Amos 1:1-15
1 Ti sasao ni Amos, nga adda idi kadagiti agtartaraken iti karnero manipud Tecoa,+ a nasirmatana maipapan iti Israel+ idi kaaldawan ni Ozias+ nga ari ti Juda ken idi kaaldawan ni Jeroboam+ nga anak ni Joas,+ ti ari ti Israel, dua a tawen sakbay ti ginggined.+
2 Ket kinunana:
“Ni Jehova—agungorto manipud Sion,+ ket manipud Jerusalem iyesngawnanto ti timekna;+ ket agleddaangto dagiti pagpaaraban ti papastor, ket ti tapaw ti Carmelo agmaganto.”+
3 “Daytoy ti kinuna ni Jehova, ‘“Maigapu iti tallo nga iyaalsa ti Damasco,+ ken maigapu iti uppat, saankonto nga ibaw-ing dayta, maigapu iti panangirikda iti Galaad+ babaen a mismo kadagiti landok nga alikamen a pagirik.
4 Ket mangibaonakto iti apuy+ iti balay ni Hazael,+ ket alun-onennanto dagiti pagnaedan a torre ni Ben-hadad.+
5 Ket tukkolekto ti balunet ti Damasco+ ket gessatek ti agnanaed manipud Bicat-aven, ken ti mangig-iggem iti setro manipud Bet-eden; ket dagiti umili ti Siria kasapulan a mapandanto idiay Kir kas dagiti destiero,”+ kinuna ni Jehova.’
6 “Daytoy ti kinuna ni Jehova, ‘“Maigapu iti tallo nga iyaalsa ti Gaza,+ ken maigapu iti uppat, saankonto nga ibaw-ing dayta, maigapu iti panangidestieroda iti intero a bagi dagiti destiero+ tapno iyawat ida iti Edom.+
7 Ket mangibaonakto iti apuy iti pader ti Gaza,+ ket alun-onennanto dagiti pagnaedan a torrena.
8 Ket gessatekto ti agnanaed manipud Asdod,+ ken ti mangig-iggem iti setro manipud Ascalon;+ ket ibueltakto ti imak+ iti Ekron,+ ket mapukawto dagidiay nabatbati kadagiti Filisteo,”+ kinuna ti Soberano nga Apo Jehova.’
9 “Daytoy ti kinuna ni Jehova, ‘Maigapu iti tallo nga iyaalsa ti Tiro,+ ken maigapu iti uppat, saankonto nga ibaw-ing dayta, maigapu iti panangyawatda iti Edom ti intero a bagi dagiti destiero, ken agsipud ta saanda a nalagip ti tulag ti panagkakabsat.+
10 Ket mangibaonakto iti apuy iti pader ti Tiro, ket alun-onennanto dagiti pagnaedan a torrena.’+
11 “Daytoy ti kinuna ni Jehova, ‘Maigapu iti tallo nga iyaalsa ti Edom,+ ken maigapu iti uppat, saankonto nga ibaw-ing dayta, maigapu iti panangkamatna iti bukodna a kabsat babaen ti kampilan,+ ken agsipud ta dinadaelna dagiti mismo a naasi a kualidadna,+ ket ti ungetna agtultuloy a mangalat-at iti agnanayon; ket ti rungsotna—sinalimetmetanna nga awan patinggana.+
12 Ket mangibaonakto iti apuy iti Teman,+ ket alun-onennanto dagiti pagnaedan a torre ti Bozra.’+
13 “Daytoy ti kinuna ni Jehova, ‘“Maigapu iti tallo nga iyaalsa ti annak ni Ammon,+ ken maigapu iti uppat, saankonto nga ibaw-ing dayta,+ maigapu iti pananggisgisda kadagiti masikog a babbai ti Galaad, iti panggep a panangpalawa iti bukodda a teritoria.+
14 Ket mangpasgedakto iti apuy iti pader ti Rabba,+ ket alun-onennanto dagiti pagnaedan a torrena, buyogen ti alarma a pagilasinan iti aldaw ti bakal, buyogen ti nadawel a bagyo iti aldaw ti bagyo nga angin.+
15 Ket ti arida mapanto iti pannakaidestiero, isu ken dagiti prinsipena a sangsangkamaysada,”+ kinuna ni Jehova.’

