[Mapagpiaran; Matalek; Manayon].

  1. Inauna nga anak ni David babaen ken Ahinoam a Jezraelita, nayanak idiay Hebron.​—2Sm 3:2; 1Cr 3:1.

 Napatanor ni Amnon ti naderrep a panaggartemna ken nalibnos a Tamar, kabsat a babai ni Absalom, agingga a nagsakit gapu iti ayat. Kas panangsurot iti balakad ti kasinsinna a ni Jehonadab, naginsasakit ni Amnon ket inallukoyna ni Ari David a mangibaon ken Tamar kadagiti pribado a kuartel ni Amnon tapno mangisagana iti sanguananna iti “tinapay a pangliwliwa.” Ginundawayanna ngarud a ramesen ti kabsatna iti ama, nupay nagpakpakaasi ken nakirinnason kenkuana ni Tamar. Ti kaso ni Amnon iladawanna a ti dinederrep nga ayat mabalin nga agbanag iti kasta unay a kinamanagimbubukodan, agsipud ta idi napenneknan ti panaggartemna, imbilinna a maparuar ni Tamar iti kalsada a kasla maysa a makadurmen kenkuana, a narugit ti panagrikriknana uray laeng ti mismo a kaadda ni Tamar.​—2Sm 13:1-19.

 Ti kabsat ni Tamar iti ama ken ina, ni Absalom, nagimula iti gura maibusor ken Amnon gapu iti daytoy nga aramid; ket dua a tawen kalpasanna bayat ti piesta ti panagpukis iti karnero, binilin ni Absalom dagiti adipenna a papatayenda ni  Ammon bayat nga “agragragsak iti arak.” (2Sm 13:20-29) Ni Amnon, nga inauna nga anak ni David, ti mainanama idi nga agtawid iti trono. Gapuna, ti ipapatayna mabalin a tinarigagayan met ni Absalom agsipud ta babaen iti dayta dakdakkel ti posibilidad a magun-odna ti kinaari. Iti daytoy a pasamak, nangrugi a matungpal ti impadto ni Natan a pagbanagan ti dakes nga inaramid ni David iti asawa ni Urias.​—2Sm 12:10; kitaenyo ti ABSALOM.

  2. Ti umuna a nailanad iti listaan ti uppat nga annak ni Shimon, iti tribu ni Juda.​—1Cr 4:1, 20.