[Isu Nangipaay iti Parabur; Isu Nakaparparabur].

  1. Anak ni Nahas nga ari ti Ammon ken sunona iti trono. Gapu iti naayat a kinamanangngaasi nga impaay kenkuana ni Nahas, nangibaon ni David kadagiti mensahero tapno liwliwaenda ni Hanun maigapu iti ipupusay ni amana. Ngem ni Hanun, yantangay nakombinsir kadagiti prinsipena a daytoy ket kinasikap laeng ni David tapno masimisimda ti siudad, imbabainna dagiti adipen ni David babaen ti panangkiskisna iti kagudua dagiti barbasda ket pinutedna a ginudua dagiti kawesda agingga kadagiti patongda ket kalpasanna pinapanawna ida. Idi nakita dagiti annak ni Ammon a nagbalinda a naangot ken David gapu iti panangibabainda kadagiti mensaherona, dagus a nagtignay ni Hanun tapno agsagana maipaay iti gubat ket tinangdananna dagiti Sirio tapno makirupakda iti Israel. Kadagiti simmaganad a dangadang, ti Israel naan-anay nga inabakna dagiti Ammonita ken dagiti Sirio; dagiti nakalasat nga Ammonita ti Rabba intuding ni David iti pinuersa a panagtrabaho.​—2Sm 10:1–11:1; 12:26-31; 1Cr 19:1–20:3.

  2. Daydiay nangtarimaan iti Ruangan ti Ginget ken iti dadduma a paset ti pader ti Jerusalem, a kaduana dagiti agnanaed iti Zanoa.​—Ne 3:13.

  3. Ti “maikanem nga anak ni Zalaf”; inaramidna ti panagtarimaan iti pader ti Jerusalem.​—Ne 3:30.