Daniel 9:1-27
9 Iti umuna a tawen ni Dario+ nga anak ni Asuero iti bin-i dagiti Medo,+ a napagbalin nga ari iti pagarian dagiti Caldeo;+
2 iti umuna a tawen ti panagturayna siak, ni Daniel, babaen kadagiti libro nailasinko ti bilang dagiti tawen a maipapan iti dayta ti sao ni Jehova dimteng ken Jeremias a mammadto,+ maipaay iti pannakatungpal dagiti panagwalangwalang ti Jerusalem,+ awan sabali, pitopulo a tawen.+
3 Ket insaadko ti rupak+ a maiturong ken Jehova a pudno a Dios, tapno isu sapulek buyogen ti kararag+ ken buyogen dagiti panagpakaasi, agraman panagayunar ken tinakpil ken dapdapo.+
4 Ket nangrugiak nga agkararag ken Jehova a Diosko ken agipudno ken agkuna:+
“Ah Jehova a pudno a Dios, Daydiay naindaklan+ ken Daydiay nakaam-amak, a mangsalsalimetmet iti tulag+ ken iti naayat a kinamanangngaasi+ kadagidiay mangay-ayat kenkuana ken kadagidiay mangsalsalimetmet kadagiti bilinna,+
5 nagbasolkami+ ken nakaaramidkami iti dakes ken nagtignaykami a sidadangkes ket nagrebeldekami;+ ket adda idi isisiasi kadagiti bilinmo ken kadagiti hudisial a pangngeddengmo.+
6 Ket saankami nga immimdeng kadagiti adipenmo a mammadto,+ nga iti naganmo nagsaoda iti ar-arimi, iti piprinsipemi ken kadagidi ammami ken kadagiti amin nga umili iti daga.+
7 Sika, O Jehova, kukuam ti kinalinteg, ngem kadakami ti sibabain a rupa kas itoy nga aldaw,+ kadagiti lallaki ti Juda ken kadagiti agnanaed iti Jerusalem ken kadagidiay amin a kameng ti Israel, kadagidiay asideg ken kadagidiay adayo iti amin a dagdaga a nangiwarawaraam kadakuada gapu iti saanda a kinamatalek a babaen iti dayta nagtignayda maibusor kenka.+
8 “O Jehova, agpaay kadakami ti sibabain a rupa, iti ar-arimi, iti piprinsipemi ken kadagidi ammami, agsipud ta nagbasolkami a maikaniwas kenka.+
9 Kukua ni Jehova a Diosmi dagiti asi+ ken dagiti aramid a panangpakawan,+ ta nagrebeldekami kenkuana.+
10 Ket saankami a nagtulnog iti timek ni Jehova a Diosmi babaen iti pannagnami kadagiti lintegna nga inkabilna iti sanguananmi babaen iti ima dagiti adipenna a mammadto.+
11 Ket amin dagiti kameng ti Israel sinalungasingda ti lintegmo, ket adda idi isisiasi babaen iti saan a panagtulnog iti timekmo,+ iti kasta imbukbokmo kadakami ti lunod ken ti sinapataan a kari+ a naisurat iti linteg ni Moises nga adipen ti pudno a Dios, ta nagbasolkami a maikaniwas Kenkuana.
12 Ket intungpalna ti sasaona a sinaona maibusor kadakami+ ken maibusor kadagiti ukommi a nangukom kadakami,+ babaen ti panangipagteng kadakami iti dakkel a didigra, kas iti saan pay a naaramid iti baba ti intero a langlangit kas iti naaramid iti Jerusalem.+
13 Kas iti adda a naisurat iti linteg ni Moises,+ isuamin daytoy a didigra—dimteng kadakami,+ ket saanmi a napalukneng ti rupa ni Jehova a Diosmi babaen ti itatallikud iti biddutmi+ ken babaen ti panangipakita iti pannakatarus iti kinapudnom.+
14 “Ket nagtultuloy a sipapanunot ni Jehova iti didigra ket iti kamaudiananna impagtengna kadakami,+ ta ni Jehova a Diosmi nalinteg iti amin nga ar-aramidna nga inaramidna; ket saankami a nagtulnog iti timekna.+
15 “Ket ita, O Jehova a Diosmi, sika a nangiruar iti ilim manipud iti daga ti Egipto babaen iti napigsa nga ima+ ket inyaramidam ta bagim iti maysa a nagan a kas itoy nga aldaw,+ nagbasolkami,+ nagtignaykami a sidadangkes.
16 O Jehova, maitunos iti amin nga ar-aramidmo a kinalinteg,+ pangngaasim, ti ungetmo ken ti pungtotmo agbaw-ing koma manipud iti siudadmo a Jerusalem, ti nasantuan a bantaymo;+ ta, gapu kadagiti basolmi ken gapu kadagiti biddut dagidi ammami,+ ti Jerusalem ken ti ilim ket puntiria ti panangumsi dagidiay amin nga adda iti aglikmutmi.+
17 Ket ita imdengam, O Diosmi, ti kararag ti adipenmo ken dagiti panagpakaasina, ket pagsilnagem ta rupam+ iti santuariom a langalang,+ maipagapu ken Jehova.
18 Iyallingagmo ta lapayagmo, O Diosko, ket dumngegka.+ Luktam dagiti matam ket kitaem dagiti langalang a kasasaadmi ken ti siudad a napanaganan iti naganmo;+ ta saan a maitunos iti nalinteg nga ar-aramidmi nga idatagmi dagiti panagpakaasimi iti sanguanam,+ no di ket maitunos kadagiti adu nga asim.+
19 O Jehova, dumngegka.+ O Jehova, mamakawanka.+ O Jehova, mangipangagka ket agtignayka.+ Dika agtaktak,+ maipagapu kenka met laeng, O Diosko, ta ti bukodmo a nagan naipanagan iti siudadmo ken iti ilim.”+
20 Bayat nga agsasaoak pay laeng ken agkarkararagak ken ipudpudnok ti basolko+ ken ti basol ti ilik nga Israel+ ket idatdatagko ti panagkiddawko iti parabur iti sanguanan ni Jehova a Diosko maipapan iti nasantuan a bantay+ ti Diosko,
21 ken bayat nga agsasaoak pay laeng iti kararag, ay ket, ti lalaki a ni Gabriel,+ a nakitak iti sirmata idi rugi,+ a napakil gapu iti bannog, dimteng iti dennak iti tiempo ti sagut a daton iti rabii.+
22 Ket nangiburay iti pannakaawat ken nakisao kaniak ket kinunana:
“O Daniel, ita rimmuarak tapno pagbalinenka nga addaan pannakatarus buyogen ti pannakaawat.+
23 Iti rugi dagiti panagpakpakaasim rimmuar ti maysa a sao, ket siak immayak nga agipadamag, agsipud ta maysaka a makaay-ayo unay.+ Gapuna utobem+ ti banag, ket maaddaanka iti pannakaawat iti banag a nakita.
24 “Adda pitopulo a lawas a naikeddeng iti ilim+ ken iti nasantuan a siudadmo,+ tapno gibusan ti salungasing,+ ken tapno pagpatinggaen ti basol,+ ken tapno mangaramid iti panangabbong maipaay iti biddut,+ ken tapno mangyeg iti kinalinteg maipaay kadagiti tiempo a di nakedngan,+ ken tapno mangimaldit iti maysa a selio+ iti sirmata ken mammadto, ken tapno pulotan ti Santo dagiti Sasanto.+
25 Ket rebbeng nga ammuem ken maaddaanka iti pannakatarus a manipud iruruar ti sao+ a mangisubli ken mangbangon manen iti Jerusalem+ agingga iti Mesias+ a Panguluen,+ addanto pito a lawas, kasta met innem a pulo ket dua a lawas.+ Isu agsublinto ket pudno a mabangon manen, nga addaan iti publiko a plasa ken kanal, ngem iti karirigatan kadagiti tiempo.
26 “Ket kalpasan ti innem a pulo ket dua a lawas magessatto ti Mesias,+ nga awan aniaman nga agpaay kenkuana.+
“Ket ti siudad ken ti nasantuan a disso+ dadaelento ti ili ti maysa a panguluen nga um-umay.+ Ket ti panungpalanna babaento iti layus. Ket agingga iti panungpalan addanto gubat; ti naikeddeng ket dagiti panaglangalang.+
27 “Ket ipaalagadnanto ti tulag+ kadagiti adu iti maysa a lawas;+ ket iti kagudua ti lawas pasardengennanto ti sakripisio ken daton a sagut.+
“Ket iti payak dagiti makarimon a banag addanto daydiay mamaglangalang;+ ket agingga iti panangtalipupos, ti mismo a banag a naikeddeng maibukbokto met iti rabaw daydiay langalang.”+
