Colosas 4:1-18
4 Dakayo nga appo, itultuloyyo nga ipaay no ania ti nalinteg ken no ania ti nainkalintegan kadagiti adipenyo,+ a pagaammoyo nga adda met Apoyo sadi langit.+
2 Reggetanyo ti panagkararag,+ nga agtalinaedkayo a siririing iti dayta buyogen ti panagyaman,+
3 bayat nga ikararagandakami met,+ tapno luktan kadakami ti Dios ti maysa a ruangan+ ti panagsao, tapno sawenmi ti sagrado a palimed+ maipapan iti Kristo, a gapu iti dayta, iti kinapudnona, sipaparautak iti pagbaludan;+
4 tapno maiparangarangko dayta a kas iti rebbengko a panangisao.+
5 Itultuloyyo ti magna a sisisirib kadagidiay adda iti ruar,+ a gatangenyo ti nainggundawayan+ a tiempo maipaay iti bagbagiyo.
6 Ti panagsaoyo kankanayon koma a mabuyogan iti kinaparabur,+ natemplaan iti asin,+ tapno ammoyo no kasano ti rebbengyo nga isusungbat+ iti tunggal maysa.
7 Amin nga ar-aramidko ipakaammonto kadakayo ni Tiquico,+ ti dungdungnguek a kabsat ken matalek a ministro ken padak nga adipen iti Apo.
8 Maipaay iti mismo a panggep a panangammoyo iti bambanag nga adda pannakainaigna kadakami ken tapno maliwliwana ti puspusoyo,+ isu ibaonko kadakayo
9 agraman ni Onesimo,+ ti matalek ken dungdungnguen a kabsatko, a naggapu kadakayo. Ipakaammodanto kadakayo ti amin a bambanag ditoy.
10 Ni Aristarco+ a padak a kautibo ipaw-itna kadakayo dagiti kablaawna, ken kasta met ni Marcos+ a kasinsin ni Bernabe, (a maipapan kenkuana inawatyo dagiti bilin nga isu abrasaenyo+ no bilang umay kadakayo,)
11 ken ni Jesus a maaw-awagan Justo, dagitoy dagidiay kameng kadagiti nakugit. Dagitoy laeng ti katrabahuak maipaay iti pagarian ti Dios, ket dagitoy a mismo nagbalinda a makapabileg a tulong kaniak.
12 Ni Epafras,+ a naggapu kadakayo, maysa nga adipen ni Kristo Jesus, ipaw-itna kadakayo dagiti kablaawna, a kankanayon nga umag-agawa iti karkararagna maigapu kadakayo, tapno iti kamaudiananna makapagtakderkayo a naan-anay+ ken addaan natibker a panamati iti isuamin a pagayatan ti Dios.
13 Kinapudnona isu saksiak nga ikabkabilna ti bagina iti dakkel a panagregget maigapu kadakayo ken kadagidiay adda idiay Laodicea+ ken kadagidiay adda idiay Hierapolis.
14 Ni Lucas+ a dungdungnguen a mangngagas ipaw-itna kadakayo dagiti kablaawna, ken kasta met ni Demas.+
15 Idanonyo dagiti kablaawko kadagiti kakabsat idiay Laodicea ken ni Nimfa ken iti kongregasion nga adda iti balayna.+
16 Ket inton daytoy a surat naibasan kadakayo, iyurnosyo a maibasa met+ iti kongregasion dagiti taga Laodicea ken basaenyo met daydiay aggapu idiay Laodicea.
17 Kasta met, ibagayo ken ni Arquipo:+ “Itultuloymo nga aluadan ti ministerio nga inawatmo iti Apo, a tungpalem dayta.”
18 Adtoy ti kablaawko, ni Pablo, iti bukodko nga ima.+ Itultuloyyo a laglagipen dagiti parautko iti pagbaludan.+ Ti di kaikarian a kinamanangngaasi maadda koma kadakayo.
