NEW YORK—Idi Hunio 20-22 ken Hunio 27-29, 2014, pinunno dagiti Saksi ni Jehova ti MetLife Stadium idiay East Rutherford, New Jersey, para iti serye ti “Itultuloyyo a Sapulen nga Umuna ti Pagarian ti Dios!” nga Internasional a Kombension. Dagiti programa ket naiparang iti English iti umuna a petsa ken iti Spanish iti simmaruno a petsa.

Agdagup iti nasurok a 118,000 ti kangatuan a bilang ti timmabuno para iti dua a ngudo ti lawas. Dagita a dua a taripnong ti kadakkelan pay laeng a kombension dagiti Saksi iti metropolitan New York kalpasan ti adu a dekada. Dadduma a paset ti programa ket naikonektar babaen iti video, iti nasurok nga 407,000 a dimmar-ay iti dadduma pay a siudad isu a nasurok a 525,500 ti dagup ti amin nga immatendar.

Adu a paset ti programa ti nangitampok kadagiti demostrasion ken video a mangipakita no kasano ti praktikal panangyaplikar kadagiti prinsipio ti Biblia. Nagngudo ti tunggal aldaw kadagita a kombension babaen iti lektiur ti maysa a miembro ti Bagi a Manarawidwid dagiti Saksi ni Jehova. Ni David Splane ti naglektiur idi Hunio 20-22 ken ni Geoffrey Jackson idi Hunio 27-29.

Ti bautismo ket paset met iti tunggal kombension. Agdagup iti 1,255 a tattao ti nabautisaran iti istadium, ken 2,930 ti nabautisaran kadagiti kombension a naikonektar babaen iti video isu nga 4,185 ti dagup ti amin a nabautisaran.

Karaman kadagiti dimmar-ay ket dagiti delegado a naawis manipud iti Argentina, Australia, Belize, Britain, Chile, Costa Rica, El Salvador, Germany, Greece, Guatemala, Honduras, Italy, Malaysia, Mexico, Nicaragua, Panama, Peru, Spain, ken Venezuela.

Kuna ti pannakangiwat dagiti Saksi ni Jehova a ni J. R. Brown: “Dayta nga okasion ti nangipalagip iti adu kadakami maipapan iti nakallalagip a kombension idiay New York idi 1958. Nasurok a 253,000 ti immatendar iti kasta nga okasion idiay Yankee Stadium ken ti adda pay la idi a Polo Grounds. Dagiti kombension iti MetLife Stadium ita a tawen ket sigurado a maibilang a nakapatpateg a pasamak iti pakasaritaan dagiti Saksi ni Jehova.”