Filipos 2:1-30
2 No, ngarud, adda aniaman a pammaregta ken Kristo,+ no adda aniaman a pangliwliwa ti ayat, no adda aniaman a panangiranud iti espiritu,+ no adda aniaman a kinalailo+ ken panangngaasi,
2 an-anayenyo ti rag-ok iti panagmaymaysayo iti panunot+ ken panagmaymaysayo iti ayat, a mapagtitiponkayo a sangsangkamaysa iti kararua, a salimetmetanyo ti maymaysa a panunot iti isip,+
3 nga awan ti aniaman nga aramidenyo gapu iti rinnupir+ wenno gapu iti panangipasindayaw iti bagi,+ no di ket buyogen ti kinapakumbaba iti isip nga ibilangyo a ti dadduma nangatngatoda+ ngem dakayo,
4 nga itultuloyyo a kitaen, saan a ti personal a panaginteres iti laeng bukodyo a bambanag,+ no di ket kasta met ti personal a panaginteres iti bambanag ti sabsabali.+
5 Pagtalinaedenyo kadakayo daytoy a kababalin iti isip nga adda met ken Kristo Jesus,+
6 a, nupay adda idi iti langa ti Dios,+ saanna a pinanunot ti panangagaw, kayatna a sawen, nga isu makipada koma iti Dios.+
7 Saan, no di ket inuksobanna ti bagina ket innalana ti langa ti maysa nga adipen+ ket nagbalin a kaas-asping ti tattao.+
8 Ad-adda pay ngem dayta, idi nasarakanna ti bagina iti langa a kas maysa a tao,+ impakumbabana ti bagina ket nagtulnog agingga iti ipapatay,+ wen, ipapatay iti kayo a pagtutuokan.+
9 Iti daytoy met laeng a rason isu intan-ok ti Dios iti nangatngato a saad+ ket siaasi nga inikkanna iti nagan a nangatngato ngem iti tunggal sabali pay a nagan,+
10 tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga,+
11 ket sipapanayag a bigbigen koma ti tunggal dila+ a ni Jesu-Kristo ket Apo+ iti dayag ti Dios nga Ama.+
12 Iti kasta, dungdungnguek, iti wagas a kankanayon a panagtulnogyo,+ saan laeng a kabayatan ti kaaddak, no di ket ad-adda pay a sisasagana ita kabayatan ti kaawanko, itultuloyyo nga itrabaho ti bukodyo a pannakaisalakan buyogen ti buteng+ ken panagpigerger;
13 ta ti Dios isu daydiay, maigapu iti pakaragsakanna unay, agtigtignay kadakayo+ tapno agpadpada nga agtarigagay ken agtignaykayo.+
14 Itultuloyyo nga aramiden ti amin a bambanag nga awan panagtantanabutob+ ken panagririkiar,+
15 tapno awan pakababalawanyo+ ken natarnawkay koma, annak+ ti Dios nga awan pakapilawanna iti tengnga ti nakillo ken tiritir a kaputotan,+ nga iti tengngada agsilsilnagkayo kas silsilaw iti lubong,+
16 a taginayonenyo ti nairut a panangpetpet iti sao ti biag,+ tapno maaddaanak iti pakaigapuan ti panagrag-o iti aldaw ni Kristo,+ a saanak a nagtaray nga awan mamaayna wenno nagtrabaho a sipipinget nga awan mamaayna.+
17 Nupay kasta, uray pay no maiparparukpokak a kasla daton nga inumen+ iti rabaw ti sakripisio+ ken publiko a panagserbi a nangiturongan kadakayo ti pammati,+ maragsakanak ken makipagrag-oak+ kadakayo amin.
18 Ita iti isu met laeng a wagas dakayo agragsakkayo met ken makipagrag-okayo kaniak.+
19 Iti biangko mangin-inanamaak ken Apo Jesus nga ibaonko kadakayo ni Timoteo iti mabiit, tapno agbalinak koma a maysa a maay-ayatan a kararua+ inton maammuak ti maipapan iti bambanag a mainaig kadakayo.
20 Ta awanen kaniak ti sabali pay nga addaan kababalin a kas kenkuana a sipupudno a mangisakitto+ iti bambanag maipapan kadakayo.
21 Ta amin dagiti dadduma sapsapulenda dagiti bukodda a pagimbagan,+ saan a dagidiay ken Kristo Jesus.
22 Ngem ammoyo ti pammaneknek nga impaayna maipapan ti bagina, a kas iti maysa nga anak+ iti ama isu nagpaadipen a kaduak iti pannakaidur-as ti naimbag a damag.
23 Daytoy, ngarud, ti tao a namnamaek nga ibaon apaman a makitak no ania ti kasasaad ti bambanag maipapan kaniak.
24 Kinapudnona, agtalekak iti Apo nga umayakto met a mismo iti mabiit.+
25 Nupay kasta, ibilangko a masapul nga ibaonko kadakayo ni Epafrodito,+ a kabsatko ken katrabahuak+ ken padak a soldado,+ ngem babaonenyo ken pribado nga adipen iti pakasapulak,
26 yantangay il-iliwenna a makitanakay amin ket maldaangan agsipud ta nangngegyo nga isu nagsakit.
27 Ay, wen, nagsakit agingga a nagistayan natay; ngem ti Dios naasian+ kenkuana, iti kinapudnona, saan laeng a kenkuana, no di ket kasta met kaniak, tapno saan nga agsusukot ti ladingitko.
28 Gapuna buyogen ti dakdakkel a kinaganat isu ibaonko, tapno inton makitayo agrag-okayo koma manen ket siak ti ad-adda a mawayawayaan iti ladingit.
29 Gapuna ipaayanyo iti nakayugalian a panangabrasa+ iti Apo buyogen ti isuamin a rag-o; ket itultuloyyo nga ibilang a maipatpateg dagiti kasta a kita ti tattao,+
30 agsipud ta maigapu iti trabaho ti Apo isu nganngani natay, nga isarsarangna ti kararuana iti peggad,+ tapno naan-anay a masandianna ti kaawanyo ditoy a mangipaay iti pribado a panagserbi kaniak.+
