Filipos 3:1-21
3 Kamaudiananna, kakabsatko, agtultuloykayo nga agrag-o iti Apo.+ Ti panangisurat iti isu met laeng a bambanag kadakayo saan a makariribuk kaniak, no di ket agpaay iti kinatalgedyo.
2 Siputanyo dagiti aso,+ siputanyo dagiti managaramid iti pannakadangran, siputanyo dagidiay mangputed iti lasag.+
3 Ta datayo dagidiay addaan iti pudno a pannakakugit,+ a mangipapaay iti sagrado a panagserbi babaen iti espiritu ti Dios+ ket adda panagpasindayagtayo ken Kristo Jesus+ ket awan panagtalektayo iti lasag,+
4 nupay siak, no adda asinoman, addaanak kadagiti pangibatayan iti panagtalek met iti lasag.
No ti asinoman a sabali a tao pagarupenna nga addaan kadagiti pangibatayan iti panagtalek iti lasag, nangnangrunaak pay:+
5 nakugit iti maikawalo nga aldaw,+ nagtaud iti kapuonan ti pamilia ti Israel, iti tribu ni Benjamin,+ maysa a Hebreo a nayanak manipud kadagiti Hebreo;+ no maipapan iti linteg, maysa a Fariseo;+
6 no maipapan iti regta, nangidadanes iti kongregasion;+ no maipapan iti kinalinteg a babaen iti linteg, maysa a nangpaneknek iti bagina nga awan pakababalawanna.
7 Kaskasdi ti bambanag a gunggona kaniak idi, dagitoy imbilangko kas pukaw maigapu iti Kristo.+
8 Ay ket, maipapan iti dayta a banag, pudno nga ibilangko met ti amin a bambanag kas pukaw maigapu iti naringbaw a pateg ti pannakaammo ken Kristo Jesus nga Apok.+ Maigapu kenkuana inawatko ti pannakaipukaw ti amin a bambanag ket ibilangko ida kas adu a basura,+ tapno magun-odak ni Kristo
9 ken masarakanak a naikaykaysa kenkuana, nga addaanak, saan a ti bukodko a kinalinteg, nga ibunga ti linteg,+ no di ket daydiay babaen iti pammati+ ken Kristo, ti kinalinteg nga agtaud iti Dios maibatay iti pammati,+
10 tapno isu maammuak ken ti pannakabalin ti panagungarna+ ken pannakiraman kadagiti panagsagabana,+ nga ipaspasakupko ti bagik iti ipapatay a kas iti ipapatayna,+
11 tapno kitaek no iti aniaman a pamay-an magun-odak ti nasapsapa a panagungar+ kadagiti natay.
12 Saan a gapu ta inawatkon dayta wenno naan-anayakon,+ no di ket agregreggetak+ tapno kitaek no maiggamak+ met dayta a pinangiggem+ kaniak ni Kristo Jesus.
13 Kakabsat, saanko pay nga ibilang ti bagik a naiggamakon dayta; ngem adda maysa a banag maipapan iti dayta: Iti pananglipat kadagiti banag a nalikudan+ ken panangragpat kadagiti banag nga adda iti masanguanan,+
14 agregreggetak nga agturong iti kalat+ maipaay iti gunggona+ a panagpangato nga ayab+ ti Dios babaen ken Kristo Jesus.
15 Ngarud, datayo amin a nataenganen,+ addaantay koma iti daytoy a kababalin ti isip;+ ket no agannayas ti isipyo iti sabali iti aniaman a pamay-an, ti Dios ipalgaknanto kadakayo ti kababalin nga adda iti ngato.
16 Uray no kasta, aniaman ti nagtengantayon a panagrang-ay, agtultuloytayo koma a magna a siuurnos+ iti daytoy met laeng a rutina.
17 Agkaykaysakayo nga agbalin a tumutulad+ kaniak, kakabsat, ket matmatanyo dagidiay magmagna iti wagas a maitunos iti ulidan nga impaaymi kadakayo.+
18 Ta aduda, masansan a dakamatek ida idi ngem ita dakamatek met ida buyogen ti panagsangit, dagiti magmagna kas kabkabusor ti kayo a pagtutuokan ni Kristo,+
19 ket ti panungpalanda isu ti pannakadadael,+ ket ti diosda isu ti tianda,+ ket ti dayagda adda iti pannakaibabainda,+ ket adda dagiti panunotda iti bambanag ditoy daga.+
20 No maipapan kadatayo, ti pannakipagilitayo+ adda iti langlangit,+ a manipud met iti dayta a lugar sigagagar nga ur-urayentayo+ ti manangisalakan, ni Apo Jesu-Kristo,+
21 a mangbalbaliwto iti langa ti naipababa a bagitayo+ tapno mayannurot iti nadayag a bagina+ sigun iti panagtignay+ ti pannakabalin nga adda kenkuana, tapno ipasakupna met+ ti amin a bambanag iti bagina.
