Colosas 1:1-29
1 Ni Pablo, maysa nga apostol ni Kristo Jesus babaen iti pagayatan ti Dios,+ ken ni Timoteo+ a kabsattayo
2 agpaay kadagiti sasanto ken matalek a kakabsat a naikaykaysa+ ken Kristo idiay Colosas:
Maaddaankay koma iti di kaikarian a kinamanangngaasi ken talna manipud iti Dios nga Amatayo.+
3 Agyamankami+ a kankanayon iti Dios nga Ama ni Apotayo a Jesu-Kristo no ikararagandakayo,+
4 yantangay nangngegmi ti maipapan iti pammatiyo mainaig ken Kristo Jesus ken ti ayat nga adda kadakayo maipaay kadagiti amin a sasanto+
5 gapu iti namnama+ a maisagsagana maipaay kadakayo iti langlangit.+ Daytoy a namnama nangngeganyon idi damo babaen ti pannakaibaga ti kinapudno dayta a naimbag a damag+
6 a nagdatag kadakayo, no kasano nga agbungbunga+ ken rumangrang-ay+ dayta iti intero a lubong+ a kas met ti ar-aramidenna iti tengngayo, nanipud iti aldaw a nangngeganyo ken siuumiso a naammuanyo ti di kaikarian a kinamanangngaasi+ ti Dios iti kinapudno.+
7 Dayta ti nasursuroyo ken Epafras+ a dungdungnguenmi a pada nga adipen, a maysa a matalek a ministro ti Kristo maigapu kadakami,
8 nga isu ti nangipalgak met kadakami ti ayatyo+ iti naespirituan a pamay-an.
9 Dayta met ti makagapu a, nanipud iti aldaw a pannakangngegmi iti dayta, saankami a namingga a mangikarkararag kadakayo+ ken agdawdawat tapno mapnokayo koma iti umiso a pannakaammo+ iti pagayatanna iti isuamin a sirib+ ken naespirituan a pannakaawat,+
10 tapno magnakayo a maikari+ ken Jehova+ iti panggep a panangay-ayo a naan-anay kenkuana bayat nga agtultuloykayo nga agbunga iti tunggal naimbag nga aramid+ ken rumang-ay iti umiso+ a pannakaammo iti Dios,
11 a mapabpabileg iti isuamin a pannakabalin iti madanon ti nadayag a pannakabalinna+ tapno naan-anay a makapagibturkayo+ ken maaddaankayo iti mabayag a panagitured buyogen ti rag-o,
12 nga agyamyaman iti Ama a namagbalin kadakayo a maikari iti pannakipasetyo iti tawid+ dagiti sasanto+ iti lawag.+
13 Inispalnatayo manipud iti autoridad+ ti sipnget ket inyalisnatayo+ iti pagarian+ ti Anak ti ayatna,+
14 a babaen kenkuana addaantayo ti pannakaluk-at babaen iti subbot, ti pannakapakawan dagiti basoltayo.+
15 Isu ti ladawan+ ti di makita+ a Dios, ti inauna+ iti isuamin a parsua;
16 agsipud ta babaen kenkuana,+ amin a sabsabali pay a bambanag naparsuada iti langlangit ken iti rabaw ti daga, ti bambanag a makita ken ti bambanag a di makita, uray pay no dagita ket trono wenno kinaapo wenno gobierno wenno autoridad.+ Amin a sabsabali pay a bambanag naparsuada babaen kenkuana+ ken maipaay kenkuana.
17 Kasta met, isu addan kasakbayan ti amin a sabsabali pay a bambanag+ ket babaen kenkuana napaadda ti amin a sabsabali pay a bambanag,+
18 ken isu ti ulo ti bagi, ti kongregasion.+ Isu ti pangrugian, ti inauna manipud kadagiti natay,+ tapno isu ti agbalin a daydiay umuna+ iti amin a bambanag;
19 agsipud ta ti Dios nakitana a nasayaat nga agtaeng kenkuana ti isuamin a kinanaan-anay,+
20 ket baeten kenkuana nga ikappiana+ manen iti bagina ti amin a sabsabali pay a bambanag+ iti panangaramidna iti kappia+ babaen ti dara+ nga imparukpokna iti kayo a pagtutuokan,+ uray pay no dagita ti bambanag iti rabaw ti daga wenno ti bambanag iti langlangit.
21 Pudno unay, dakayo a naisina idi+ ken kabkabusor agsipud ta dagiti panunotyo addada kadagiti aramid a nadangkes,+
22 inkappianakayo manen ita+ babaen ti nainlasagan a bagi dayta babaen ti ipapatayna,+ tapno iparangnakayo a nasantuan ken awanan pakapilawan+ ken awanan pakapabasolan+ iti sanguananna,
23 no la ket ta, siempre, agtalinaedkayo iti pammati,+ a naipasdek iti pamuon+ ken sititibker+ ken saan a mayadayo iti namnama dayta naimbag a damag a nangngegyo,+ ken naikaskasaba+ iti isuamin a parsua+ nga adda iti baba ti langit. Gapu itoy a naimbag a damag siak ni Pablo nagbalinak a ministro.+
24 Agragrag-oak ita kadagiti panagsagabak maipaay kadakayo,+ ket siak, iti biangko, pumpunnuak no ania ti kurang kadagiti rigat+ ni Kristo iti lasagko maigapu iti bagina, nga isu ti kongregasion.+
25 Nagbalinak a ministro+ daytoy a kongregasion maitunos iti kinamayordomo+ manipud iti Dios a naited kaniak maipaay iti pagimbaganyo tapno naan-anay nga ikasabak ti sao ti Dios,
26 ti sagrado a palimed+ a naitalimeng manipud kadagiti napalabas a sistema ti bambanag+ ken manipud kadagiti naglabas a kaputotan. Ngem ita naiparangarangen+ kadagiti sasantona,
27 a kadakuada naay-ayo ti Dios a mangipakaammo no ania ti nadayag a kinabaknang+ daytoy sagrado a palimed+ iti tengnga dagiti nasion. Isu ni Kristo+ a naikaykaysa kadakayo, ti namnama ti dayagna.+
28 Isu daydiay ipabpablaakmi,+ a bagbagaanmi ti tunggal tao ket sursuruanmi ti tunggal tao iti isuamin a sirib,+ tapno maiparangmi ti tunggal tao kas naan-anay+ a maikaykaysa ken Kristo.
29 Iti daytoy a panggep pudno unay nga agtartrabahoak a sipipinget, nga umag-agawaak+ maitunos iti panagtignayna+ ken isu nga agar-aramid kaniak buyogen ti pannakabalin.+
