Amos 8:1-14
8 Daytoy ti impakita kaniak ti Soberano nga Apo Jehova, ket, adtoy! adda maysa a labba ti bunga iti kalgaw.+
2 Idin kinunana: “Ania ti makitam,+ Amos?” Ngarud kinunak: “Maysa a labba ti bunga iti kalgaw.”+ Ket kinuna kaniak ni Jehova: “Dimtengen ti panungpalan iti ilik nga Israel.+ Saankonton a palabsen pay ida.+
3 ‘Ket dagiti kanta iti templo pudno nga agbalindanto a panaganug-og iti dayta nga aldaw,’+ kuna ti Soberano nga Apo Jehova. ‘Adunto dagiti bangkay.+ Iti tunggal disso sigurado nga ipalladawto ida ti maysa—agulimek!’
4 “Denggenyo daytoy, dakayo a mangsiksikbab iti daydiay napanglaw,+ tapno ikkatenyo dagidiay naemma iti daga,+
5 a kunayo, ‘Kasanonto pay kabayag sakbay a lumabas ti baro a bulan+ ket makapaglakokami iti bukbukel?+ Kasta met, ti sabbath,+ ket makaitukonkami iti bukbukel a mailako; tapno mapabassitmi ti efa+ ket mapadakkelmi ti siklo ket mapalsipikadomi dagiti timbangan ti panangallilaw;+
6 tapno makagatangkami iti nanumo a tattao babaen iti pirak laeng ken iti maysa a napanglaw babaen iti gatad ti sangaparis a palloka, ken tapno makailakokami iti basura laeng a bukbukel?’+
7 “Ni Jehova insapatana babaen iti Kinatan-ok ni Jacob,+ ‘Saankonto a pulos lipaten amin dagiti aramidda.+
8 Saanto kadi a maigapu iti daytoy a madayyegto ti daga,+ ket tunggal agnanaed iti dayta kasapulanto nga agleddaang;+ ket dayta, ti intero dayta, sigurado a sumang-atto a kas iti Nilo ket maipallayog ken lumned a kas iti Nilo ti Egipto?’+
9 “‘Ket mapasamakto iti dayta nga aldaw,’ kuna ti Soberano nga Apo Jehova, ‘a palnekekto ti init iti matuon,+ ket pagsipngetekto ti daga iti nalawag nga aldaw.
10 Ket dagiti piestayo pagbalinekto a panagleddaang+ ket amin dagiti kantayo pagbalinek a dung-aw, ket mangikabilakto iti tinakpil kadagiti amin a padingpading ket iti tunggal ulo panagkalbo;+ ket ti kasasaad pagbalinekto a kas iti panagleddaang iti kakaisuna nga anak,+ ket ti tungpal dayta kas iti napait nga aldaw.’
11 “‘Adtoy! Adda um-umayen nga al-aldaw,’ kuna ti Soberano nga Apo Jehova, ‘ket mangipagtengakto iti nakaro a bisin iti daga, maysa a nakaro a bisin, saan nga iti tinapay, ken waw, saan nga iti danum, no di ket iti panagdengngeg iti sasao ni Jehova.+
12 Ket sigurado nga agbariringdanto manipud baybay agingga iti baybay, ken manipud amianan agingga a mismo iti leleggakan ti init. Agtultuloydanto nga agsursor bayat a birbirokenda ti sao ni Jehova, ngem saandanto a masarakan.+
13 Iti dayta nga aldaw matalimudawto dagiti nalibnos a birhen, kasta met dagiti agtutubo a lallaki, gapu iti waw;+
14 dagidiay agsapsapata babaen ti panagbasol ti Samaria,+ ken pudno nga agkuna: “Kas sibibiag ti diosmo, O Dan!”+ ken, “Kas sibibiag ti dalan ti Beer-seba!”+ Ket sigurado a mapasagdanto, ket saandanton a bumangon.’”+
