mabasa; ngem inusar ti Apokripa a libro ti 1 Macabeo (1:1, JB) ti Kittim a mangirepresentar iti daga ti Macedonia.

  Iti sasao ni Isaias maibusor iti Tiro, ti Kittim (posible a ti Chipre) ti disso a pakadamagan dagiti agpadaya a barko ti Tarsis maipapan iti pannakarba ti Tiro, ket “ti birhen nga anak a babai ti Sidon” binilin ni Jehova a ‘bumallasiw nga agturong idiay mismo a Kittim,’ iti awan mamaayna a panagregget nga agsapul iti pagkamangan. (Isa 23:1, 11, 12) Maitunos daytoy iti pammaneknek ti pakasaritaan nga adda dagiti kolonia ti Fenicia idiay Chipre idi tiempo ti panagipadto ni Isaias (a. 778-a. 732 K.K.P.). Salaysayen ti maysa a kitikit ni Senaquerib ti panaglibas ni Ari Luli ti Sidon nga agturong iti isla ti Iadnana (Chipre) kas resulta ti iraraut ti Asiria. (Ancient Near Eastern Texts, inurnos ni J. Pritchard, 1974, p. 287, 288) Umasping iti dayta, nabatad nga adu manipud Tiro ti nagkamang idiay Chipre bayat ti 13-tawen a pananglakub ni Nabucodonosor iti Tiro, kas kaitungpalan ti impakaammo ni Isaias.

 Ti maudi a pannakadakamat ti Kittim (a dayta a nagan ti naaramat) ket masarakan iti padto ni Daniel maipapan iti panagsinnalisal ti “ari ti amianan” ken “ari ti abagatan,” a sadiay ti iraraut ti “ari ti amianan” ket linapdan “dagiti barko ti Kittim.”​—Da 11:30; kitaenyo ti CHIPRE.