Amos 6:1-14
6 “Asi pay dagidiay sinanam-ay+ iti Sion ken dagidiay agtaltalek iti bantay ti Samaria! Isuda dagidiay mabigbigbig iti kangrunaan a paset dagiti nasion, ket kadakuada ti immayan ti balay ti Israel.
2 Umallatiwkayo idiay Calne, ket kitaenyo; ket manipud sadiay mapankayo idiay aduan umilina a Hamat,+ ket sumalogkayo nga agturong idiay Gat+ dagiti Filisteo. Nasaysayaatda kadi ngem dagitoy a pagarian, wenno dakdakkel kadi ti teritoriada ngem iti teritoriayo?+
3 Iwakwaksiyo kadi iti panunotyo ti makadidigra nga aldaw,+ ket iyasidegyo kadi ti pagnaedan ti kinaranggas?+
4 Dakayo a tattao nga agid-idda kadagiti sopa a marfil+ ken agun-unnat kadagiti iddada, ken mangmangan kadagiti kalakian a karnero manipud iti arban ken kadagiti urbon a toro manipud kadagiti pinalukmeg a kigaw a baka;+
5 nga agputputar maitunos iti uni ti pagtokar nga adda kuerdasna;+ a, kas ken David, nangpaltuad maipaay iti bagbagida kadagiti pagtokar iti kanta;+
6 nga umin-inum manipud kadagiti malukong ti arak,+ ken babaen kadagiti kasayaatan a lana+ aramidenda ti panangpulotda, ken saan a napagsakit gapu iti didigra ni Jose.+
7 “Gapuna ita maidestierodanto iti masanguanan dagidiay maidesdestiero,+ ket ti naariwawa a panagragragsak dagidiay agun-unnat pumanawto.
8 “‘Ti Soberano nga Apo Jehova nagsapata babaen ti bukodna a kararua,’+ kuna ni Jehova a Dios ti buybuyot, ‘“Karimonko ti pagpannakkel ni Jacob,+ ket ginurak dagiti pagnaedan a torrena,+ ket iyawatkonto ti siudad ken ti mangpunno iti dayta.+
9 Ket mapasamakto a no ti sangapulo a lallaki mabati iti maysa a balay, mataydanto met.+
10 Ket ti kabsat ni amana kasapulanto a bunagenna ida a sinaggaysa, ket puorannanto ida a sinaggaysa, tapno iruarna dagiti tulang manipud iti balay.+ Ket kasapulanto a kunaenna iti siasinoman nga adda iti kaunggan a paspaset ti balay, ‘Adda pay kadi kaduam?’ Ket sigurado a kunaennanto, ‘Awan!’ Ket kasapulanto a kunaenna, ‘Agulimekka! Ta saan a dayta ti gundaway iti aniaman a panangdakamat iti nagan ni Jehova.’”+
11 “‘Ta adtoy ni Jehova nga agbilbilin,+ ket sigurado a kabilennanto ti dakkel a balay a pagbalinen a rippuog ken ti bassit a balay a pagbalinen a reggaay.+
12 “‘Iti napasdok a bato agtarayto kadi dagiti kabalio, wenno ti maysa agaradonto kadi sadiay babaen iti bakbaka? Ta ti kinahustisia pinagbalinyo a makasabidong a mula,+ ket ti bunga ti kinalinteg pinagbalinyo nga ajenjo,
13 dakayo nga agragrag-o iti banag nga awan;+ nga agkunkuna: “Saan kadi nga iti bukodmi a pigsa nangalakami kadagiti sara maipaay iti bagbagimi?”+
14 Adtoy! Mangibangonak maibusor kadakayo, O balay ti Israel,’ kuna ni Jehova a Dios ti buybuyot, ‘iti maysa a nasion,+ ket irurumendakayto manipud iti seserkan ti Hamat+ agingga idiay naapres a ginget ti Araba.’”

