Marcos 6:1-56
6 Ket isu pimmanaw sadiay ket dimteng iti taengna nga ili, ket simmurot kenkuana dagiti adalanna.+
2 Idi dimteng ti sabbath, rinugianna ti mangisuro idiay sinagoga; ket nagsiddaaw unay ti ad-adu kadagidiay agim-imdeng ket kinunada: “Sadino ti nangalaan daytoy a tao kadagitoy a banag?+ Ket apay a daytoy a sirib naited itoy a tao, ken dagiti kasta a mannakabalin nga aramid maaramidda babaen kadagiti imana?
3 Saan kadi a daytoy ti allawagi+ nga anak ni Maria+ ken kabsat da Santiago+ ken Jose ken Judas ken Simon?+ Ket saan aya a ti kakabsatna a babbai addada ditoy a kaduatayo?” Gapuna nangrugida a maitibkol kenkuana.+
4 Ngem kinuna kadakuada ni Jesus: “Awan ti mammadto a di mapadayawan malaksid iti taengna nga ili+ ken iti tengnga dagiti kabagianna ken iti bukodna a balay.”+
5 Gapuna saan a nakapagaramid sadiay iti mannakabalin nga aramid malaksid ti panangipatay kadagiti imana iti sumagmamano a masaksakit ket agasanna ida.
6 Pudno unay, isu nagsiddaaw iti kaawan ti pammatida. Ket linawlawna dagiti purok iti maysa a sirkito, a nangisursuro.+
7 Ita inayabanna ti sangapulo ket dua, ket inrugina nga imbaon ida a sagdudua,+ ken rinugianna nga ipaayan ida iti autoridad kadagiti narugit nga espiritu.+
8 Kasta met, impaayanna ida kadagiti bilin a saanda a mangitugot iti aniaman a maipaay iti panagdaliasat malaksid laeng iti sarukod, awan tinapay, awan supot ti taraon,+ awan kuarta a gambang kadagiti supot a barikesda,+
9 no di ket mangisuotda kadagiti palloka, ket saanda nga agkawes iti dua a makin-uneg a kawes.+
10 Kanayonanna, kinunana kadakuada: “Sadinoman a serkanyo a pagtaengan,+ agyankayo sadiay agingga a rummuarkayo iti dayta a lugar.+
11 Ket sadinoman a lugar a saandakayto nga awaten wenno denggen, iti iruruaryo sadiay pampagenyo ti rugit nga adda iti baba dagiti sakayo maipaay a pangsaksi kadakuada.”+
12 Gapuna napanda ket nangasabada tapno dagiti tattao agbabawida+ koma;
13 ket paruarenda ti adu a sairo+ ket ti adu a masaksakit a tattao sapsapuanda iti lana+ ket agasanda ida.+
14 Itan nakagteng dayta kadagiti lapayag ni Ari Herodes, ta ti nagan ni Jesus naglatak, ket kinunkuna dagiti tattao: “Ni Juan a manangbautisar naibangon kadagiti natay, ket gapu iti dayta agtigtignay kenkuana dagiti mannakabalin nga aramid.”+
15 Ngem kinunkuna ti dadduma: “Isu ni Elias.”+ Kaskasdi kinunkuna ti dadduma: “Isu ket mammadto kas iti maysa kadagiti mammadto.”+
16 Ngem idi nangngeg dayta ni Herodes kinunana: “Ti Juan a pinutolak, daytoy ket napagungar.”+
17 Ta ni Herodes a mismo nagbaon idi ket inarestona ni Juan ket pinarautanna idiay pagbaludan maigapu ken ni Herodias nga asawa ni Felipe a kabsatna, agsipud ta isu inasawana.+
18 Ta ni Juan maulit-ulit a kinunana ken Herodes: “Saan a nainkalintegan a kupikopam ti asawa ni kabsatmo.”+
19 Ngem ing-ingpen idi ni Herodias ti sakit ti nakem+ maibusor kenkuana ket kayatna a papatayen, ngem saanna a mabalinan.+
20 Ta ni Herodes mabutbuteng+ idi ken Juan, yantangay ammona nga isu nalinteg ken nasantuan a tao;+ ket ay-aywananna idi a sitatalged. Ket kalpasan nga isu nangngeganna+ nariribukan unay no ania ti aramidenna, kaskasdi siraragsak nga intultuloyna ti panangdengngeg kenkuana.
21 Ngem dimteng ti maysa a mainugot nga aldaw+ idi a ni Herodes nangisagana iti pangrabii iti kasangayna+ maipaay kadagiti nangato ti saadna a tattaona ken dagiti komandante ti militar ken dagiti kangrunaan ti Galilea.
22 Ket ti anak a babai daytoy met laeng a Herodias simrek ken nagsala ket naay-ayona ni Herodes ken dagidiay sisasadag+ a kaduana. Kinuna ti ari iti balasang: “Dawatem kaniak ti aniaman a kayatmo, ket itedkonto kenka dayta.”
23 Wen, insapatana kenkuana: “Uray aniaman ti dawatem kaniak, itedkonto kenka dayta,+ agingga iti gudua ti pagariak.”+
24 Ket rimmuar ket kinunana ken inana: “Ania ti rebbeng a dawatek?” Kinunana: “Ti ulo ni Juan a manangbautisar.”+
25 Dagus a simrek a sigaganat a napan iti ari ket nagkiddaw, a kunkunana: “Kayatko nga itedmo kaniak ita met laeng iti maysa a bandeha ti ulo ni Juan a Mammautisar.”
26 Nupay nagleddaang unay, kaskasdi ti ari saanna a kayat a laksiden, gapu kadagiti sapata ken kadagidiay sisasadag iti panganan.+
27 Gapuna ti ari dagus a nangibaon iti para-guardia ket imbilinna kenkuana nga iyegna ti ulona. Ket napan ket pinutolanna idiay pagbaludan+
28 ket inyegna ti ulona iti maysa a bandeha, ket intedna iti balasang, ket ti balasang intedna ken inana.+
29 Idi a dagiti adalanna nangngegda dayta immayda ket innalada ti bangkayna ket inkabilda iti maysa a pakalaglagipan a tanem.+
30 Ket naguurnong a sangsangkamaysa dagiti apostol iti sanguanan ni Jesus ket impadamagda kenkuana ti amin a bambanag nga inaramidda ken insuroda.+
31 Ket kinunana kadakuada: “Umaykayo a pribado, dakayo, iti langalang a lugar+ ket aginanakayo iti apagbiit.”+ Ta adu idi ti um-umay ken mapmapan, ket awan ti nawaya a tiempoda uray pannangan laeng koma.+
32 Gapuna napanda a nakabarangay iti maysa a langalang a lugar nga is-isuda.+
33 Ngem dagiti tattao nakitada ida a mapmapan ket adu ti nakaammo iti dayta, ket manipud kadagiti amin a siudad nagtatarayda sadiay a sangsangkamaysa ket nakagtengda nga immun-una ngem isuda.+
34 Ala ket, idi makadissaag, nakitana ti maysa a dakkel a bunggoy, ngem simnek ti asina+ kadakuada, agsipud ta kaslada karkarnero nga awanan pastor.+ Ket rinugianna nga isuro ida iti adu a banag.+
35 Itan ti oras rumabiin, ket immasideg kenkuana dagiti adalanna ket rinugianda a kunaen: “Ti lugar naiputputong, ket ti oras rumabiin.+
36 Baonem ida, tapno mapanda iti aw-away ken kadagiti purok iti aglikmut ket gumatangda iti makan.”+
37 Kas sungbat kinunana kadakuada: “Ikkanyo ida iti makan.” Gapu itoy kinunada kenkuana: “Mapankami kadi ket gumatangkami iti tinapay a dua gasut a denario ti pategda ket itedmi ida kadagiti tattao tapno kanenda?”+
38 Kinunana kadakuada: “Mano a tinapay ti adda kadakayo? Mapanyo kitaen!” Kalpasan a naammuanda, kinunada: “Lima, malaksid iti dua nga ikan.”+
39 Ket binilinna amin dagiti tattao nga agdalupisakda a binungbunggoy+ iti berde a karuotan.+
40 Ket nagdalupisakda a nabunggobunggoy iti sagsasangagasut ken iti saglilimapulo.+
41 Idi innalanan ti lima a tinapay ken ti dua nga ikan isu timmangad sadi langit ket nangisao iti pamendision,+ ket pinispisina+ dagiti tinapay ket rinugianna nga inted ida kadagiti adalan, tapno dagitoy maipasangoda ida kadagiti tattao; ket biningbingayna ti dua nga ikan maipaay iti isuamin.
42 Gapuna nanganda amin ket napnekda;+
43 ket inurnongda dagiti pispisi, sangapulo ket dua a labba a napno, malaksid kadagiti ikan.
44 Kanayonanna pay, dagidiay nangan kadagiti tinapay lima ribuda a lallaki.+
45 Ket, awanan panagtaktak, indagadagna kadagiti adalanna a lumuganda iti barangay ket mapanda nga umun-una iti ballasiw nga igid ti baybay nga agturong idiay Betsaida, bayat nga isu pinagawidna ti bunggoy.+
46 Ngem kalpasan a nagpakada kadakuada napan iti maysa a bantay tapno agkararag.+
47 Itan dimtengen ti rabii, ti barangay adda iti tengnga ti baybay, ngem isu agmaymaysa iti daga.+
48 Ket idi nakitana a marigrigatanda iti panaggaudda,+ ta ti angin sumuba idi kadakuada, iti agarup maikapat a panagbantay iti rabii isu immay kadakuada, a magmagna iti rabaw ti baybay; ngem kayatna idi a labsan ida.
49 Idi makitada a magmagna iti rabaw ti baybay impagarupda: “Al-alia dayta!” ket nagikkisda a sipipigsa.+
50 Ta isu nakitada amin ket nariribukanda. Ngem dagus a nakisao kadakuada, ket kinunana kadakuada: “Bumilegkayo, siak daytoy; dikay agbuteng.”+
51 Ket nakilugan kadakuada iti barangay, ket ti angin nagtalna. Gapu itoy nagsiddaawda unay iti unegda,+
52 ta saanda a natarusan ti kaipapanan dagiti tinapay, no di ket dagiti pusoda nagtalinaed a ngelngel iti pannakaawat.+
53 Ket idi nakaballasiwdan nga agturong iti daga, dimtengda idiay Genesaret ket inyangklada ti barko iti asideg.+
54 Ngem apaman a nakadissaagda iti barangay, isu nailasin dagiti tattao,
55 ket nagtarayda iti intero nga aglawlaw dayta a rehion ket rinugianda nga awiten kadagiti langkapi dagidiay masaksakit nga ipan sadiay nangngegda nga ayanna.
56 Ket sadinoman a serkanna a purpurok wenno siudad wenno aw-away+ ikabilda dagiti masaksakit kadagiti plasa, ket agpakaasida kenkuana a sagidenda+ uray laeng koma ti barayubay+ ti makinruar a kawesna. Ket amin dagiti nangsagid iti dayta immimbagda.+
