[mabalin nga, Asuk].

 Siudad iti Sefela wenno patad a rehion ti Juda. Sigud a naituding iti Juda, kalpasanna naited iti Simeon, agsipud ta nakadakdakkel unay ti teritoria ti Juda. (Jos 15:42; 19:7, 9; 1Cr 4:32) Manipud kadagiti Simeonita naited dayta iti Levita a pamilia dagiti Cohatita. (1Cr 6:54, 59) Tukoyen ti 1 Samuel 30:30 ti “Borasan” kas maysa kadagiti siudad iti rehion a pinatulodan ni David kadagiti samsam kalpasan a pinarmekna dagiti Amalekita, ket pagarupen ti sumagmamano nga isu met laeng daytoy ti Asan. Nailanad iti Josue 21:16 ti listaan dagiti siudad a naited kadagiti Cohatita, kapadpada dayta ti listaan nga adda iti 1 Cronicas 6:59, ngem iti listaan iti Josue nailanad ti “Ain” imbes nga Asan. Ti Soncino Books of the Bible (London, 1950), iti panagkomentona maipapan iti teksto, isingasingna a mabalin nga Ain-asan ti kompleto a nagan ti siudad.

 Adu ti mangikuna a ti Asan isu ti Khirbet ʽAsan a masarakan iti agarup 2.5 km (1.5 mi) iti amianan a laud ti agdama a Beer-seba, iti sibay ti Nahal ʽAshan. Kunaen ni Yohanan Aharoni a ti Asan ket isu ti Tel Bet Mirsham, 25 km (16 mi) iti amianan nga amianan-a-daya ti Beer-seba.