Ti Hebreo a termino a netsivʹ mabalin a tumukoy iti agarup permanente a grupo dagiti soldado a naisaad iti maysa a kampo militar. Ti nainaig a Hebreo a sao a mats·tsavʹ (kampo) addaan iti umasping a kapanunotan.​—1Sm 13:23; 14:1, 4, 6, 11, 12, 15; 2Sm 23:14.

 Addaan idi dagiti Filisteo kadagiti garison iti teritoria dagiti Israelita bayat dagiti panagturay da Saul ken David. (1Sm 10:5; 13:3, 4; 1Cr 11:16) Kalpasan a pinarmek ni David ti Siria ken Edom, nangtaginayon kadagiti garison iti teritoriada tapno malapdan ti panagrebelde. (2Sm 8:6, 14; 1Cr 18:13) Maipaay iti talna ken kinatalged ti daga, nangisaad ni Jehosafat kadagiti garison idiay Juda ken kadagiti siudad ti Efraim a kinautibo ni Asa. (2Cr 17:1, 2) Ti kaadda ti kasta a bagi ti militar adu ti naaramidanna tapno mataginayon ti urnos ken masalakniban dagiti naarian a pagimbagan kadagiti teritoria a mabalbalin a pagrebeldean dagiti katutubo nga agnanaed.

 Ti maysa a garison ti Roma nataginayon idiay Jerusalem bayat ti umuna a siglo K.P. Dagiti kuartelda adda iti nangato a Torre ti Antonia a dumna iti arubayan ti templo. Idi a ti maysa a bunggoy dagiti Judio inulod-ulodda ni Pablo iti ruar ti templo ken inkagumaanda a papatayen, nabalinan dagiti soldado iti garison ti nakadardaras a bumaba a mangispal kenkuana. (Ara 21:31, 32) Bayat dagiti panawen ti piesta dagiti Judio, naiyeg dagiti kanayonan a soldado tapno papigsaenda daytoy a garison.​—Kitaenyo ti ANTONIA, TORRE TI.