Daniel 10:1-21
10 Iti maikatlo a tawen ni Ciro+ nga ari ti Persia adda banag a naipalgak ken Daniel, a napanaganan iti Baltazar;+ ket ti banag pudno, ket adda idi dakkel a panagserbi iti militar.+ Ket naawatanna ti banag, ket addaan pannakaawat iti banag a nakita.+
2 Kadagidiay nga aldaw siak, ni Daniel, agledleddaangak+ idi iti intero a tallo a lawas.
3 Saanak a nangan iti naimas a tinapay, ket awan simrek a lasag wenno arak iti ngiwatko, ket saanko a pulos sinapsapuan ti bagik agingga iti pannakaturpos ti intero a tallo a lawas.+
4 Ket iti maikaduapulo ket uppat nga aldaw ti umuna a bulan, bayat a siak addaak idi iti igid ti dakkel a karayan, awan sabali, ti Hiddekel,+
5 intangadko met dagiti matak ket kimmitaak, ket adtoy ti maysa a lalaki a sikakawes iti lienso,+ a dagiti padingpadingna+ nabariksan iti balitok ti Ufaz.+
6 Ket ti bagina kasla krisolito,+ ket ti rupana kasla iti langa ti kimat,+ ket dagiti matana kaslada gumilgil-ayab nga al-aluten,+ ket dagiti takiagna ken ti disso dagiti sakana kaslada iti buya ti napasilap a gambang,+ ket ti timek ti sasaona kaslada iti timek ti maysa a bunggoy.
7 Ket nakitak, siak ni Daniel a maymaysak, ti langa; ngem no maipapan kadagiti lallaki nga adda idi a kaduak, saanda a nakita ti langa.+ Nupay kasta, adda dakkel a panagpigerger nga immapay kadakuada, iti kasta nagtatalawda tapno aglemmengda.
8 Ket siak—nabatiak a sisiak, iti kasta nakitak daytoy naindaklan a langa. Ket awan nabati kaniak a bileg, ket ti bukodko a dayaw nabaliwan kaniak iti pannakadadael, ket awan nabati kaniak a bileg.+
9 Ket nangrugi a mangngegko ti timek ti sasaona; ket bayat a mangmangngegko ti timek ti sasaona, siak met nargaan idi ti turogko+ a sipapaklebak, a ti rupak dumanon iti daga.+
10 Ket, adtoy! adda ima a nangsagid kaniak,+ ket nagin-inut a tinignaynak nga agsammaked kadagiti tumengko ken kadagiti dakulap ti im-imak.
11 Ket kinunana kaniak:
“O Daniel, sika a makaay-ayo unay a lalaki,+ maaddaanka iti pannakaawat iti sasao a sasawek kenka,+ ket tumakderka iti nagtaktakderam, ta ita naibaonak kenka.”
Ket idi sinaona kaniak daytoy a sao, timmakderak, nga agtigtigerger.
12 Ket kinunana kaniak: “Dika agbuteng,+ O Daniel, ta manipud iti umuna nga aldaw a panangipapusom ti pannakaawat+ ken panangipakumbabam ta bagim iti sanguanan ti Diosmo+ nangngegan ti sasaom, ket siak immayak gapu iti sasaom.+
13 Ngem ti prinsipe+ ti naarian a pagturayan ti Persia+ sitatakder idi a bumusor+ kaniak iti duapulo ket maysa nga aldaw, ket, adtoy! ni Miguel,+ maysa kadagiti kangrunaan a prinsipe,+ immay a tumulong kaniak; ket siak, iti biangko, nagbatiak sadiay iti sibay ti ar-ari ti Persia.+
14 Ket immayak tapno pagbalinenka a makailasin no anianto ti mapagteng iti ilim+ iti kamaudianan a paset ti al-aldaw,+ agsipud ta sirmata+ dayta nga agpaayto pay laeng kadagiti aldaw nga umay.”+
15 Ita idi sinaona kaniak ti sasao a kas kadagitoy, indumogko ti rupak iti daga+ ket nagumelak.
16 Ket, adtoy! ti maysa a kaasping ti langa ti annak ti sangatauan sagsagidenna idi dagiti bibigko,+ ket rinugiak a ngangaen ti ngiwatko ken sawen+ ken kunaen iti daydiay sitatakder iti sanguanak: “O apok,+ gapu iti langa bimmaw-ing iti unegko dagiti panagkuyegyegko, ket awan nabati kaniak nga aniaman a bileg.+
17 Iti kasta kasano a ti adipen daytoy apok nabalinanna ti makisao iti daytoy apok?+ Ket no maipapan kaniak, agingga ita awan ti bileg a nagtalinaed kaniak, ket awan a pulos anges a nabati kaniak.”+
18 Ket ti maysa a kas iti langa ti naindagaan a tao sinagidnak manen ket pinapigsanak.+
19 Idin kinunana: “Dika agbuteng,+ O makaay-ayo unay a lalaki.+ Maaddaanka koma iti talna.+ Bumilegka, wen, bumilegka.”+ Ket apaman a nakisao kaniak nagpuersaak ket kamaudiananna kinunak: “Agsao koma ti apok,+ agsipud ta pinapigsanak.”+
20 Gapuna kinunana:
“Pudno kadi nga ammom no apay nga immayak kenka? Ket ita agsubliak a makirupak iti prinsipe ti Persia.+ Inton mapanak, adtoy! umay met ti prinsipe ti Grecia.+
21 Nupay kasta, ibagakto kenka dagiti banag a nailanad iti surat ti kinapudno,+ ket awan ti nabileg a tumultulong kaniak kadagitoy a banag no di ni Miguel,+ ti prinsipeyo.+
