Marcos 4:1-41
4 Ket rinugianna manen ti mangisuro idiay igid ti baybay.+ Ket maysa a dakkel unay a bunggoy ti naguurnong iti asidegna, iti kasta isu limmugan iti maysa a barangay ket intugawna idiay baybay, ngem ti intero a bunggoy iti igid ti baybay addada idi iti takdang.+
2 Gapuna rinugianna nga isuro ida iti adu a banag kadagiti pangngarig+ ken kunaen kadakuada iti panangisurona:+
3 “Agimdengkayo. Adtoy! Ti managmula rimmuar tapno agimula.+
4 Ket bayat nga agimulmula, sumagmamano a bin-i ti nagdisso iti igid ti dalan, ket immay dagiti tumatayab ket kinnanda dayta.+
5 Ket ti sabali a bin-i nagdisso iti kabatuan a sadiay, siempre, awanan iti adu a daga, ket dagus a nagtubo gapu iti kaawan ti nauneg a dagana.+
6 Ngem idi limgak ti init, nalaylay, ket gapu iti kaawan ti ramutna nagango.+
7 Ket ti sabali a bin-i nagdisso iti baet dagiti sisiitan, ket dimmakkel dagiti sisiitan ket lineppesda dayta, ket saan a nagbunga.+
8 Ngem ti dadduma nagdisso iti nasayaat a daga,+ ket, idi timmubo ken rimmang-ayda, nangrugida nga agbunga, ket nangpataudda iti saggatlopulo, ken innem a pulo ken sangagasut.”+
9 Gapuna innayonna ti sao a: “Ti addaan kadagiti lapayag a pagimdeng agimdeng koma.”+
10 Ita idi agmaymaysan, dagidiay adda iti aglawlawna agraman ti sangapulo ket dua rinugianda a saludsodan maipapan kadagiti pangngarig.+
11 Ket kinunana kadakuada: “Naited kadakayo ti sagrado a palimed+ ti pagarian ti Dios, ngem kadagidiay taga ruar amin a bambanag mapasamakda kadagiti pangngarig,+
12 tapno iti kasta, nupay kumitkitada, kumitada ket kaskasdi a saanda a makita, ket, nupay dumdumngegda, dumngegda ngem kaskasdi a saanda a matarusan ti kababagas dayta, saanda met a pulos agsubli ket maipaayanda iti pammakawan.”+
13 Kanayonanna, kinunana kadakuada: “Dikay ammo daytoy a pangngarig, ket ngarud kasano a maawatanyonto amin dagiti dadduma pay a pangngarig?
14 “Ti managmula agimula iti sao.+
15 Dagitoy, ngarud, dagidiay adda iti igid ti dalan a nakaimulaan ti sao; ngem apaman a nangngegda dayta umay ni Satanas+ ket ikkatenna ti sao a naimula kadakuada.+
16 Ket kasta met a dagitoy isuda dagidiay naimula kadagiti kabatuan: apaman a nangngegda ti sao, awatenda a sirarag-o.+
17 Kaskasdi nga awananda a mismo iti ramut, ngem agtalinaedda iti apagbiit; kalpasanna apaman a tumaud ti rigat wenno pannakaidadanes gapu iti sao, maitibkolda.+
18 Kaskasdi nga adda dadduma a naimula iti nagbabaetan dagiti sisiitan; dagitoy isuda dagidiay nakangngeg iti sao,+
19 ngem dagiti pakaringgoran+ daytoy a sistema ti bambanag ken ti makaallilaw a pannakabalin ti kinabaknang+ ken dagiti panagtarigagay+ iti sabsabali pay a bambanag sumrekda ket leppesenda ti sao, ket agbalin a di nabunga.+
20 Kamaudiananna, dagidiay naimula iti nasayaat a daga isuda dagidiay agimdeng iti sao ket siaannugot nga awatenda dayta ket agbungada iti saggatlopulo ken innem a pulo ken sangagasut.”+
21 Ket intultuloyna a kunaen kadakuada: “Maiyeg kadi ti maysa a pagsilawan tapno maikabil iti sirok ti pagsukat a labba wenno iti sirok ti pagiddaan? Saan kadi a maiyeg dayta tapno maikabil iti pagsaadan ti silaw?+
22 Ta awan ti banag a nailemmeng malaksid no iti panggep a pannakaibutaktak; awan ti banag a siaannad a naitalimeng no di iti panggep a pannakailatak.+
23 Siasinoman nga addaan kadagiti lapayag a pagimdeng, agimdeng koma.”+
24 Kinunana pay kadakuada: “Ipangagyo no ania ti mangmangngegyo.+ Iti rukod a pangrukrukodyo, daytanto ti pakarukodanyo,+ wen, ad-adunto pay ti mainayon kadakayo.+
25 Ta ti addaan ad-adunto pay ti maited kenkuana; ngem ti awanan, uray ti adda kenkuana maikkatto kenkuana.”+
26 Gapuna intultuloyna a kunaen: “Iti kastoy a pamay-an, ti pagarian ti Dios ket kas no mangipuruak ti maysa a tao iti bin-i iti daga,+
27 ket maturog iti rabii ken bumangon iti aldaw, ket ti bin-i agtubo ken dumakkel, saanna nga ammo no kasano.+
28 Iti bukbukodna agin-inut nga agbunga ti daga, umuna ti bulong ti ruot, kalpasanna ti dawa iti ungkay, kamaudiananna ti namsek a bukel iti dawa.
29 Ngem apaman nga ipalubosen ti bunga, iserrekna ti kumpay, agsipud ta dimtengen ti tiempo ti panagani.”
30 Ket intultuloyna a kunaen: “Iti ania ti pangyaspingantayo iti pagarian ti Dios, wenno iti ania a pangngarig nga iparangtayo dayta?+
31 Umasping iti bukel ti mustasa, nga iti tiempo ti pannakaimulana iti daga isu ti kababassitan kadagiti amin a bukel nga adda ditoy daga+—
32 ngem inton naimulan, tumubo ket agbalin a dakdakkel ngem ti amin a sabsabali pay a nateng ken mangpataud kadagiti dadakkel a sanga,+ iti kasta dagiti tumatayab iti langit+ makasarakda ti pagaponan iti sidong ti linongna.”+
33 Gapuna babaen iti kasta a kita ti adu a pangngarig+ sawenna ti sao kadakuada, agingga iti kabaelanda nga imdengan.
34 Pudno unay, no awan pangngarig saan nga agsao kadakuada, ngem iti pribado ilawlawagna ti amin a bambanag kadagiti adalanna.+
35 Ket iti dayta nga aldaw, idi dimtengen ti rabii, kinunana kadakuada: “Bumallasiwtayo iti bangir nga igid ti baybay.”+
36 Gapuna, kalpasan a napagawiddan ti bunggoy, isu impanda a nakabarangay, a kastana idi, ket adda idi sabsabali pay a barangay a naikuyog kenkuana.+
37 Ita giddato a dimteng ti dakkel a nadawel nga allawig, ket dagiti dalluyon immabla-ablatda iti barangay, iti kasta ngannganin matinep ti barangay.+
38 Ngem isu adda iti kutit, a matmaturog a sipupungan. Gapuna riniingda ket kinunada kenkuana: “Mannursuro, saanka aya maseknan a mapukawkamin?”+
39 Gapu iti dayta bimmangon ket binabalawna ti angin ken kinunana iti baybay: “Agtalnaka! Agulimekka!”+ Ket nagtalna ti angin, ket naglinak unay.+
40 Gapuna kinunana kadakuada: “Apay nga agkullayaw dagiti pusoyo? Awanankay pay laeng kadi iti aniaman a pammati?”
41 Ngem nakariknada iti nagpaiduma a panagbuteng, ket kunaenda iti maysa ken maysa: “Siasino a pudpudno daytoy, agsipud ta uray ti angin ken ti baybay agtulnogda kenkuana?”+
