[Purok].

 Maysa a siudad dagiti Heveo (Jos 9:7, 17), ken maysa kadagiti uppat a siudad a karaman kadagiti imbagian dagiti embahador a Gabaonita. Siuulbod a kinuna dagitoy nga embahador a naggapuda iti adayo a daga, iti kasta nabalinanda ti mangaramid iti maysa a tulag kadagiti Israelita nga idadauluan idi ni Josue. (Jos 9:3-27) Nalaka a mailasin ita ti Kefira, a maikunkuna nga isu ti nalawa ken di mapagnanaedan a rebrebba nga adda iti tapaw ti maysa a sigud a natukantukad a pangdepensa a padpader idiay Khirbet Kefireh, 7 km (4.5 mi) iti laud nga abagatan-a-laud ti el-Jib (Gabaon). Gapu iti daytoy estratehiko a posision ti Kefira, nasaluadan ti Gabaon manipud iyaasideg dagiti puersa ti kabusor a sumungad iti laud. Idi tiempo ti pannakabingbingay ti Naikari a Daga, adda ti Kefira iti las-ud ti tawid ti Benjamin (Jos 18:26), ket kalpasan ti pannakaidestiero, maysa ti Kefira kadagiti siudad a napagnaedan manen.​—Esd 2:1, 25; Ne 7:29.